Thursday 1 July 2004

This site will be updated on 8 July  2004 at 17:30

Business - Sakenuus

• Gesondheidsinspekteurs na distrik
• KWV kyk vorentoe
• Belasting op plase

BESTE DRUIWE. By Boland Kelder is toekennings gemaak aan lede van wie se druiwe die beste witwyn en rooiwyn gemaak is. Vanjaar se toekennings is gemaak aan (agter van links) Andries Valentyn (voorman, Lindenhof Plase), Thomas Babl (eienaar/bestuurder, Lindenhof Plase) vir Chardonnay druiwe waarvan die beste witwyn in die kelder gemaak is, en Hannes Aucamp (bestuurder, Denneboom) vir Shiraz druiwe waarvan die beste rooiwyn in die kelder gemaak is. Voor van links is Jurie Germishuys (wingerdboukundige by Boland) en Naudé Bruwer (wynmaker by Boland).

Gesondheidsinspekteurs na distrik

[ Top ]

VAN vandag af val omgewingsgesondheidsdienste onder distriksmunisipaliteite.

Dit beteken dat Boland Distriksmunisipaliteit (BDM) onder meer moet omsien na enige gesondheidsverwante aspek op handelslisensies. Die aansoeke word egter nog steeds by Drakenstein Munisipaliteit ingedien.

Dieselfde geld vir enige kommentaar op bouplanne, sonerings, dorpstigting, huiswinkels en onderverdelings, asook die aanhou van diere en pluimvee.

Die BDM sal ook geskiktheidsertifikate vir voedselhanteringspersele en begrafnisondernemingspersele uitreik.

Hulle is verantwoordelik vir voedselbeheer, monitering en ondersoeke, asook omgewingsgesondheidsinspeksies van alle persele in die streek.

Vektormonitering en beheer op alle persele (knaagdiere, vlieë, muskiete en kakkerlakke) val ook nou onder die BDM.

Verder kyk hulle na die opname en voorkoming van aansteeklike siektes, opvoeding en bewusmaking, omgewingsbesoedelingsbeheer, chemiese veiligheid asook waterkwaliteit.

Die omgewingsgesondheidspersoneel van Drakenstein Munisipaliteit, met hul funksies en bates, is oorgeplaas van die Boland Distriksmunisipaliteit.

Hulle kantore is op die oomblik in die Paarlse stadsaal (tel 807-4558), in Pentzstraat (tel 873-1121) en die munisipale kantore op Saron (tel 023-240-0525).

Die amptenare in die Paarlse stadsaal skuif op 1 Oktober na die Boland Distriksmunisipaliteit se kantoor in Hoofstraat, Paarl op die hoek van Pontacstraat (tel 871-1001).

Sake wat verband hou met geraas, lugbesoedeling, pesbeheer en toesig en beheer op openbare toilette sal nog tot 1 Oktober by die kantore hierbo genoem, hanteer word.

Korrespondensie kan gerig word aan die administratiewe hoofkantoor van Boland Distriksmunisipaliteit by Posbus 100, Stellenbosch 7500.

Mbekweni inwoners moet die Paarlse telefoonnommer skakel vir hulp.

DIE stryd om die beheer van KWV het verlede week geëindig toe KWV se direksie aangekondig het dat 'n konsortium bestaande uit die KWV Werknemerbemagtigingstrust en Christo Wiese ('n KWV-direkteur) Anglo African Trading konsortium se aandele gekoop het.

Hulle het die 85 miljoen aandele van Anglo African Trading en ander aandeelhouers (AAT konsortium) gekoop teen R157 miljoen.

AAT het in die voorafgaande weke gepoog om sowat 15% van KWV aandele te bekom teen R1,60 per aandeel, wat hom die grootste aandeelhouer gemaak het.

Dit het veroorsaak dat die hoeveelheid aandele wat vir swart ekonomiese bemagtiging beskikbaar was, gekrimp het.

Die aandele wat nou aan Wiese verkoop word, sluit ook dié in wat oorspronklik deur die Groep van Vyf (vroeër GT Ferreira, Pug Roux, Paul Meaker, Hannes van Niekerk en Thys du Toit) teen  laer pryse bekom is.

Die ooreenkoms volg op KWV se aankondiging verlede week dat 'n aanbod van R1,85 per aandeel deur sy voorgenome bemagtigingsvennoot, Phetogo, gemaak gaan word met die oog op 'n swart bemagtigingstransaksie.

Die transaksie het nou 'n konsolidasie van eienaarskap tot gevolg wat kan meehelp om die beoogde swart bemagtigingstransaksie te fasiliteer.

Christo Wiese, voorsitter van Pepkor, is eienaar van beide Lanzerac en Lourensford wynlandgoedere.

Die beduidende aandeel wat hy na verwagting nou in KWV sal hê, toon volgens KWV sy vertroue in die potensiaal van die maatskappy en die kompeterende vermoë van die Suid-Afrikaanse wynbedryf.

Benewens Wiese sal KWV se grootste aandeelhouers - na afloop van die transaksie, en na die finalisering van die swart bemagtigingsinisiatief - Phetogo (25,1%) en VinPro (10%) wees.

Phetogo sal nou voortgaan met sy proporsionele aanbod aan bestaande aandeelhouers, aangesien die Phetogo konsortium 'n totaal van 112 miljoen aandele wil bekom.

KWV het ook besluit om 'n spesiale dividend van 23c per aandeel uit te betaal op 15 Oktober, na afhandeling van die SEB transaksie.

Dit beteken dat SEB aandeelhouers effektief net R1,62 per aandeel sal betaal.

Die woordvoerder van AAT, Niel du Bois, het vandeesweek gesê, "Dit was nie vir ons strategies die moeite werd om die aandele te behou, indien ons nie genoeg kon verkry om werklik 'n invloed op die bestuur van KWV te hê nie.

"Gevolglik het ons besluit om te verkoop toe ons deur Wiese genader is."

LANDBOUERS in die Drakensteingebied betaal nie minder eiendomsbelasting as dié op plase in die Stellenbosch-streek nie, maar wel dubbeld dié van boere buite Stellenbosch en Franschhoek.

Boere in die Stellenbosch-streek betaal die afgelope jaar 0,07c/R, en dié belasting styg vandag na 0,13c in die Rand.

Boere in die Drakensteinstreek het die afgelope jaar 0,24c in die Rand betaal, en dié belasting styg vandag na 0,25c in die Rand.

Boere in die Paarlse dorpsgebied betaal 0,552c in die Rand, wat ook meer is as wat Stellenbossers vir plase in die dorpsgebied betaal (0,5334).

Op Franschhoek word landbou-eiendomme in die dorpsgebied nog hoër aangeslaan, teen 0,5868c in die Rand.

Die belasting op residensiële eiendomme in Drakenstein  is 1,143c/R.

[ Top ]