|
touwys te maak in die fyner kunsies van kosmaak.
Hulle is nou al so gekonfyt dat hulle elke tweede Maandag 'n vyfgangete vir gaste aanbied in die gemeenskapsaal op die plaas, teen slegs R40.
Dit alles word afgespoel met 'n glasie van die wyn wat ook as deel van bemagtigingsprojekte deur arbeiders op Nelson's Creek vervaardig is.
Die doel van dié opleiding is om die vroue toe te rus met kookkunsvaardighede wat hulle eendag kan aanwend vir selfbemagtiging.
Dit woel en werskaf in die kombuisie van Linda Sylvester, waar die vroue (wanneer hulle nie in die olyfboorde werk nie) met White aan die spits die smaakorgane streel.
Dit wissel van pannekoek met seekosvulsel, olyf-en-ui quiche en forel-filette met suurlemoenbotter tot roomys met papawersaad en gebraaide appels gevul met rosyntjies en sultanas asook suurlemoen-meringue.
White vertel met 'n knipoog waar die idee vir die kosskool nou eintlik vandaan gekom het. Hy is 'n chef wat al omtrent oor die hele land sy talente ingespan het en ook al 'n draai op die TV-program "Maak 'n Las" gemaak het.
"Linda se man, Barend, het eenkeer kom inloer by die restaurant waar ek werk. Daarna het hy gereeld vir Linda ook saamgebring en sy het later baie geïnteresseerd geraak in my kookkunstegnieke.
"In November verlede jaar het sy my genader om opleiding aan hulle te verskaf en sedert Maart vanjaar woel dit omtrent!" vertel hy.
Volgens Linda is die arbeiders wat deelneem aan die opleiding, baie opgewonde oor die vooruitsigte.
"Ons het soveel geleer oor kosmaak die afgelope tyd en is geweldig beïndruk met dìt wat Marvin ons tot dusver aangeleer het.
"Ek was nie voorheen juis 'n bobaaskok nie, maar hoe verder die opleiding gevorder het, hoe meer het ek dit begin geniet.
"Ons word geleer dat jy byna niks kos weggooi nie, maar dat alles in die resepte gebruik kan word. Broodkorsies wat byvoorbeeld gewoonlik in die asblik beland, word aangewend vir krummels op 'n skaaptjop," vertel sy ingenome.
Die stoof, mikrogolfoonde, braaipan en die eetgerei is alles aan hulle geskenk en nou word daar gekook en gebraai dat die sous spat.
Om hul toerusting verder aan te vul, beplan hulle om in Augustus en September spesiale etes aan te bied waar die gaste hul eie eetgerei saambring en daarna aan die kosskool skenk.
Die kursus sal na beraming vir 'n jaar duur, waarna White aan elk van die kursusgangers 'n sertifikaat sal oorhandig.
Vir nader besonderhede oor die kosskool en restaurant, bel Linda by 868-2666 of Marvin by 862-8664.
* Workers on a local farm have launched a catering business as part of an empowerment project. |
SAG op die tong, pikant in geur, watertand en smullekker is die beskrywings wat onmiddellik in jou gedagtes opkom wanneer jy weglê aan jou eerste happie van 'n gereg uit die hande van agt plaasarbeiders onder leiding van chef Marvin White op Buffet