|
DIE spreekwoord lui "vele hande, ligte werk" en dit is hierop wat die Paarl Teaterklub hulle beroep.
Dié klub benodig hande, maar ook finansiële ondersteuning, vir noodsaaklike projekte by die Ou Meulteater. Die teater het dringend 'n plafon bokant die verhoog nodig en ook 'n aantal houtpanele wat gebruik kan word as veranderbare dekor.
Die matte moet vervang word en stoorkamer kort opknapping.
Die klanktoerusting is tydens een van die onlangse reeks inbrake gesteel. Hoewel die nodige sekuriteit nou in plek is, moet die toerusting nog vervang word. Die koste is R15 000 en daar word nog planne beraam om hierby uit te kom.
Die teater beskik oor baie elementêre beligtingstoerusting wat veroorsaak dat baie topkunstenaars nie daar wil optree nie. Dit sal R25 000 kos om die ligte op te gradeer en die klub soek nou borge.
Die klub soek na mense wat met hul kundigheid kan help, soos skrynwerkers, en dan natuurlik na skenkings van sement en sementstene vir die stoorkamer, asook hout en ander materiaal.
Die voorsitter, Pieter Strümpher, kan geskakel word by tel 082-688-5424 of per e-pos by pieter@meulteater.co.za. |
