|
DIE publieke diensvlakke van wynkelders word eersdaags onder die vergrootglas geplaas by die eerste werkswinkel van sy soort wat spesifiek ontwikkel is om diens aan kelderbesoekers te verbeter.
Die werkswinkel word op 15 Oktober in die Zorgvliet Konferensiesentrum in die Banhoekvallei aangebied.
Die belangrikste kontakpunt tussen hierdie markgeleentheid en die wynprodusent is die kelder se personeel. Daar word egter dikwels min aandag aan hul opleiding en paraatheid om die toeriste en kliënte te hanteer, gegee.
Die werkswinkel sal deelnemers in kontak bring met spesialiste wat reeds bekendheid verwerf het vir hulle unieke kennis op die gebied.
Mense wat optree sluit in Katinka van Niekerk, wynkenner, dr Christa van Louw (US), dr Chan Makan, internasionaal bekende oor die problematiek van alkohol in die gemeenskap, en Theo Pegel, wynbedryfskenner, die skrywer en wingerdplaas-eienaar dr Riana Scheepers, en Riette Rust, wynskrywer.
Belangstellendes kan vir Eunice of Elma by Definitely Different skakel by 863-0397. |
