lifestyle







					Thursday: 2 October 2003


	This site will be updated on: 10 Octcber 2003 at 17:00


	Lifestyle - Leefstyl


	Dra 'n pienk strikkie Pret met blomme Spring nou vir 'n stalletjie Duitse kerkbasaar Saterdag Gereformeerde basaar

ERFENIS. Die Hawequa Jeugsentrum het Erfenisdag nie ongesiens laat verbygaan nie. Die hele week is interessante byeenkomste aangebied. Van links agter is Jumat Petersen (Hoof van die Sentrum), Ernest Loth, Sharlene Scheepers, Denver Ruiters, Thobeka Makubantu, Samson Shabangu, Jacques van Wyk, Francois.

Steenkamp en Daniel Bruintjies. In die tweede ry van voor is Chris van Rooyen (organiseerder Erfenisweek), Leroy Prince (Raka), Reagan September (Koki) en Cebu Kuhthuka. Heel voor is Jennifer Tingwe, Ishmail Hendricks, Anne Phillips, Joan Rossouw en Nomawethu Myataza.

Dra 'n pienk strikkie


	[ Top ]

OKTOBER is Borsgesondheid Bewustheidsmaand. Dra 'n pienk strikkie en sluit aan by die Kankervereniging van Suid-Afrika (Kansa) se bewusmakingsveldtogte en neem so verantwoordelikheid vir jou gesondheid.

Borskanker is een van die algemeenste kankers onder vroue. Een uit elke 36 Suid-Afrikaanse vroue sal een of ander tydstip in haar lewe borskanker ontwikkel; een in 13 vir blanke vroue, een in 81 vir swart vroue, een in 63 vir kleurlingvroue en een in 21 vir Indiër vroue.

Vroeë opsporing is by uitstek belangrik vir vroue 40 jaar en ouer: hoe ouer 'n vrou word, hoe groter word die risiko.

Kansa en Paarl Medi-Clinic bied vroue en mans die geleentheid vir gratis borsondersoeke op 16 en 21 Oktober. Kliënte sal 'n gratis borsondersoek (BSO) ontvang terwyl hulle geleer word hoe om op die regte manier maandelikse borsselfondersoek te doen.

Maak vandag nog 'n afspraak by Kansa om jou ondersoek te verseker by 864-2633 (kantoorure).

Op Woensdag 22 Oktober om 18:00 bied Kansa, in samewerking met Paarl Medi-Clinic, 'n 5 km pretstap aan wat by die Paarlse stadsaal begin.

Inskrywings begin 17:00. Inskrywingsgeld is R15 (R10 vir skoliere en studente en R15 vir volwassenes).

Pret met blomme


	[ Top ]

DIE Paarl Blommeklub is vol lentepret met foto's as inspirasie vir blommekuns by hul vergadering Dinsdagaand om 19:00 in die saal van die NG kerksaal Drakenstein in Denneburg, Paarl.

Bessie van Zyl en Pieter Coetzee lewer die demonstrasie met die tema "Myinspirasie 'nfoto". Almal kom rangskik dan, geïnspireer deur hul gunstelingfoto.

Toegangsgeld vir besoekers is R5 per persoon. Daar is ook tee en verversings beskikbaar. Skakel 872-6864 of 872-5171 vir navrae.

Spring nou vir 'n stalletjie


	[ Top ]

PLAASLIKE inwoners wat stalletjies wil hê by die jaarlikse Liggiefees in die Paarl (4 tot 6 Desember) sal moet spring.

Daar is nog net 'n paar stalletjies oor, insluitend enkele gratis stalletjies vir welsynsorganisasies.

Vader Kersfees abseil vanjaar weer by BoE bank af om die verrigtinge saam met die Burgemeester, wat ook 'n waaghalsige aksie gaan uitvoer, te begin.

Die pryse vir stalletjies wissel van R200 vir handvervaardigde produkte tot R280 vir verbruiksgoedere, R330 vir klaarbereide voedsel, R430 vir voedsel wat op die plek berei word en R500 vir woonwaens.

Doen voor die einde van die maand aansoek by die Paarl Toerismeburo (tel 872-4842/872-9376).

Duitse kerkbasaar Saterdag


	[ Top ]

SATERDAG word sekerlik vir meer as die sestigste keer by die Duitse kerk in Meulstraat, Paarl, basaar gehou.

Dis 'n koektafel wat kreun met die heerlike Swartwoudkoeke, kontinentale-styl terte en koeke, en ook "Proudly South African" gebak; dis 'n ellelange vleistafel gelaai met bratwurst, leberwurst en eg Suid-Afrikaanse vleissnitte; dis die naaldwerktafel, boeke-verhoog, plantestalletjie en baie meer.

Maar wat is 'n "Bastel-tafel"? Kom kyk en kom koop en geniet en bring die kinders saam, want daar is kinderpret, tombola, poeding, wafels en koffie en gaar bratwurst vir Mittagessen, en Bier en Bowle natuurlik vir ma en pa.

Die basaar open amptelik om 09:00, maar vanaf 08:00 sal kraakvars groente teen weggeepryse sal beskikbaar wees.

Gereformeerde basaar


	[ Top ]

PAARLIETE wat gereeld die Gereformeerde Kerk se basaars ondersteun, weet dat 'n mens veral heerlike tuisgemaakte plaaswors daar kan koop, benewens die tuisgebak en ander lekkernye.

Op Saterdag 11 Oktober is dit weer basaartyd en vanjaar vind die basaar plaas in die kerksaal van die NG Moederkerk Wellington van 08:30.

Bo-en-behalwe die bogenoemde lekkernye wat weer beskikbaar gaan wees, sal daar ook 'n kunstafel wees. Tot om 11:00 sal daar 'n stewige ontbyt teen R20 beskikbaar wees en van 11:00 tot 13:00 kerrie en rys teen R15 per bakkie.

Skakel Helene Jooste by 863-1770.

[ Top ]
Tel: (021) 871-1170 - e-mail: edit@ppost.co.za