DIT is vir my 'n riem onder die hart om te sien dat die Paarl Post 'n waarskuwing geplaas het om lesers te waarsku teen gewetenlose mense wat poste adverteer en deposito's vra voordat inligting oor betrekkings verskaf word.

Die waarskuwing verskyn by Betrekkings (no 82 in die geklassifiseerde advertensies). Dit verhoed dat mense wat nie werk het nie, nog verder in die sloot beland.

Daar behoort ondersoek ingestel te word na sekere instansies wat eintlik geen werk bied nie, maar wanhopige mense se deposito's gebruik om hulself te verryk.

Ek wil mense ook waarsku om versigtig te wees voordat deposito's neergesit word vir produkte soos wendyhuise.

As jy net 'n persoon se selfoonnommer het, en geen adres nie, moenie vir hom jou swaarverdiende geld gee nie. Dalk sien jy dit nooit weer nie.

M.A.S.

DIE afgelope vyf jaar stap ek elke oggend werk toe vanaf Bredastraat tot by Fabriekstraat en terug.

In dié kort rukkie het die sypaadjie (dis nou aan die kant van Westerman Apteek), al hoe vuiler en besiger geword. Kan die sypaadjies nie deeglik gewas word nie?

Nog 'n voorstel: verf 'n enkele wit streep in die middel van die sypaadjie met pyle links vir afgaande en pyle regs vir opgaande voetgangers soos in 'n straat.

Dit sal veral Vrydae en Saterdae baie help as daar so geweldig baie voetgangers die nou sypaadjie gebruik.

Voetganger

Ek is sedert 1987 besig met navorsing oor die Jordaan familie as deel van 'n doktorale proefskrif.

Ons staan nou by 28 050 name wat ingevoeg is in die Jordaan genealogiese register en oorweeg die publikasie van 'n boek.

Ek is besig om die laaste bietjie korrespondensie (staaltjies ens) te voeg by die name waar dit hoort.

Belangstellendes kan hul inligting op een van die volgende wyses by my kry: my tuisblad besoek (www.mjsjordaan.co.za), my 'n epos stuur (navorsing@mjsjordaan.co.za), my faks op (051) 552-1610 of 'n vraelys op my tuisblad invul om seker te maak dat hul familiegeskiedenis volledig is.

Marthinus Jordaan, Bloemfontein

I AM alarmed to see that three oak trees have now died at the entrance to the Paarl depot of the provincial road maintenance division in Southern Paarl, where they handle bitumen, tar poles and poisons. 

These trees all more or less 35 years old, form part of a healthy row of trees that have apparently somehow been poisoned by activities within the yard. 

These activities have not affected the trees for 30 years, why now? What is the cause and what about the possibility of polluted ground water? We need an explanation.

Len Raymond

We plan to replace the trees that have died.

Redaksioneel:

OM in lang rye te wag, is geen nuutjie in Suid-Afrika nie. Daarvan kan almal getuig.

Wag jy nie in 'n ry vir jou (eie) geld by die bank nie, dan is dit om jou motorlisensie te hernu of vir pille by die hospitaal.

Sommige mense leer ook nie. Dis veral sulke mense wat oor 'n paar weke weer gaan tou staan by verkeersdepartemente om hul bestuurderslisensies te laat omskakel na 'n kaartlisensie.

En dan gaan daar weer 'n geween en gekners van tande wees oor die "swak diens" van "ongeorganiseerde" munisipale werkers.

Veel simpatie van die mense wat betyds in die ry gestaan het, kan hulle nie verwag nie - nie van die owerhede nie, en ook nie van die versekeringsmaatskappye wat nou dreig om eise deur bestuurders met ou lisensies ongeldig te verklaar.

Diegene wat nog nie hul huiswerkers geregistreer het vir Werkloosheidsversekering nie, staar ook boetes in die gesig indien hulle hiermee versuim.

Mense wat egter weens hul finansiële omstandighede nie duur medisyne kan bekostig nie, het nie 'n keuse as om in lang toue by die hospitaal te wag nie.

Hierdie keer is dit nie hul eie skuld nie, maar nogtans byt hulle die spit af van die administratiewe reëlings van die staat.

Die regering sal hier sy kant moet bring, anders sal die armstes in die gemeenskap aan die kortste ent bly trek.