Thursday 4 March 2004

This site will be updated on11 March  2004 at 17:00

Nuus - News

• Oorlog oor veld
• Politieke planne verander
• Huguenot plakkers pla
• Held moes polisie self aanry
• Meisie (8) sterf voor skool
• Bome slurp stroom leeg
• Polisieman steeds in aanhouding

Oorlog oor veld

[ Top ]

Susan Botha

'n BELOWENDE jong krieketspeler lê in die Paarl Hospitaal en 'n ontstoke Bergrivier Krieketklub op Wellington is op die oorlogspad oor die haglike toestande waaronder hulle moet speel.

Die klub op Wellington het Saterdag na afloop van hul Premierligawedstryd hul ontevredenheid met die Drakenstein Munisipaliteit en Boland Krieketraad verklaar, nadat die kaptein, Charlton Manuel, sy regterenkel gebreek het.
Die 23-jarige Manuel is in die Paarl Hospitaal opgeneem, waar hy heelwat

ENKEL-AF. Krieketspeler Charlton Manuel moet wag vir die swelsel om te sak voordat sy enkel geopereer kan word.

pyn en ongemak verduur. Hy sal moet wag tot die swelsel sak voordat die enkel geopereer kan word.

"Dit sou nie gebeur het as die veld beter was nie," het hy aan die Paarl Post gesê.

Die president van die klub, Julie Abrahams, sê hulle het genoeg gehad van praat en soebat vir beter geriewe.

"Drastiese stappe moet gedoen word, almal praat en maak net beloftes, maar niks word gedoen nie.

"Ons het geen ander keuse as om die gemeenskap te mobiliseer en om in opstand te kom nie," het hy gesê.

Volgens die klub het hulle sedert verlede September nege briewe aan die Drakenstein Munisipaliteit gestuur, waarna beloftes gemaak was.

"Sommige antwoorde was dubbelsinnig en ons het by vier geleenthede gevra om met die Burgemeesterskomitee te vergader. Daar het niks van gekom nie."

Die klub voel gebelgd omdat die speelvelde erg beskadig is vanweë die talle sokkerklubs wat saans daar oefen. Sondae word daar gholf ook gespeel.

Die buiteveld is vol gate en hul klubhuis is die afgelope vyf jaar nie in gebruik nie, as gevolg van inbrake en vandalisme.

Die veld is ook nie omhein nie en mense loop bedags oor die kolfblad.

Boonop word die veld ook nie deur die Munisipaliteit versorg soos aangevra deur die klub nie.

Bergrivier beoog om Maandag 'n sportbeheerraadvergadering te belê, en plaaslike politici gaan ook genader word.

Die voorsitter van die raad, Jerry Seale, sê dit is 'n skande vir die gemeenskap van Wellington dat agtergeblewe mense ná tien jaar van demokrasie nog steeds met tweedehandse behandeling tevrede moet wees.

Hy meen dat Bergrivier as belastingbetalers op veel beter geregtig is as wat hulle nou ervaar.

"Nou gaan sport in ons gemeenskap by die dag agteruit," het hy gesê.

Die klub gaan ook 'n ontmoeting met verteenwoordigers van die ANC aanvra om die ongelukkigheid aan te spreek.

Intussen sê die Munisipale Bestuurder, Jacques Carstens, hy stem saam dat die klubhuis haglik is "omdat vandale vanuit die gemeenskap dit wat nie gesteel is nie, afgebreek het".

Hy sê volgens 'n geldige ooreenkoms is die Wellington Sportraad verantwoordelik vir die instandhouding van die gebou.

"Niks in dié verband het gebeur nie."

Volgens hom is skoliere van naburige skole 'n groot kopseer omdat hulle oor die kolfblad stap skool toe en terug.

Carstens beskryf die beskuldigings teen die Munisipaliteit en Boland Krieketraad as ongegrond.

Hy sê vergaderings met die twee partye het tussen Augustus en November plaasgevind, waar besluit is oor die opgradering van die klubhuis en fasiliteit.

"Drakenstein Munisipaliteit het 'n addisionele bedrag van R154 000 goedgekeur vir die projek, terwyl Boland Krieketraad via borgskappe R312 000 bygedra het.

"'n Besluit is geneem dat die Munisipaliteit R75 000 sal spandeer op die gebou en dat die res van die fondse benodig vir die klubhuis, van Boland Krieket sal kom.

"Die orige fondse van Boland Krieket sal vir oefennette en gesigskerms gebruik word, terwyl die Munisipaliteit die heining sal oprig."

Volgens Carstens is die projekte aan die gang en is die kolfblad en speelveld ook reeds opgegradeer.

* A cricket club blames the Municipality for the poor condition of their pitch, after an injury

SO gou as wat die politici politieke planne maak, so gou verander dit weer.

Hoewel burgemeester Herman Bailey aanvanklik tiende op die NNP se kandidatelys vir die provinsiale parlement was, het hy nou besluit om hom uit die politieke wedloop te onttrek.

Volgens Bailey lê die munisipale sfeer hom nader aan die hart, en het hy besluit om hom toe te spits op munisipale sake. Hy sal dus nie beskikbaar wees vir die Wes-Kaapse parlement nie.

Nog 'n kandidaat, dr Audrey van Zyl, wat 56ste op die DA se Wes-Kaapse kandidatelys was, het haar ook onttrek.

Sy het haar lae posisie op die lys blykbaar as 'n klap in die gesig beskou en haar lidmaatskap van die party beëindig.

Van Zyl, wat in België as geneesheer gekwalifiseer het en met 'n afgetrede Belgiese parlementslid getroud is, het haar nou aangesluit by die Nasionale Aksie van Cassie Aucamp.

Van Zyl bevind haar nou in die vyfde plek op die NA se provinsiale kandidatelys. Sy het haar lot nou ingewerp saam met Freda Adams, soos sy 'n voormalige provinsiale kabinetslid van die NNP.

Albei vroue het klagtes van seksuele teistering aanhangig gemaak teen oudpremier Peter Marais, wat ook nou sy eie party gestig het.

Oudleraar dr Kobus Victor (distriksraadslid), beklee tans die 19de plek op die NNP se nasionale kandidatelys vir die parlement. Hierdie oud-lid van die DA is tans tydelik werksaam in die kantoor van die premier as spesiale adviseur oor die burgerlike samelewing.

Ander plaaslike raadslede wat kandidate is op die NNP se nasionale lys, is Chris Leander (22ste), Bernardo Maralack (25ste) en Titus Williams (29ste). Op die NNP se provinsiale lys is Jeff Scheepers (26ste), Deon Swart (32ste) en Basil Andrews (37ste).

Die ANC se kandidatelys hou geen verrassings in wat plaaslike verteenwoordigers betref nie. Bruce Kannemeyer van die Paarl beklee die tweede plek op die provinsiale lys vir die nasionale parlement, met Lizzie Phike 21ste op die provinsiale lys. Pierre-Jeanne Gerber is 109de op die nasionale lys.

 Andricus van der Westhuizen, Stellenbosse  raadslid vir Franschhoek is 24ste op die DA se provinsiale lys.

* Drakenstein mayor Herman Bailey (NNP) has withdrawn from the election race, while DA candidate Audrey van Zyl has switched to another party.

SAKELUI in die omgewing van die Huguenot Verbypad het oorlog verklaar teen die plakkery op oop erwe en hou die Munisipaliteit daarvoor verantwoordelik.

Volgens hul regsverteenwoordiger, André du Plessis van Wellington, sal belastingbetalings weerhou word totdat die Drakenstein Munisipaliteit die probleem oplos.

Du Plessis het in opdrag van kliënte 'n dringende skrywe aan die munisipale bestuurder gerig.

"Op Erf 11430 (aan Zuidmeerstraat) is daar ongure en ongewenste karakters wat  leeglê en probleme skep soos drankmisbruik, ontlasting en urinering, asook vullis en rommelstrooiing.

"Hierdie persone hou 'n gevaar in vir die omgewing, deurdat mense gemolesteer word, asook dat inbrake gepleeg word," lui die skrywe.

"Dit is totaal onaanvaarbaar dat werkskeppende en belastingbetalende publiek wat die Munisipaliteit se koffers vul, aan hierdie tipe van nalate en gevare blootgestel word.

"Dit is ook vir ons kliënte onaanvaarbaar dat 'n nuwe plakkerskamp vorm aanneem oorkant Huguenot stasie."

Du Plessis skryf: "Die Munisipaliteit is gou om eienaars daarop te wys dat hulle moet toesien dat hul erwe skoongemaak word, terwyl die Munisipaliteit versuim om sy plig na te kom.

"Daar rus 'n regsplig op 'n Munisipaliteit om sy betalende inwoners nie ondergeskik te stel aan wettelose elemente nie.

"Indien die Munisipaliteit nie onmiddellik aandag aan die probleme gee nie, sal die nodige hofaansoeke gebring word om die Munisipaliteit te verplig om sy regsplig teenoor sy gemeenskap na te kom."

Op navraag deur die Paarl Post het munisipale bestuurder Jacques Carstens gesê Erf 11430 is 'n privaat eiendom en dat "kennisgewing op die eienaar gedien" is.

Erf 9603 regoor Huguenot stasie, is onlangs per openbare tender verkoop vir ontwikkeling as 'n besigheidsperseel.

 Dit kan tot 'n jaar duur vir hersonering, 'n omgewingsimpakstudie en oordrag.

"Die koper is verantwoordelik vir die opruim van die perseel," het Carstens gesê.

* Ratepayers in Huguenot are planning to withhold their municipal taxes until squatters have been moved.

'n FRANSCHHOEKER moes verlede week tot by die polisiestasie ry om wetsbeamptes te gaan oplaai sodat hulle motordiewe op 'n plaas kon arresteer.

Dit terwyl plaaswerkers die verdagtes moes aanhou totdat die geregsdienaars eindelik op die toneel kon aankom.

"En toe word daar nog in die Paarl Post geskryf die polisie het die motordiewe gearresteer," het die held se vrou ontstoke gesê.

"Die werkers het die vreemde rooi motor gesien en die plaasbestuurder geroep terwyl hulle die insittendes daar gehou het.

"Ons het drie keer die polisiekantoor geskakel, maar sonder sukses. Toe ry my man maar en gaan haal die polisiemanne self."

Volgens stasiekommissaris Johan Marais kon die polisie "nie onmiddellik uitgaan nie".

"Ons het net een voertuig vir klagtebywoning en dié voertuig was op 'n ander toneel besig.

"Ons wil publieke meeleweing aanmoedig en ons sê dankie daarvoor."

* Onvolledige inligting deur kommunikasiebeamptes van die polisie het tot die misverstand en weglating van die naam van die eintlike held in die arrestasie gelei.

GESKOKTE skoolkinders moes Woensdagoggend aanskou hoe 'n motor 'n meisietjie op die Noorder-Paarlpad skep, uit haar skoentjies lig en meer as 20m ver op die teer laat val.

Klein Celesté Abdol van Joubertsdalplaas het op slag gesterf.

Haar moeder, Maria Abdol, was in die wingerd besig met parswerk toe sy die skoknuus gehoor het.

Celesté is haar enigste dogter, 'n kind wat deur die onderwysers van Nieuwedrift Primêre skool as "oulik in die klas" en 'n "regte atleetjie" beskryf is.

"My kind het gister nog atletiek geoefen, en sy sou vandag nog dansies gedoen het by die skool," het die ma hartseer gesê.

Celesté word ook oorleef deur 'n broer, Jannie (21), en haar ouma Rachelle Abdol van Joubertsdal.

Onderwysers van die skool het Woensdagoggend langs die doodspad weer gepleit dat padtekens aangebring word wat motoriste waarsku dat skoolkinders die pad kan kruis.

"Daar is nie meer busse nie, en nou moet ons kinders ver stap langs die besige paaie," het waarnemende skoolhoof. Clarence Adams gesê.

'n BERGSTROOM wat hierdie somer bedags kurkdroog was, vloei weer sterk vandat 'n wattelbos verlede week teen Groenberg by Wellington uitgekap is.

Die eienaars van die plaas Foxenburg, Jan en Marianne Hemmes, het tydens die hittevlaag verlede maand besef hulle moet professionele hulp kry om hul watervoorraad te red.

Saam in die verknorsing was nog twee plase, Boplaas en 'n ander Foxenburg, wat uit dieselfde stroom bedien word.

Barry Stander, indringerdeskundige van Wellington, het die 1,8km lange kloof besoek en besef die digte bos wattelbome is verantwoordelik vir die waterskaarste.

Navorsing toon dat een volgroeide swart wattelboom tot 100 liter water per dag opslurp. Die volume water wat opgesuig word, is selfs hoër in die geval van die bloekom, wat deur die groter blare nog meer transpireer.

"Die water kom uiteindelik weer terug aarde toe, maar intussen droog die grond om die bome uit," sê plantkenner Sieg Kröger van Wellington.

Stander, sy twee seuns Paul en Jaco, en 'n span van 20 man het 'n week lank met kragsae en kapmesse die kloof al met die stroom langs skoongemaak.

Die bome is afgesaag en afgekap en die stompe met omgewingsvriendelike stowwe vergiftig.

"Teen die einde van die week het die water weer verskyn, en nou vloei dit dwarsdeur die dag en nag," sê Stander.

"Maar dit is net die begin. Dis die opvolg wat uiters belangrik is, anders mors jy net jou tyd en jou geld.

"En brand die berg, kom die wattel en die bloekom soos hare op 'n hond se rug op."

Kröger en Dries Strydom van die Paarl was altwee voorheen by natuurbewaring. Hulle is verlede jaar deur die departement Landbou aangestel as indringerinspekteurs in die Boland munisipale area.

Hulle besoek vrywillig probleemareas en waarsku grondeienaars oor die indringerplante waarvan hulle moet ontslae raak.

Strydom vertel die Zulu naam vir die bloekomboom is Puza Manzi (wat "hy drink water" beteken).

"Die blare van een volgroeide boom beskik oor 'n massiewe oppervlakte waardeur transpirasie deur die dag plaasvind," sê Strydom.

Verskillende saaddraendes veroorsaak probleme, veral aan die beskikbare watervoorraad.

In Groenberg en Bainskloof is dit veral die wattel, bloekom en hakea, terwyl die Paarlberg veral 'n probleem met dennebome en Port Jackson ondervind.

In Dutoitskloof is daar reeds groot vordering gemaak deur die staatsondersteunde Werk vir Water projek se werkspanne wat indringerplante uitkap.

Die spanne werk egter so wyd, dat die uiters noodsaaklike opvolgaksies agterweë bly, het Strydom gesê.

Die wattel se saad word nie deur die wind versprei nie, maar dit val om die bome en spoel teen die berg af. Dit is 'n groot probleem langs waterstrome.

Die denne en hakea se saad het vlerkies en word tot hoog teen die kruine opgedra.

"Dit kan duisende rande kos as die probleem groot is. As inspekteurs wil ons die besoeke gebruik as 'n opvoedingsproses. Ons kan tog nie die private persoon met 'n sweep aanvat terwyl die staat met groot gronde vol indringerplante sit nie."

Behalwe vir 'n strook staatsgrond op die kruin van Groenberg, behoort die grond teen die berghange meestal aan boere met plase aan die voet van die berg.

"Dit is so dig en so erg dat ons dalk net met 'n helikopter uit die lug die indringerplantegroei sal kan doodspuit," het 'n boer opgemerk. "Maar eers sal konsensus bereik moet word."

Die Vriende van Bainskloof vergader op 26 Mei op Wellington waartydens belangstellendes en grondeienaars welkom is om met beamptes van bosbou, natuurbewaring, plantbou en Drakenstein Munisipaliteit te praat. Navrae kan gerig word aan Kröger by 082-745-9810.

Terwyl die veldtog aan die gang is om van indringer-bloekombome ontslae te raak, het die Departement Landbou gewaarsku dat byeboerdery en die bestuiwing van boorde skade ly met die uitkapping van bloekomwoude.

Daar is ook kommer oor die brandgevaar van dennebome teen Paarlberg.

Die dennebos bokant Hoër Meisieskool Paarl behoort aan die Onderwysdepartement oorgedra, wat moet sorg vir vuurbane en om indringerplante te verwyder.

Nie net fynbos nie, maar ook Port Jacksons en wattelbome, het teen die Paarlberg opgeslaan ná die brand verlede jaar. Die Munisipaliteit het reeds kwotasies aangevra om die indringers uit te roei in hierdie gebied.

* After a dense forest of black wattle trees was removed on Groenberg, Wellington, a dry steam started flowing again.

APPèL teen die weiering van borg aan Paarl polisie-inspekteur Johan Lawrence, word vandag in die Kaapse Hooggeregshof aangehoor.

Lawrence (37), word aangehou op aanklag van moord op bewaarder Henry Andrews (40) in November verlede jaar.

Hy is ná sy arrestasie byna twee maande lank uit vrees vir sy lewe in die selle van die Franschhoek polisiekantoor aangehou.

Gedurende dié tyd, oor die feesseisoen, is hy gereeld deur sy gewese vrou, familie en kollegas besoek.

Lawrence "kan nie vir ewig in die polisiestasie aangehou word nie," het 'n woordvoerder van die Onafhanklike Ondersoekeenheid (OKD) vroeg in Januarie verklaar.

"Hy sal so veilig moontlik in 'n tronk aangehou word, maar hy moet nou geskuif word."

Lawrence is sedertdien in alleen-aanhouding. Die naam van die gevangenis mag nie openbaar word nie.

Die OKD ondersoek die saak van die skietdood van Henry Andrews op 'n sypaadjie in Paarl-Oos op 8 November verlede jaar.

Andrews, 'n bewaarder van die Hawequa Jeugsentrum op Wellington, is voor Lawrence se gewese vrou met pistoolvuur afgemaai. Die eerste skoot is in haar woning langs Meakerstraat afgevuur.

Andrews het die noodlottige Saterdag gekuier by insp Debbie Lawrence, polisiebeampte op Wellington.

Die verdagte, 'n skofbevelvoerder by die Area Misdaadbekampingseenheid in die Paarl, is minute na die voorval in die huis in hegtenis geneem.

Borg is geweier op die gronde dat 'n hofbevel Lawrence nie van besoeke aan sy gewese vrou weerhou het nie. Die getuienis dat die besoeke op haar uitnodiging was, het landdros Ben de Lange nie anders oortuig nie.

"Dit is duidelik dat hy nie die hof se bevele nakom nie. Borg word dus geweier," het De Lange gesê.

Volgens sy regsverteenwoordiger, sarien Engelbrecht, bring adv Sakkie Maartens van Kaapstad vandag die appèl in die Hooggeregshof.

Lawrence verskyn weer op 16 Maart in die Paarl landdroshof.

[ Top ]