|
TYDENS die onlangse bekendstelling van die Fakulteit Onderwys op die Wellington kampus van die Kaapse Technikon (KTWK), het die dekaan, prof Maureen Robinson, lof gehad vir die doserende personeel van die vorige bedeling.
Die funksie het die samesmeltingsproses van verskeie onderwysinrigtings afgesluit. Die kolleges betrokke was Boland Onderwyskollege (OKB), Denneoord, Athlone, OKP (Paarl) en Sohnge in Worcester sowel as die kolleges van Graaff-Reinet en Oudtshoorn onder die vleuel van die Kaapse Technikon.
Die grootste uitdagings van die nuwe entiteit lê onder andere daarin dat die hedendaagse aanhoudende veranderinge in die skoolkurrikulum beteken dat opleidingsprogramme by KTWK konstant hersien moet word, het Robinson gesê.
Hierbenewens is daar noodsaaklikhede wat nog groter druk op kurrikulumontwikkeling plaas. Dit sluit in inisiatiewe soos nuwe vorms van gehalteversekering, die bekendstelling van remediërende programme en modulering sowel as 'n totale nuwe hoër onderwyskwalifikasiestruktuur.
Robinson het gewaarsku dat 'n tekort aan onderwyspersoneel binnekort 'n werklikheid gaan wees. Inskrywings by onderwyskolleges het oor die afgelope aantal jare drasties afgeneem.
Daar is baie redes hiervoor, waaronder negatiewe mediaberiggewing oor die professie, swak omstandighede by skole, ernstige sosiale probleme onder leerders, sowel as mededingende en aantrekliker werksopsies vir veral die swart jeug in die post-apartheid Suid-Afrika.
Ten einde hierdie probleme die hoof te bied, het sy die vertroue uitgespreek dat hierdie kampus in besonder 'n toeganklike sentrum van uitnemendheid vir almal sal wees.
* The beginning of a new era in teacher education was celebrated recently with the official inauguration of the Wellington campus of the Cape Technikon. |
TROTSE WENSPAN. Die wenspan van Hugenote Hoër, Carlien van Blerk (links) en André Coetzee (regs), het deurgedring na die eindrondte van die Rapportryers se nasionale debatkompetisie. By hulle is Louise Grobler, hul onderwyseres.