|
ELKE week word 'n bees uit die Agter-Paarl aangejaag na Mbekweni, en dis elke keer dieselfde veedief se spore, met 'n hond en twee helpers.
"Die helpers verander, maar die een spoor bly dieselfde," sê Tikkie Briers-Louw, die boer op wie veediewe verlede week met pistoolvuur losgebrand het.
Waar die Fries-os Woensdagnag op sy plaas Caledonville regoor Boland Landbouskool vasgekeer is, het dit gelyk asof skaap geslag is - die ene bloed.
Die omheiningsdraad is geknip en die hout-stutpale afgebreek om die os mak te slaan. Skerppunt-slagtersmesse is gebruik om hom in sy boude te steek sodat hy sou bly loop.
Sekuriteitsman Freek Diedericks het opgemerk dat drade geknip is en hy en Briers-Louw het die spoor gevat tot in die Bergrivier, meer as 20km van die plaas.
Toe Briers-Louw om 02:00 'n flits tussen die digte bosse op die veediewe en die os in die rivierloop skyn, het die skote dadelik geklap.
Briers-Louw moes koes tussen die koeëls.
Die veediewe het die bebloede dier gelos en spoorloos verdwyn. Uit die rivier is dit net 200m tot in die digte plakkersgebied van Mbekweni.
"Die polisie help ons baie, en het al arrestasies gemaak, maar ons kan nie die diewe keer nie. Vandat die veediefstaleenheid ontbind is, is die lede met ervaring ook weg," sê Briers-Louw.
Hy verduidelik hoe die beesstelers om middernag toeslaan, en veral op 'n Woensdag- of Donderdagnag - vir die naweek se slag.
Een van die diewe loop voor met 'n draadknipper, en breek vir hulle 'n pad oop deur plaaskampe.
Van plase noordwes van die R44 word beeste meestal naby Nelson's Creek deur groot stormwaterpype onder die teerpad gedruk, en deur olyfboorde aangejaag tot by die Malmesbury-Wellington kruising waar die Noord-Agter-Paarlpad gekruis word.
In die omgewing van die plaas Breezy Hills, waar die Bergrivier op sy vlakste is, word die beeste deur die rivier gejaag.
Beeste uit Paardeberg, Windmeul en tot by die Durbanville afrit uit die Agter-Paarlpad, verdwyn na die potte van Mbekweni.
Boere in die Agter-Paarl wat nader aan die N1 geleë is, verloor hulle beeste aan Bloekombos.
"Hierdie week is dit 'n os van R2500, volgende week is dit 'n stoetkoei van R8000, en so gaan dit aan," sê Briers-Louw moedeloos.
Hy het verlede jaar 14 beeste verloor, en vanjaar is kampdrade al vier keer geknip. Op die aanjaagpad kan tot 50 drade in een nag geknip word.
Frieskoeie is gewild onder veediewe, omdat hulle makliker gevang word as Brahmane.
Die jong os het hy verlede week teruggekry, maar moes R500 aan veeartskoste betaal om die dier te red. Einde verlede jaar is 'n dragtige koei uit die veld op Caledonville gesteel.
"Sy was na die ure se aanjaag so makgeslaan toe ons haar teen Mbekweni in die Bergrivier gekry het, dat ons haar aan 'n dun toutjie kon uitlei."
* Thieves are stealing and herding cattle from Agter-Paarl to Mbekweni. |
