Nuus - News

• Dwelmslag
• Inbrekers geteiken
• Beesdief buit kwyt
• Daar is hoop vir grondeisers
• Vra is vry en weier ook...
• Sous kool nie werd

DIE Paarlvallei is "vrot van die dwelms" en ouers wat glo die strate en skole is veilig, lewe in 'n gekkeparadys.

Só word gewaarsku nadat drie heroïenverkopers verlede week in die Paarlse middedorp in hegtenis geneem is.

Die naweek is smokkelhuise en wonings deursoek en is beslag gelê op 'n reuse hoeveelheid dagga, tik, Mandrax en Crack.

Twee ongelisensieerde vuurwapens asook gesteelde selfone, klanktoerusting en kraggereedskap is saam met die dwelms ontdek.

Die heroïenverkopers, Tanzaniërs wat in die Paarlse middedorp woon, is in Lady Greystraat in hegtenis geneem nadat die polisie inligting ontvang en 'n lokval gestel het.

By een van die mans is tien gram heroïen vir R1 400 aangekoop. Nadat die dwelm vir toediening voorberei is, kan dit vir meer as R5 000 herverkoop word.

Die smokkelaar is in hegtenis geneem, het skuld erken en word nou in die Allandale gevangenis aangehou. Die ander twee mans het skuld ontken en bly verhoorafwagtend in die gevangenis.

"Dis onrusbarend hoeveel vreemdelinge woonstelle in die middedorp betrek het," het Paarl stasiekommissaris snr/supt Paul Marais gesê.

"En hoe dwelmverkopers op die strate beweeg en transaksies in parkeerareas en toilette beklink.

"Dit is die realiteite. Ouers moet régtig seker maak dat hulle weet waar hul kinders verkeer.

"Wanneer ons inligting ontvang word daar opgetree, en met groot sukses" het supt Marais gesê,

"Ons kan egter net met inligting optree."

Oproepe aan Supt Marais en kapt Aubrey Marais (807-4000) sal vertroulik hanteer word.

Saterdagaand is vier tienermeisies en 'n seun in die polisieselle aangehou nadat dwelms in hul besit in Courtrai gekry is.

Gareth Whelan (19) van Walderstraat, Paarl het buite 'n motor aan die Taalmonumentpad gestaan toe lede van die polisie se area-misdaadvoorkomingseenheid die jeugdiges oor drinkery aangespreek het.

Die sakke van die meisies in die motor is deursoek en beslag is gelê op dagga en wit kristalle, vermoedelik die nuwe dwelm, tik.

Ondersoek word ingestel nadat vyf jongmense onlangs 'n egpaar in Vrykyk aangeval het.

Die inwoner van Skakelstraat is met 'n mes in die rug gesteek toe hy en sy vrou die nag die groepie op die park voor hul woning probeer stilmaak het.

Die verdagtes was vermoedelik onder die invloed van dwelms, het Vrykyk Buurtwag-koördineerder Cornelius le Roux gesê, maar is nie deur die polisie deursoek nie.

Nadat die polisie vertrek het, het Le Roux self op die dagga afgekom.

'n Saak van poging tot moord word ondersoek. Daar moet vasgestel word watter een van die vier seuns - drie is plaaslike skoliere - die messteker is.

* Police have arrested three men for selling heroin in Central Paarl and have appealed for information to be able to flush out other drug dealers.

PAARLIETE word geteister deur Kaapse inbrekers wat per trein hierheen reis en soggens in die woonbuurte ronddwaal en werkende mense se huise plunder.

Sodra hulle die buit het, klim hulle weer op die trein en ry terug na Bloekombos en Khayelitsha.

Hierdie inbrekers, asook plaaslike jeugdiges, sorg vir die toename in inbrake wat Paarlse inwoners en eienaars van besighede rasend het.

Die polisie het verlede maand 35 verdagtes in hegtenis geneem.

Ná 'n optrede verlede Woensdag waar verskeie "belhamels" in hegtenis geneem is, was daar twee dae lank geen enkele huisbraak aangemeld nie, sê Paarl stasiekommissaris snr/supt Paul Marais.

Die res van die naweek is daar sewe inbrake by die polisie aangemeld.

Vrydagnag het inbrekers by MTN aan die Hoofstraat telefoonkabels gesny en ongemerk veiligheidstralies voor die venster weggeruk om in die kantoor te kom.

Kontant en twintig selfone, 'n langverwagte bestelling wat die middag aangekom het, is weggedra.

Die alarmstelsel word nou met 'n addisionele radiosein opgradeer.

Volgens die polisie is rekenaars uit besighede ook hoog op die prioriteitslys van inbrekers.

De Zoete Inval, Vrykyk en Courtrai is die buurte waar wonings erg deurloop.

Inwoners van Vrykyk is gemaan om op die uitkyk te wees vir 'n frisgeboude verdagte man met swart gelaat, 'n dik bos hare en geklee in 'n blou werkerspak.

* Burglars travelling by train are hitting neighbourhoods near Paarl station.

'n BEESDIEF is verlede week op heterdaad betrap toe hy met 'n gesteelde os die Bergrivier by Mbekweni wou oorsteek.

Die arrestasie is gemaak deur  die Agter-Paarl Plaaswag en hul spoorsnyers wat die nag tussen die ruie bosse op die rivieroewer gewaak het.

Die bees is die nag 23:30 op Tikkie Briers-Louw se plaas Caledonville in Agter-Paarl gesteel.

Drade op meer as  vier plase is geknip terwyl die bees die byna 20km deur plase, oor die R44, die Noord-Agter-Paarl pad en tot by die river gejaag is.

"Daar het hy in ons vasgeloop," het 'n tevrede plaaswagkoördineerder Marius Jacobs gesê.

"Ons het geweet dat daar twee Woensdae na mekaar gesteel is, en met die volmaan was die kanse op diefstal goed.

"Ons is dankbaar dat ons sukses behaal," sê Jacobs,"en dat die groot Fries-os veilig terug is.

"Die polisie het ons ook gelukgewens en bedank vir die hulp om veediewe agter tralies te kry."

Die verdagte, inwoner van Drommedarisstraat plakkerskamp, bly in aanhouding.

Wellington

* Cattle thieves are being rounded up in Paarl while Wellington farmers suffer at the hands of sheep thieves.

DIE gemeenskapseis vir huurders wat ingevolge die Groepsgebiedewet van Paarl-Sentraal na Paarl-Oos en Mbekweni verskuif is, nader nou voltooiing.

President Mbeki het onlangs aangekondig dat die Kommissie op Herstel van Grondregte alle eise voor Desember 2005 moet afhandel.

Die Kommissie is op die oomblik besig met 'n verifikasieproses om te bepaal watter persone almal deel vorm van 'n spesifieke eis.

Die Wes-Kaapse Kommissie beoog om hierdie veldtog te voltooi teen Oktober vanjaar.

Die verifikasie (kontrolering) van die "Paarl African and Coloured Community Project" is einde verlede jaar aan 'n onafhanklike organisasie gegee om te voltooi.

Die werk is egter nie deur die diensverskaffer voltooi nie en die Kommissie sal dit nou self moet doen.

Die Kommissie het reeds 'n interne span aangestel om die verifikasie van die sowat 3000 eise te finaliseer.

Die plaaslike komitee wat gehelp het om uitstaande dokumente te bekom, sal weer die kommissie bystaan en eisers kan verwag om weer gevra te word vir uitstaAnde dokumentasie.

Dit sal dokumente wees soos geboorte-, trou- en sterftesertifikate, wat moontlik reeds aangevra is deur die vorige organisasie wat die verifikasie gedoen het.

Die kommissie en die komitee doen 'n beroep op die eisers om geduldig te wees met hierdie proses en om saam te werk met die komitee en personeel van die kommissie wat die dokumentasie sal aanvra.

Die kommissie sal help met die nodige infrastruktuur en hulp om die proses te vereenvoudig en te verkort.

Die uitstaande dokumentasie sal gedurende Augustus ingesamel word en in September sal gemeenskapsvergaderings gehou word, asook werkswinkels oor die verskillende opsies.

Eisers kan dan hul finale dokumentasie inhandig en die nodige vorms invul waarin hulle aandui of hulle grond of finansiële vergoeding wil hê.

'n Lys van eisers en begunstigdes is reeds saamgestel en sal later beskikbaar gestel word vir eisers om te verseker dat hul besonderhede korrek is.

Geen nuwe eise sal deur die kommissie aanvaar word nie.

Mense kan Jenny Williams by die KommiSsie skakel, tel 426-2930 x310.

Enige vordering met die proses sal deur Paarl Post en die gemeenskapsradiostasies aan eisers oorgedra word.

Die Kommissie beoog om hierdie eise te voltooi voor die einde van vanjaar.

Mense wat nie vir die herstel van grondregteprogram kwalifiseer nie, moet die Departement van Grondsake bel op (021) 426-2947.

Hulle grondbehoeftes kan miskien onder die Departement van Grondsake se twee andere programme geakkommodeer word (die Grondherverdelingsprogram en die Versekering van Eiendomsregprogram).

Die Kommissie beplan om alle grondeise teen die einde van 2005 af te handel en het tot dusver 48 825 grondeise afgehandel teen 'n koste van meer as R3 miljard. Vir meer inligting, besoek die webeerf land.pwv.gov.za.

* Local land claimants OUL expect payouts within the next six months.

VRAE bly maar 'n tameletjie in die Drakenstein stadsraad, veral as die heersende ANC/NNP koalisie ingevra word deur die DA.

Gereeld is daar klagtes rondom wanneer 'n vraag gestel mag word, waar dit gestel mag word en wie dit gaan antwoord - of dalk glad nie...

Ná hewige debatvoering, briefwisseling en gesprekke buite die Raad, is daar ooreengekom oor 'n aanvaarde prosedure om vrae op die Raadsagenda te kry.

Maar die einde van die probleme is dit nie, want soos die oumense altyd gesê het: "Vra is vry, en weier daarby".

Nie dat die antwoorde werklik geweier word nie, dit is meer die manier waarop dit gegee word.

Só het die DA in Dinsdag se raadsvergadering verskeie vrae gestel rondom voltydse raadslede en meer spesifiek voltydse raadslid Arthob Petersen, wat ook deesdae bestuurder van die SA rugbyspan is.

Die vrae is ingedien deur raadslid Deetlefs du Toit (DA) en die antwoorde is mondeling verstrek deur uitvoerende burgemeester Herman Bailey (NNP).

Vra die DA: "Is hy (Petersen) nog op die betaalstaat (of met langverlof) van die relevante onderwysdepartement?"

Die burgemeester antwoord kort en kragtig: "Nee".

DA: "Ontvang raadslid Petersen ook vergoeding van die betrokke rugbyliggaam vir die dienste wat hy tans aan sodanige liggaam lewer?

Burgemeester: Raadslede moet jaarliks 'n verklaring indien waarin hulle enige vergoeding wat hulle ontvang buite die raad, moet aandui. Ek het nie insae in ander raadslede se verklarings nie.

DA: "Het die Burgemeester enige poging aangewend om die inligting waarna in die vorige twee vrae verwys word, te bekom?"

Burgemeester: Dit is nie ter sprake nie.

DA: "Sedert raadslid Petersen se aanstelling as voltydse raadslid, verneem die DA graag of hy  voltydse dienste gelewer het?"

Burgemeester: Ja.

DA: "Is daar enige rekord of boekstawing wat die tyd wat hy (raadslid Petersen) diens verrig het as voltydse raadslid aantoon?

Burgemeester: Nee, hierdie is verantwoordelike mense en 'n mens kan van hulle verwag om verantwoordelik op te tree.

DA: "Indien daar nie so 'n rekord of boekstawing is nie, hoekom is dit nie ingestel nie, veral na aanleiding daarvan dat op vorige vrae in die Raad en skrywes in hierdie verband tot hede nog geen bevredigende antwoord ontvang is nie?"

Burgemeester: Is reeds geantwoord.

DA: "Wat is die situasie met betrekking tot raadslid Petersen se munisipale toelaes terwyl hy voltyds besig gehou word deur die betrokke rugbyliggaam?"

Burgemeester: Ek is nie bewus van ander voltydse werk nie.

DA: "Is raadslid Petersen versoek om enige addisionele vergoeding bo en behalwe sy raadstoelaes in die munisipale rekeninge te stort?"

Burgemeester: Hierdie hou verband met die vorige vraag en daarom is dit irrelevant.

DA: "Indien 'n persoon soos raadslid Petersen se aandag voltyds elders is, kan sodanige persoon nog op voltydse basis vergoed word, en indien wel, op watter basis kan dit geregverdig word?

Burgemeester: Hy het 'n skrywe ingedien om te vra vir afwesigheid.

Die DA wou ook weet oor die ander voltydse raadslede: "Watter stappe is geneem om te vergewis of hulle voltydse dienste lewer en nie botsende belange het nie?"

Burgemeester: Die antwoord is dieselfde as in die geval van raadslid Petersen.

Nog was die DA se vrae nie klaar nie. Raadslid Du Toit wou weet van verskeie vrae wat reeds sedert Oktober verlede jaar onbeantwoord is.

DA: "Raadslede sal seker saamstem dat daar 'n onbehoorlike tyd verloop het sedert Oktober/November 2003 toe verskeie vrae in die Raad gestel is. Tot op datum is geen antwoorde op sodanige vrae ontvang nie.

"Dit is onbehoorlike optrede of nalate om nie op vrae te antwoord wat behoorlik ingevolge die Ordereëls van Raadsvergaderings gestel is nie."

Hierop het die Burgemeester weer eens kort en kragtig geantwoord: "Ek het deur die stukke gegaan en kon net twee essensiële vrae kry.

"Die een handel oor die skootrekenaars en die tweede oor die tolhek. Oor die tolhek het die raad sy standpunt duidelik gestel.

"Wat betref die skootrekenaars: die munisipale bestuurder ondersoek die saak en volgens wat ek verstaan, is 'n ondersoekspan reeds aangestel. Intussen is die saak sub judice."

Vir raadslede wat nie meer kan onthou nie, en die publiek wat nie weet nie: Die skootrekenaars is die netelige kwessie van die 23 rekenaars wat verlede jaar vir raadslede en amptenare aangekoop is sonder behoorlike magtiging.

Die tolhek waarna verwys word, is die beoogde nuwe tolhek op die N1. En net in geval iemand vergeet het, Drakenstein was gekant teen sodanige tolhek.

Hoewel die vrae "beantwoord" is en al hierdie sake nou van die Raadstafel gevee is, sal belastingbetalers die hantering dalk nie as bevredigend beskou nie.

Word minderheidspartye, en daarmee ook minderheidsgroepe in die gemeenskap, met die respek en waardigheid behandel waarop almal in Suid-Afrika aanspraak kan maak onder die Grondwet?

HY kan nie langer so aangaan nie. Stelery en vandalisme op sy groenteplaas, en moordenaars met opgeskorte vonnisse wat sy arbeiderswonings beset, raak vir 'n Agter-Paarl boer eens te veel.

Louis Kirsten boer al 17 jaar lank op sy plaas Die Eike, en het 65 hektaar onder groente wat  landwyd in supermarkte verkoop word.

Verlede week het arbeiderskinders skade van meer as R20 000 aangerig toe hulle gerekenariseerde besproeiingstoerusting in die groentelande stukkend geslaan het.

"Ek kan net dankbaar wees dat dit nie 'n somermaand was nie, en dat die onderdele beskikbaar was. Selfs net een dag sonder water sou die einde van die oes beteken het," het Kirsten gesug.

Lede van die Agter-Paarl Plaaswag het dieselfde dag nog die kleinspan aangekeer, maar om hulle aan die polisie te oorhandig het nie veel vrugte afgewerp nie.

Die volgende dag was die kinders - tussen die ouderdomme 9 en 13 - weer terug op Die Eike en op die buurplaas Bordeaux, in die sorg van hul ouers.

"Ons het al soveel sake by die polisie aangemeld waarvan niks gekom het nie, dat ek nou nie eens meer alles aanmeld nie.

"Daar is al bondels drade van die rekenaartoerusting uitgeruk en afgesny en gate is in die kunsmistenks gekap sodat honderde liters kunsmis in die grond uitgeloop het.

"Die booswigte is elke keer minderjarige kinders."

Die afgelope twee jaar is daar 18 keer gepoog of geslaag om in Kirsten se plaaswoning in te breek.

Die huis is nou soos 'n tronk beveilig met alarmstelsel en traliewerk en steeds probeer die diewe inkom.

"Daar word nie besef hoeveel geld 'n mens verloor nie, en hoeveel frustrasie ons deurgaan nie," het Kirsten gesê.

Daar was altyd enkele gevalle van inbraak en diefstal, sê die plaasbesturder Gordon Wilcox, maar die afgelope twee jaar is dit onuithoudbaar.

Honderde koolkoppe word in 'n enkele nag gekap en weggesteek om later onwettig verkoop te word.

"Die grootste probleem vir die boer deesdae is egter die werkers wat afgedank moet word en dan in die huise aanbly sonder dat ons hulle van die plaas kan afkry.

"Ons kan tog nie 'n trekkerbestuurder aanhou wat skuldig bevind is aan dronkbestuur nie, of 'n man wat van moord op 'n medeplaaswerker 'n opgeskorte vonnis gekry het en steeds hier bly woon nie.

"So 'n jaar gelede het ek al besef ek kan nie verder nie. Ek het die saaimasjiene weggepak en vir twee maande nie geboer nie.

"Toe het die arbeiders gebid en gesoebat en ek het maar weer gesaai dat hulle kan werk en ons almal 'n inkomste kan hê."

Marius Jacobs van die Plaaswag skryf baie van die misdaad toe aan 'n smokkelhuis op 'n plaas in die omgewing.

"Toe Louis in 1987 hier begin boer het, was die smokkelhuis al daar. Die polisie kan niks aan die probleem gedoen kry nie, al word daar onwettig drank, dagga en Mandrax verkoop."

Verlede jaar was daar twee moorde op Die Eike.

Kirsten sê hy kan 'n R2 miljoen was- en pakmasjien aankoop en so 60 mense vervang.

"Maar wat word van die werkers? Daar moet tog 'n ander oplossing wees."

* Burglars and vandals might drive a Paarl farmer to close down his big vegetable operation.

[ Top ]

[ Top ]

[ Top ]