STRONG eastern off-shore winds and choppy sea conditions set the scene for great action and excitement this weekend at the national inflatable boat racing competition that took place at Nahoon, East London.

A group of 28 competitors from across the country competed for top honours in two classes, chasing points for the national log.

The Capetonians managed a clean sweep of the Standard class, while East London dominated the Blue Print class.

Navigator Carlo Thiart from Paarl and pilot Jaco Visser managed an overall 5th place in the standard class after the two day event. This places them 7th on the national Surf Circuit log.

Other local racers were Malcolm Hazelhurzt (Paarl) and Wessel Fourie (Wellington) who finished 13th and Lambert Smith and David Hazelhurst both from Paarl who crossed the line in 15th place.

This was the final opportunity for teams to prepare for the ultra-endurance Trans Agulhas race that will take place from 28 December to 1 January.

It extends over a distance of more than 1 000 kilometres along the coast from Plettenberg Bay to the Strand. Some 60 boats are expected to take part.

ONDANKS onplesierige weersomstandighede het die Paarl Kushengel-klub die tweede ligabyeenkoms op Struisbaai gewen met 'n paar groot byte.

Op 'n dag wat 20 haaie tussen sowat 80 hengelaars opgelewer het, was Len Burger van die Paarl se A2 span die beste Paarl hengelaar wat algeheel tweede gekom het.

Burger se grootste vangs was 'n skeurtandhaai van 45kg. Al die haaie is oudergewoonte weer terug in die see geplaas.

Ander Paarl hengelaars wat ook goed gevaar het, was Bernard Kramer met twee sloephaaie van onderskeidelik 16,5kg en 15kg, Arno Dames het een sloephaai en twee gestreepte kathaaie gevang (10,5kg, 5kg en 4kg), Jacques Malherbe en Stefaan Steyn elk met 'n skeurtandhaai van 15,5kg en 11,5kg onderskeidelik terwyl Johan la Grange twee gestreepte kathaaie gevang het wat die skaal op 4,5kg en 5,5kg te staan gebring het.

Die Paarl hengelklub wens sy lede geluk wat in Boland se verteenwoordigende spanne gehengel het met die jaarlikse merk- en vrylaat-toernooi op Struisbaai.

Die twee Boland spanne - die A-span en ontwikkelingspan - het onderskeidelik tweede en derde plekke behaal.

DIE lang somersdae en die jaar wat einde se kant toe staan, gee alle fietsryers die geleentheid om langer tye in die saal deur te bring, ter voorbereiding op die Paarl Post Wynroete Prettrap wat vroeg volgende jaar gehou word.

Die dag bied iets vir almal, van bergfietsryer tot padspesialiste met keuse van 'n lang of kort roete.

Die prettrap sal vir die vierde keer deur die Paarl Rotariërs aangebied word op 25 Januarie.

Die korter bergfietsroete van 22km strek al langs die Jan Phillips bergpad tot by die Afrikaanse Taalmonument en terug.

Die meer uitdagende 38km bergfietsroete gee ryers die kans om die natuurskoon ten volle te geniet en loop deur die Paarlberg Natuurreservaat.

Gevestigde padfietsryers kan hul regmaak vir die 78km wedren wat om 06:30 by die Markstraatbrug wegspring. Die roete strek oor Klapmuts, Stellenbosch, Helshoogte, Simondium en terug na Suider-Paarl.

Diegene wat egter nie hiervoor kans sien nie, kan om 07:05 regstaan vir die 38km prettrap.

Inskrywings per pos moet voor 14 Januarie aan Die Paarl Rotariërsklub, Posbus 26, Paarl 7622 gestuur word. Vir meer inligting skakel Luc of Marcia by 863-3333. 

'n VERWOESTENDE boulaanval deur Wellington se eerste krieketspan het hulle Saterdag vir Coronations op Pniel uit die water geskiet.

Coronations kon slegs 85 aanteken danksy die akkurate boulwerk van Ryan Groeneveldt (5/16) en Piet Koen (2/4).

Die tuisspan self het met die bal ingeklim, maar hul telling was net te klein om suksesvol te verdedig. Wellington bereik die vereiste 86 lopies met 6 paaltjies plat.

In skerp kontras het Wellington II tuis op Pen Basson teen 'n verswakte Van der Stel 'n reuse telling van 400/3 gemoker.

Die manne van Stellenbosch se vertoning in die veld was power met verskeie vangkanse wat verbrou is.

Dit is iets wat hul later berou het toe Jaco Conradie op 0 misgevang is en aangegaan het om 140 van 82 balle aan te teken wat 10 sesse en 14 grenshoue ingesluit het.

Richard Bennett was goed op dreef toe hy die veld moes verlaat weens 'n besering. Sy 120 het 15 grenshoue ingesluit, met Nickus Bergh wat 'n ses en 10 grenshoue gemoker het vir sy bydra van 76.

Van der Stel was nooit opgewasse vir die groot totaal wat hulle moes jaag nie en teken slegs 99 lopies aan.

Leon Labuschagne (3/22) en Morné Sadie (2/20) vaar die beste van die Wellington boulers.

* 'n Verbete poging met die bal het Paarl-Oos se eerste span gehelp om die wolwe van die deur weg te hou in hul wedstryd teen Young Peoples I op Daljosafat.

Die besoekers kolf eerste en danksy 'n goeie beurt deur Dominique Daniels (70) en 'n ewe goeie vertoning deur Randall George (39) teken hulle 187 aan.

Die Boland en Suid-Afrikaanse snelbouler, Charl Langeveldt, het die paaltjies vir Peoples ingeoes met syfers van 4/41. Hy is ondersteun deur Hubert Ontong (2/37).

Peoples was op 141/4 gerieflik op pad na 'n oorwinning totdat Elroy Abrahams (6/53 in 22bb) die middelorde aan skerwe geboul het.

Elrich Jansen (40), Stanton Kamalie (29) en Roswin Jephta (26) het lyf aan die Peoples se beurt gegee, maar die tuisspan kon net nie die knoop deurhak nie. Hulle staak op 173/9 en die wedstryd eindig onbeslis.

Peoples I speel Saterdag weg teen Wellington. Paarl-Oos I speel tuis teen Van der Stel I en Paarl weg teen Vredenburg/Saldanha.

Peoples se tweede span het op Kraaifontein 'n goeie oorwinning behaal.

Die tuisspan word vir 'n goedkoop 110 lopies uitgehaal, met Edwin Jacobs (4/23) en Tom-Ross Fortuin (2/26) wat die skade aanrig.

Wade Anderson met sy 43 lopies het die Peoples se kolfbeurt gelei en die besoekers gehelp om die wenlopies te slaan met slegs drie paaltjies plat.

Die derde span was ook Saterdag terug op die wenpad, toe hulle Spes Bona II op Daljosafat verniel het.

Spes Bona word vir 'n skamele 94 uitgeboender, met Marlin Carolissen (2/4), Malcolm Wilson (3/31) en Ricardo Kermis (2/54) wat hul kolwers se taak vergemaklik.

Peoples haal die teiken van 97/4 maklik, met Mark Moses (41) aan die spits.

DIE toeskouers was wel min, maar die 37 fietsryers se aksie op die baan het die eerste aandbyeenkoms in die Paarl beslis die moeite werd gemaak.

Jaers van o.12 en o.14 tot by die ope-afdeling het elke nommer met mening aangepak.

Hoewel Garth Thomas (Rhadsport) en Ashley Kulsen (Paarl) in al die die senior wedrenne onderskeidelik eerste en tweede geëindig het, moes hulle hard werk om die aanslae van die junior ryers af te weer.

Nolan Hoffman, seker een van die belowendste junior ryers in die Boland, het in die 1500m en uitvalwedren derde geëindig en is in die hoofwedren oor 10km net-net deur Lorenzo Cupido geklop om die derde plek.

Die Kaapstadse ryer, Stephan Lombaard van CVT, het in die o.16 afdeling skoonskip gemaak en aldrie sy wedrenne gewen, terwyl die talentvolle Réniell Matthysen van Paarl Fietsryklub in die o.14 afdeling alleen oorheers het. Albei dié jaers het gewys dat hulle nie bang is om aggressief te ry en die wedrenne van voor af aan te pak nie.

Dit was dus geen verrassing dat Matthysen in die gekombineerde 5km onder die meeste o.16 ryers uitgejaag het nie. Hy het tweede geëindig met Lombaard in die eerste plek.

Dit blyk dat die koeler aandtoestande die ryers pas, met die wedrenne wat in vinnige tye afgelê is. Ter illustrasie is die 1500m vir seniors in 'n haastige 2 minute 3,75 sekondes voltooi.

Met die soort aanvallende fietsry wat Vrydagaand opgedis is, en met nog groot name wat gaan deelneem, kan toeskouers met groot entoesiasme uitsien na die Paarlse Gesinsdagbyeenkoms en Yorkshire se Grand Prix byeenkoms op 1 Januarie.