HEELWAT rugbyklubs het die naweek litte begin losmaak vir die komende seisoen deur 'n paar vriendskaplike wedstryde te speel.

Die spelers van Newtons Rugbyklub het Saterdag hul stewels begin uittrap in 'n wedstryd teen Paarl Rugbyklub.

Die wedstryd wat in snikhete op die Boy Louw veld gespeel is, het goed vir die Paarl begin, wat eerste punte aangeteken het.

Paarl se agsteman, Werner Visagie, het gedruk met skrumskakel Jacques Hendriks wat met die doelskop slaag.

Newtons het kort daarna teruggeveg, met twee onverdoelde drieë deur Gamian Poggenpoel (senter) en Renferd Dazel (losskakel) wat die rustydtelling op 10-7 te staan gebring het.

In die tweede helfte het die hitte en fiksheidspeil van die spelers sy tol begin eis, met hanteerfoute en slordige spel wat kop begin uitsteek het.

'n Goeie stukkie spel deur Newtons skrumskakel, Rod Claasen, het uitgeloop op 'n drie deur die slot, Jerome Hendricks. Dazel verdoel en Newtons wen 17-7.

Newtons speel Saterdag weg teen Tulbagh.

Oorgretigheid het Rangers die naweek sy wedstryd teen Laer Paarl gekos. Die agterlyn se onvermoë om die voordeellyn oor te steek, het daartoe bygedra dat Rangers se voorspelers voortdurend moes terugspeel.

Teen rustyd het Laer Paarl 17-3 voorgeloop, met goeie samespel tussen voor- en agterspelers wat die wedstryd in hul guns laat verloop het. Laer Paarl se verdediging hou en hulle wen 23-10.

M Adams druk Laer Paarl se twee drieë, met D Daniels wat met twee doelskoppe en drie strafskoppe slaag.

Jonathan Philander druk vir Rangers terwyl Mark Adams met 'n doel- en strafskop slaag.

Saterdag speel Rangers weg teen Kylemore. Vervoer vertrek om 12:30 vanaf Groenheuwel.

Die Young Peoples rugbyklub het sy seisoen op 'n hoë noot afgeskop toe hy Saterdag op Daljosafat die Superliga-span van Bellville/Tech met 31-24 ore aangesit het.

Die Tiere het vyf drieë in die wedstryd gedruk.

Die besoekers se groot pak voorspelers het aanvanklik die skrums en lynstane oorheers.

Die tuisspan het met sy fiksheid en balbesit beïndruk, met die spoed van die agterlyn wat veral in die tweede helfte te veel was vir die manne van Bellville.

Drieë vir Peoples is gedruk deur die vleuels Hugan Andersen en Charles Booysen, senter Donnie Pietersen, skrumskakel Barry Williams en Abass Hendricks. Pietersen (1) en Bernard Davids (2) het met doelskoppe geslaag.

Peoples speel Saterdag weg teen Saldanha. Die bus vertrek om 08:00 vanaf Essops Supermark.

DIE eerste wedstryde van die Nasionale Netballiga word môre gespeel.

Die Wes-Kaap Tornados, saamgestel uit die topspelers van Boland, WP en SWD, speel hulle eerste wedstryd tuis teen die Kwazulu-Natal Mermaids.

Die Tornados word as die gunstelinge beskou om die kragmeting te wen.

Sandra Conradie (hoof/hulpdoel) en Dianthea Thyssen (aanvallende vleuel) is die twee spelers van Paarl Netbalklub wat ook in die streekspan opgeneem is.

Die wedstryd begin om 19:00 in die sportsentrum van Hoërskool Paarl Gimnasium en toegang is gratis.

Die Tornados het in 2001 groot sukses behaal en is slegs in die eindstryd geklop deur die Gauteng Thunderbirds.

Die Tornados se afrigter, Bennie Saayman, wat ook die MTN Boland afrig, is vol vertroue dat haar span goed sal vaar en is tevrede met die spelers se vertonings tydens die oefensessies.

"Die Mermaids het verlede jaar onder aan die punteleer geëindig. As ons aan die begin vroegtydig ons voete kan vind, glo ek dat ons die wedstryd sal wen," het Saayman gesê.

Mabel van der Vyver (MTN Boland) voer die span aan met Bronwyn Bock (MTN WP en Protea kaptein) as onderkaptein.

TWEE fietsryers van die Paarl, Paul Minnaar en Lorenzo Cupido, neem deel aan die derde been van die vyfdaagse Pick 'n Pay Giro del Capo-fietstoer wat vandag in die Paarl begin en eindig.

Minnaar, wat vir Rhadsport ry, is deel van die SA Fietsry Federasie se Ontwikkelingspan terwyl Cupido in die Nederlandse span, Stofwolk-Acterhoek 2000, opgeneem is nadat een van sy lede siek geraak het.

Minnaar het Dinsdag in die eerste skof oor 92,4km in die Durbanville-omgewing in die tweede bondel ryers geëindig.

Cupido se toer het op 'n slegte noot begin nadat hy probleme met sy fiets ondervind het.

Allan Davis van die Mapei Quick-Step se o.23 span het die eerste skof gewen.

Die derde been begin vandag om 09:30 in Markstraat, Paarl. Die roete strek via die R303 deur Franschhoek en keer terug na Markstraat in die Paarl via die Dutoitskloofpas om 15:15.

ONDANKS 'n onbesliste uitslag teen Brackenfell, het die eerste krieketspan van Paarl-Oos Polisie dié naweek tog met sewe bonuspunte teruggekeer huis toe.

Dit beteken dat die Paarliete se kanse om hulself tot binne-in die Superliga in te speel, nog nie buite hul bereik is nie.

Brackenfell het hul eerste kolfbeurt van 64 beurte op 241/7 gesluit, wat Paarl-Oos 'n voorsprong van 9 lopies gegee het.

T Dippenaar (26) en W Freylinck (27*) het die telbord aan die tik gehou terwyl Jack Daniels (2/10) die beste met die bal gevaar het.

In sy tweede beurt het Randall George (44), Henrico Sampson (42), Dennis November (37) en Wayne Jantjies (28) vir Paarl-Oos met die kolf laat waai. Die Paarliete verklaar op 214/8 en stel die tuisspan die teiken van 224.

R Smit (5/74 in 30b) en T Dippenaar (2/55 in 15b) het die kolwers laat les opsê.

Brackenfell het die uitdaging met altwee hande aangegryp met veral A de Beer (70 3x6 5x4) en G Munnigke (55 4x6 2x4) wat veldwerkers baie werk gegee het.

Hoewel die besoekers ses paaltjies laat kantel het, kon hulle nie vir Brackenfell tot oorgawe dwing nie en die dag se spel eindig op 191/6.

Die Paarlse boulers het kwaai deurgeloop. Sean Andrews (2/50 in 8b) en Zynodean Fredericks (2/57 in 8b) het paaltjies geneem terwyl die orige twee kolwers deur uithardlope terug pawiljoen toe gestuur is.

Saterdag speel die eerste span weg teen Worcester Moslems I.

Die uitslag van die tuiswedstryd tussen Paarl-Oos Polisie II en Brackenfell II herinner mens aan die onlangse Protea slagting deur die Australiërs.

Nadat Brackenfell in sy eerste beurt op 284/6 verklaar het, het hulle vroegoggend die tuisspan vir 158 uitgehaal en so die opvolgbeurt afgedwing.

Wilfred Minnies kon net 12 lopies by sy oornag-telling van 30 bysit.

D van Zyl (5/45 in 15b), P Warnich (2/27 in 12b) en E Boonzaaier (2/42 in 13b) het onder die kolwers gemaai.

'n Tekort aan kolwers nadat twee van sy spelers nie opgedaag het nie, het Paarl-Oos se sake verder versleg. Die tuisspan teken slegs 146 aan.

Brackenfell het daarna min moeite gehad om die 21 lopies te slaan wat hulle vir 'n oorwinning gekort het.

DAAR is Saterdag behoorlik naels gekou toe HJS in 'n wegwedstryd teen SACS te staan gekom het.

Ondanks 'n doubedekte kolfblad, het die SACS-kaptein gekies om eerste te kolf nadat hy die loot gewen het.

Goeie boulwerk en wakker diens in die veld het gesorg dat SACS drupsgewys lopies aanteken.

In die 26ste boulbeurt was vyf van die tuisspan se paaltjies plat met slegs 51 lopies op die telbord. Ná 'n waterpouse het die SACS-kolwers die tempo versnel en 40 boulbeurte later het die telling op 107/7 gestaan. Die volgende 10 beurte het 45 lopies opgelewer, en SACS se beurt eindig op 152.

Christian Loubser (3/26 in 10), Vince Pennazza (3/33 in 10) en Hansie Diedericks (2/12 in 10) het die kolwers laat rondtas.

Die HJS kolwers het aanvanklik gesukkel, maar Charl de Villiers en Rentzke Smook (35) het mooi vasgeskop en die telling van 27/5 na 106/6 geneem toe De Villiers (41) net voor tee uitgegee is.

In die middagsessie het HJS moedig voortgekolf, maar met die telling op 130/8 het dinge benoud gelyk vir die besoekers. Die spanning het verder opgebou toe Johan Beukes se paaltjie kantel op 133. Maar danksy die 20 lopie vennootskap van die boulers Jan Rabie en Christian Loubser (10*) het HJS die teiken gehaal. Hul wen die wedstryd met een paaltjie.

DIE o.19A krieketspan van Paarl Gim het die afgelope week sukses behaal op die krieketveld.

  Verlede Woensdag het Gim in 'n All Gold wedstryd teen 'n sterk span van Boland Landbou Hoër te staan gekom.

Boland Landbou wen die loot en kolf eerste. Hulle stel 'n teiken van 134 lopies. Beau du Toit (3/15 in 6) spog met die beste boulsyfers.

Gim slaan die wenlopies met vier paaltjies plat.

Werner Pauw se onoorwonne 41 waarvan hy 22 in die laaste beurt gemoker het, verseker dat hy as man van die wedstryd benoem word. Jan van Zyl (33) het ewe goed met die kolf gedoen.

Gim het Saterdag 'n reuse oorwinning oor 'n Paarl gekombineerde span behaal. Gim teken 380/2 aan in 48 beurte, danksy 'n onoorwonne vennootskap van 219 lopies deur Tiaan Burger (139*) en Hendri Koch (100*). Dit was veral 'n hoogtepunt vir Koch, wat sy debuut vir die eerste span gemaak het.

Jan van Zyl (72) het in net so 'n groot mate tot die telling bygedra.

Gim volg dit op met baie gedissiplineerde boulwerk en haal 'n bedremmelde Paarl uit vir 'n skamele 63 lopies en 'n oorwinning van 317 lopies.

Gysbert van Zyl (2/4) en Harnies Hugo (2/4) het die boulaanval gelei, met Tiaan Burger wat as speler van die wedstryd aangewys is.

[ Top ]