Wednesday 7 August 2002

This site will be updated on: 15 August 2002 at 17:00

Sport

• Rekord-sege
• Gardens, Albions aan wenkant
• Paarliet rig SA-span af
• Boland Judo raap medaljes op

IN DIE GAPING. Dylan DesFountain, buitesenter van Paarl Gimnasium word genadeloos platgetrek deur twee Boishaaiers, maar nie voordat hy die bal kan uitgee aan sy heelagter, Hennie Daniller, nie. Agter kyk die binnesenter, Lochner Slabbert en die losskakel, Etienne Duvenage toe. Daniller was een van die groot gevaarmanne in Gim se agterlyn. Hy het een van hul drie drieë gedruk en 'n groot rol gespeel as baldraer in die druk van die derde drie. Foto: Leon Steenkamp

'n BETER afgeronde vertoning deur Paarl Gimnasium het Saterdag verseker dat dié span vanjaar nie net met die gesogte interskole-oorwinning kon wegloop nie, maar ook die rekordboeke herskryf het.

Gim se 15-0 oorwinning oor Boishaai was die grootste drag slae nog in die 74-jarige geskiedenis van dié tradisieryke kragmeting.

Voor dit was die wedstryde waarin die grootste punteverskille voorgekom het in 1995 toe HJS vir Gim met 17-3 geklop het en in 1981 toe Gim 12-0 gewen het.

Hoewel swaar reënneerslae Donderdag en Vrydag die rugby- en hokkievelde in moddermoerasse verander het en die netbalbane in bedrieglike glybane, kon die sowat 15 000 toeskouers Saterdag in sonskynweer aansit vir dié groot kragmeting op die Faurestraat stadion.

Boishaai het in die eerste helfte met 'n sterk wind van agter gespeel en het reeds in die eerste minute geleentheid gekry om punte op die bord te sit.

Die wind wat skuins oor die veld gewaai het, het egter Alwyn Burger (losskakel) se strafskop van vyf meter binne Gim se halfgebied net verby die regoppaal laat verbyskuur.

Daar was min te kies tussen die twee pakke voorspelers wat baie goed teen mekaar opgeweeg het, maar die Gim-agterlyn se slaankrag was net een te veel vir Boishaai.

Diep in die eerste helfte was HJS in die moeilikheid toe 'n doellose skop in die hande van Gim se Hennie Daniller beland en hy met 'n teenaanval begin het.

Die sterk heelagter en SA Skolespeler het met baie vaart en kragtige afstampe van net binne Boishaai se helfte regdeur 'n horde wit-en-blou truie gehardloop en geswenk om in die hoek te druk.

Die Boishaaiers het hierna die druk verhoog en slaag daarin om Gim in hul eie halfgebied vas te pen.

'n Strafskop het HJS se Burger 'n tweede kans na die pale gegee, maar die skop is regs verby.

Hoewel die Gimmies se losskakel, Etienne Duvenage, sy bes gedoen het om spel vanuit hul eie gebied te verskuif, het die wind lang lynskoppe bemoeilik en het Boishaai vir die res van die helfte gebiedsvoordeel geniet.

Hulle kon egter nie deur die hegte verdediging van Gim deurdring nie en rustyd breek aan met die telling op 5-0.

Vroeg in die tweede helfte kry Duvenage geleentheid om Gim se voorsprong te vergroot met 'n strafskop na die pale, maar ook hy sukkel om die kol te tref.

Hoewel Gim ook die wind gebruik het om Boishaai in sy eie gebied vas te pen, het laasgenoemde met groter sukses spel vanuit die gevaargebied verskuif.

Ná 'n strafskop 10 treë van Boishaai se doellyn bestorm die Gim-pak die doelgebied en agsteman Dirk Coetzee val oor vir die drie.

Coetzee druk dan ook Gim se derde drie ná 'n aanskoulike stukkie ondersteunende spel wat weer eens 'n sterk lopie deur Daniller ingesluit het.

Gim het tot op die einde druk uitgeoefen en HJS nooit deurkomkans gebied nie. Hulle wen welverdiend die wedstryd.

'n Gimmie wat veral met verlangende oë die aksie op die veld dopgehou het, was CP Mouton wat op linkervleuel sou uitgedraf het. Hy moes egter Donderdag onttrek weens Duitse masels. Riaan Bailey het in sy plek gespeel.

Mouton wat vanjaar in graad 11 is hoef egter nie sy ideaal om in die interskole te speel totsiens te wuif nie, en kan uitsien om volgende jaar sy merk in dié groot wedstryd te maak.

Ander uitslae: Rugby o.14C HJS wen 20-5, o.14B Gim wen 5-3, o.14A Gim wen 28-10, o.15D HJS wen 22-0, o.15C HJS wen 17-5, o.15B Gim wen 15-0, o.15A HJS wen 13-12, o.16D gelyk 19-19, o.16C HJS wen 5-0, o.16B Gim wen 9-0, o.16A Gim wen 24-6, o.19H HJS wen 12-3, o.19G Gim wen 5-0, o.19F HJS wen 3-0, o.19E HJS wen 12-7, o.19D Gim wen 10-6, o.19C Gim wen 8-5, o.19B Gim wen 8-0. Netbal o.14C Gim wen 16-5, o.14B Gim wen 20-6, o.14A Gim wen 17-11, o.16F Gim wen 26-1, o.16E wen 20-4, o.16D wen 11-2, o.16C HMS wen 21-12, o.16B Gim wen 17-13, o.16A HMS wen 21-19, o.19F Gim wen 22-0, o.19E Gim wen 17-8, o.19D Gim wen 13-9, o.19C Gim wen 15-13, o.19B Gim wen 19-12, o.19A HMS wen 24-22. Seunshokkie o.14A 1-1, o.16A HJS wen 3-0, o.18A 1-1. Meisieshokkie o.14B 1-1, o.14A 1-1, o.16E 1-1, o.16D Gim wen 6-0, o.16C Gim wen 7-0, o.16B Gim wen 1-0, o.16A Gim wen 2-0, o.19D Gim wen 2-1, o.19C Gim wen 2-0, o.19B Gim wen 1-0, o.19A 1-0. Skaak Gim wen 8, HJS wen 3. Muurbal o.19A HJS wen 9-7, o.19B HJS wen 14-4.

YOUNG GARDENS het Saterdag op die veld van Drakenstein Gevangenis voor 'n groot skare 'n opskudding veroorsaak deur die gedugte span van Korrektiewe Dienste met 13-11 te klop.

Dit was die 21-jarige losskakel, Randall George, wat onder druk omstandighede die wedstryd vir Gardens beklink het deur 'n skepdoel in die laaste minute.

Arnold Fortuin, Charles Johnson, Jacques Hendricks en Cobie Wellington het ook vir die Rose uitgeblink, terwyl Andrew Jacobs en Davey de Kock goed vertoon het vir Korrektiewe Dienste.

Benewens die skepdoel het Arnold Fortuin en Bennie Linee vir Gardens gedruk.

Carolus Strydom het vir die tuisspan gedruk, met De Kock wat met twee strafdoele geslaag het.

Albions het die naweek 'n oortuigende oorwinning behaal in sy wedstryd teen Scottsdene United.

Sake was vir die eerste 20 minute redelik gelyk, waarna Mark Kruger (losskakel) vir Albions met 'n strafskop laat voorloop.

Scottsdene antwoord kort daarna ook met 'n strafskop.

Die Paarliete pas kwaai druk toe en Yulin Claassen (flank) word beloon met 'n drie. Kruger slaag met die doelskop.

Scottsdene teken twee vinnige drieë aan en loop teen rustyd 10-15 voor.

Die Paarliete kom egter in die tweede helfte terug danksy die goeie tweedefase-spel van die vaste vyf wat vinnige besit aan die die vurige agterlyn gee.

Albions neem stelselmatig beheer oor die wedstryd en ná 'n skep- en strafskop loop hulle weer 16-15 voor.

Die span van die Paarl beklink die wedstryd toe Fadel Moerat (skrumskakel) 'n tikskoppie gee en Ashley Manuel (plaasvervanger-heelagter) op die bal val vir die drie.

Kruger slaag met die doelskop om die eindtelling op 23-15 te bring.

DIE Paarliet, Elrick Kulsen, en bekende in die SA Fietsryfederasie (SAFF) is gekies om die SA-span af te rig wat van 3 tot 12 Augustus aan die Wêreldkampioenskap vir Gestremdes in Aitenstads, Duitsland deelneem.

Kulsen, 'n onderwyser in die Paarl, is al verskeie kere in die nasionale fietsryspan opgeneem en het ook internasionaal deelgeneem tydens die isolasiejare.

Hy is tans voorsitter van die Boland Fietsryunie en dien op die SAFF se padkommissie.

Die 18-jarige Janos Plekker is een van die ryers wat in die span opgeneem is. Plekker het vroeër vanjaar van Durbanville na die Paarl getrek en ry tans vir Bellville Fietsryklub.

Volgens Kulsen staan sy span 'n goeie kans om te presteer.

"Ons het twee oefenkampe gehad, waar die manne goed vertoon het en hulle is ook nog redelik jonk. Die ryers is baie beter voorberei as ander jare," het Kulsen gesê.

Volgens hom verwag hulle die sterkste kompetisie van ryers van Australië, Tsjeggo-Slowakye en Groot Brittanje.

"Die span se grootste doelwit is om maksimum punte vir SA bymekaar te maak om te verseker dat soveel moontlik Suid-Afrikaners in die Paralimpiese Spele in Athene verteenwoordig word," sê Koos Engelbrecht, een van die spanbestuurders.

Die res van die span is: Marius Louw (Worcester), Riaan Nel (Kraaifontein), Stephan Herholdt (Vredenburg en Matie-ryer), Oswald Kydd (Kimberley) en Graham Diesel (Pretoria).

BOLAND JUDO het vanjaar sy 30ste bestaansjaar met onderskeiding gevier deur 'n bobaasvertoning te lewer tydens die SA Kampioenskappe wat in die skoolvakansie in Port Elizabeth gehou is.

Ses lede van Paarl Judoklub het aan dié prestige-toernooi deelgeneem.

Lehani Verwey het in die junior afdeling goud behaal, terwyl Riekie Basson twee silwermedaljes en 'n brons ingepalm het in onderskeidelik die o.63kg o.20, kurash o.63kg en o.63kg seniors afdelings.

Die Boland senior spanne het vanjaar een silwer en vyf goue medaljes ingepalm.

Melissa Smit en Basson, die kaptein, het aan die vrouespankompetisie deelgeneem en goud verower.

Basson was ook 'n skeidsregter tydens die toernooi. Die afrigter van Paarl Judoklub, Jan Olivier, was ook afrigter van die Boland span.

Sewe judokas van die Wellington en Bergrivier judoklubs het aan die SA's deelgeneem.

Loekie Niehaus, Willie Pretorius, Zane Oppelt en Jacques Masuret van Bergrivier Judoklub, wat ook vanjaar sy tiende bestaansjaar vier, het silwer gekry in die kata-afdelings. Niehaus het in die individuele veterane afdeling vir o.73kg goud gekry.

Rishenda Claassen en Louren Bouwer-Bosch, albei van Wellington-klub, het onderskeidelik silwer in die 40kg en goud in die 70kg afdeling gewen terwyl Justin Johannes van Bergrivier 'n silwer losgeslaan het in die 55kg groep.