Laasgenoemde gaan oor Suid-Afrikaners wat die land verlaat het en nou in Nieu-Zeeland woon, maar elke dag hul geboorteland mis.

Die Mbekweni Youth Restoration Choir jeugkoor van die Paarl het saam met Mallies die opname gemaak en musiekkenners meen dit gaan plaaslik en oorsee 'n groot impak op emosies hê.

"Ek het die liedjie al vir verskeie mense gespeel wat nou oorsee lewe en in meer as een of twee gevalle het die trane geloop.

"Wanneer mens daarna luister, voel jy sommer goed oor die feit dat jy nooit van plan was om jou land en sy mense te verlaat nie," sê Mallies.

'Daai's my kwela vir Mandela' is opgedra aan oud-president Nelson Mandela.

Dit vereer hierdie ikoon se groot rol in die reënboognasie op 'n vrolike en sentimenteel musikale manier wat wêreldwyd mense se ore sal streel.

Maar dit is nie waar Mallies se lofliedere eindig nie. Hy het Tolla se "song" geskryf kort nadat die geliefde komediant van Namakwaland, Tolla van der Merwe, 'n paar jaar gelede in 'n motorongeluk oorlede is. Mallies was gek oor Tolla.

"Tolla van der Merwe was een van die intelligentste en spitsvondigste mense wat ek nog ontmoet het.

"Die tye wat ons saam deurgebring het by verskeie optredes, sal ek nooit vergeet nie," sê Mallies.

Mallies is 'n Paarliet wat al etlike jare betrokke is in die wynbedryf en bestuur sy eie menslike hulpbronne besigheid.

Hy het ook 'n liedjie oor die Paarl se ontstaan in die koloniejare en die dorp se rol in die geskiedenis van Afrikaans geskryf.

Mallies se Radio Skoonveld CD word op Donderdag 14 Oktober by die Paarl Rugbyklub tydens 'n musiekoptrede vrygestel.

Kaartjies is te koop teen R75 per persoon en sluit 'n ete in.

Belangstellendes kan met Zinna le Roux in verbinding tree by 083-243-3405, ook vir die koop van die CD.

Dit is sy derde CD, terwyl een van sy liedjies ook deel vorm van die CD Alternatief op sy beste, 'n versameling van liedjies deur Afrikaanse liedjieskrywers en musikante soos Johannes Kerkorrel, David Kramer en Anton Goosen.

Daar is al verskeie kere in koerante en tydskrifte na Mallies verwys as die Afrikaanse Bob Dylan, veral weens die stories en sosiale kommentaar in sy liedjies.

Hy het geen formele musiekopleiding nie, maar kan vier instrumente speel, naamlik kitaar, klavier, bekfluitjie en dromme.

"Musiek is vandag vir my net 'n groot plesier en omdat ek 'n vrees het vir vlieg ('n tema van een van die liedjies op Radio Skoonveld) tree ek nie baie op nie.

Indien mens dit nou en dan doen en nie as daaglikse werk nie, verskaf dit genot," sê Mallies.

Mallies se sin vir humor sal altyd prominent wees. Radio Skoonveld is opgedra aan almal wie se motorradio's al gesteel is. Dit is die laaste liedjie op die CD, maar moenie dit te hard luister nie.

DIE 1960 film 'Hou die Blinkkant Bo' word Woensdag by die Afrikaanse Taalmuseum se volgende filmoggend, op die groot skerm vertoon. En die gaskunstenaar is niemand anders as die bekende Emsie Schoeman, ook bekend as Mevrou Etiket, nie!

Dié oud-aktrise, 'n nooi Botha van Stellenbosch, is veral bekend vir haar rol in die film 'Ruiter in die Nag', en het ook in die films 'Hans en die Rooinek', 'As ons twee eers getroud is', 'Kort voor sononder' en 'Debbie' gespeel.

Sy het nie net in nege vollengte films verskyn nie, maar ook reeds nege boeke geskryf.

Die meeste mense ken haar as rubriekskrywer en skrywer van verskeie boeke oor goeie maniere en etiket, wat haar onder meer in 1983 die ATKV se Skrywer van die Jaar-toekenning besorg het.

Dan was sy ook al vertaler, model en aanbieder op radio en televisie.

Die film 'Hou die Blinkkant Bo' is 'n komiese verhaal wat vertel van die wel en weë van 'n speelgoedmaker wie se besondere talente aanvanklik misken word, maar wat altyd die blinkkant bo hou en op die ou end groot sukses behaal.

Al Debbo was die hoofakteur en sanger teenoor Emsie Botha en ander akteurs, soos Trudi Rossouw, Sarah Sylvia, Willie Herbst, Taffy Kikillus en Douglas Fuchs.

Die regisseur was Emil Nofal, die kameramanne Vernon Whitten en Vincent Cox, die klankversorger Bonne ter Steege en die redigeerder Elmo de Witt. Nico Carstens en Anton de Waal het die temaliedjie geskryf.

Die vertoning begin om 09:30 vir 10:00 in die Historium van die Afrikaanse Taalmuseum. Kaartjies kos R10 (ligte verversings ingesluit) en moet vooraf bespreek word by Malikah, by 872-3441.

DIE Orpheus Ensemble, bestaande uit klarinettis Matthew Reid en tjellis Anmari van der Westhuizen met Lisa Garson voor die klavier, tree Sondag by Nederburg op, in die laaste konsert van vanjaar se seisoen.

Die Orpheus Ensemble sal die Quartet for the End of Time van Oliver Messiaen speel.

Die kwartet is gebaseer op 'n aanhaling uit Openbaring, hoofstuk 10, verse 1 tot 7.

Messiaen, wat in 1908 in Avignon gebore is, was een van die mees oorspronklike komponiste wat 'n impak gemaak het in die 20ste eeu.

Hy het die werk geskryf terwyl hy 'n oorlogsgevangene was gedurende 1940-1942. Die eerste uitvoering hiervan was op 15 Januarie 1941, en die gehoor was 5000 mede-gevangenes.

Die konsert begin om 17:00. Kaartjies kos R125 per persoon en sluit 'n ligte ete en Nederburg wyne in.

Vir besprekings en meer inligting, kontak Christine Joubert by tel 809-7473 of e-pos haar by dcjoubert @ distell.co.za.

DIE 'Neil Diamond - A Beautiful noise' vertoning met Steve Hofmeyr en Nianell op Saterdag 4 Desember in die Paarl Amfiteater het alle verwagtinge oortref. 

Meer as 3500 kaartjies is binne vier dae uitverkoop en steeds droog die navrae nie op nie. Computicket se kantore is oorval deur navrae.

Tweede vertoning

Die promotor, Gerhard Meyer, en Steve se bestuurder het besluit om aan die geweldige versoeke vir kaartjies te voldoen en 'n tweede vertoning sal nou plaasvind op Vrydag 3 Desember om 20:30. 

Die laatslapers sal moet gou spring, want geen verdere optredes sal moontlik wees nie, weens Steve se druk program. 

Nianell sal ook vervang word met 'n ander sangeres vir die Vrydagaand se vertoning, aangesien sy nie dan beskikbaar is nie. 

Die naam van die plaasvervanger sal later bekend gemaak word.

Hierdie reuse skouspel met klank en beligting van 14 ton en 'n geselskap van meer as 27 persone word die eerste keer buite Gauteng aangebied en Paarl is die enigste gasheerdorp in die Wes-Kaap. 

Dit word moontlik gemaak deur die ondersteuning van Liqui-Cooler, De Oude Paarl Hotel, Intermedia  en die wonderlike ondersteuning van die munisipaliteit en die Taalmonument met die voorbereiding van die Amfiteater.

Besoekers

Meer as 6000 besoekers van oor die hele Wes-Kaap sal die naweek van 3 en 4 Desember op die Paarl toesak. 

Meyer sê dit is 'n ideale geleentheid vir Paarl om sy vere reg te skud en die res van die Wes-Kaap te wys dat ons geen tree terug staan as dit by die professionele aanbied van groot byeenkomste kom nie.

Konsertgangers sal op albei dae reeds vanaf 17:00 die verskeie voedsel en wynstalletjies, almal lede van Paarl Vintners en Paarl Toerisme, kan besoek en gesellig verkeer op die berg.

Moet nie hierdie laaste kans deur die vingers laat glip nie - en haas na Computicket, Hoofstraat Paarl naby McDonalds of skakel hul by 083-915-8000.

Vir navrae, skakel Gerhard Meyer by telefoonnommer 872-1002.