Thursday 7 October 2004

This site will be updated on 14 October  2004 at 17:30

Nuus - News

• Onwettige handel
• Vrou en seuns oorleef fratsongeluk
• Ouers omgekrap oor gebrek en ruimte

Owettige handel

[ Top ]

Malané Bosman

WELLINGTONNERS het Maandag geskok om 'n sakeperseel in die middedorp saamgedrom waar 'n bekende tweedehandse motorhandelaar vir die besit van gesteelde voertuie aangekeer is.

Dané Louw (28) van Boland Trade Centre is in die Strand polisieselle aangehou.

Die eerste aanduiding van die drama wat hom sou afspeel het vroeg die oggend gekom toe die satellietopsporingstelsel in hondegeleiers Jacques Lume en Fernold Opperman se voertuig geaktiveer is.

Hulle het die sein gevolg tot by Genl Hertzoglaan 156 in Berg-en-Dal en op 'n wit Mitsubishi Pajero afgekom wat  in die Strand gesteel is.

Bygestaan deur lede van Tracker en die Voertuig Identifikasie-eenheid is die erf met die luukse woning deursoek.

'n Nuwe Volkswagen Citi-Golf wat in die oprit geparkeer was, is ook as gesteel geïdentifiseer.

WEGGELEI. Die verdagte motorhandelaar word van sy sakeperseel, Boland Trade Centre, weggelei.                                                 

'n Verbrande onderstelnommerplaatjie is tussen die as in die patio braaiplek ontdek. Die selfoontoestel uit die Pajero asook meer as 50 CD's was in 'n swart sak in die Louws se vullisdrom.

Volgens Pierre Carstens van die satellietopsporingsmaatskappy Tracker, is die enjinnommer en die onderstelnommer van die Pajero verander en die nommerplate en die lisensieskyf vervang.

By die sakeperseel in Kerkstraat het die polisie op 'n gesteelde Volkswagen Jetta, Golf GTi, 'n Ford Courier en 'n Isuzu bakkie afgekom.

"Motors word al jare lank by die onderneming van die pa (Herman) en seun verkoop," het Gareth Crocker van Tracker gesê.

"Deur die voertuie onregmatig te registreer, kon daar amptelike voertuigdokumentasie verkry word."

Nadat die polisie-ondersoek by die sakeperseel in Kerkstraat afgehandel is, is Louw Maandagmiddag in die Strand aangekla vir die onwettige besit van die Pajero.

Dinsdag het die deure van Boland Trade Centre gesluit gebly.

Insp GT Strydom (807-4000) van die Voertuigtak in die Paarl lei die ondersoek. (Sien bl 2)

*A second-hand car dealer has been arrested for possession of stolen vehicles in Wellington.

'n VROU en seuns het verlede week by die dood omgedraai toe houers van 'n vragmotor op die Wemmershoekpad afgeval het.

Ray Carter, vrou van 'n korrektiewe beampte van Drakenstein Gevangenis, was met haar seun Rowan (12) en hul buurseun Grant Nel (14) na die Paarl onderweg toe die vragmotor van voor aangekom het.

Twee 25-liter plastiekhouers met gifstof op 'n vragmotor van Theewaterskloof Holdings het skielik deur die lug getrek.

Carter het uitgeswaai en een van die houers gemis. Die tweede houer het die motor getref voordat sy beheer oor die wit Toyota Corolla verloor het.

Die motor het bo-oor 'n sloot langs die pad beland.

Grant is met nekbeserings en Rowan met hand en skouerbeserings in die hospitaal opgeneem. Ray is vir skok behandel en ontslaan.

Vasgeknel

Insittendes van twee voertuie was Sondagaand op die Wellington-Malmesburykruising in hul motors vasgeknel na 'n botsing by die vier-rigting stop.

Ambulanspersoneel moes die voertuie met 'n meganiese staalknipper oopsny en het sewe pasiënte na hospitale in die Paarl vervoer.

Die gesin Mathontsi van Macassar was om 22:00 van Wellington na die Agter-Paarlpad onderweg toe die ongeluk gebeur het. Alfred Mathontsi, sy dogter Amanda (6) en seun Khayaleihu (11), sterk tuis aan terwyl sy vrou, Nothemba (34), steeds vir erge beenbreuke gehospitaliseer word.

In die voertuig wat uit Noorder-Paarl onderweg was, is Barnie en Lizelle Marais van Bo-Langstraat, Noorder-Paarl, en Angeline Hanekom van Wellington erg beseer.

OUERS in Paarl-Oos en Mbekweni is omgekrap oor die gebrek aan ruimte vir graad 8 en 9 leerders vir 2005.

Ouers en hul kinders, wat nie plek vir 2005 gekry het nie, sal op Vrydag 15 Oktober by die Huguenot Gemeenskapsaal byeenkom, sodat die Obos die leerders kan inskryf by skole waar daar plek is.

Die ouers het 'n memorandum aan Jannie Beukes van Obos gerig, waarin hullle eis dat:

* alle leerders wat nie geakkommodeer kan word naby hul woongebiede nie, by skole in Paarl-Wes ingeskryf word, waar daar wel plek is.

* die Departement, in oorleg met die skole in Paarl, skoolfooie bekostigbaar maak vir alle ouers.

* die Departement, in oorleg met die skole in Paarl-Wes, alle toevallige finansiële kostes eers met die betrokke ouers uitklaar.

* die Departement, waar noodsaaklik, voorsiening maak vir busvervoer vir leerders wat meer as 5km van die skole woon.

* die Departement verseker dat enige personeeluitbreiding wat die skole in Paarl-Wes geval, voorsiening maak vir die aanstelling van opvoeders wat die demografie van die leerders reflekteer.

Verder eis die ouers dat enige oplossing wat die Departement aanbied, moet inpas by die breë visie vir toekomstige onderwysbestuur in die omgewing. Kitsoplossings is onaanvaarbaar.

"Die Departement moet aan ons 'n toekomstige plan voorlê wat in die behoefte van al ons kinders in die vallei voorsien, veral in terme van die nuwe VOO band. Alle kinders het die reg tot kwaliteit onderwys. "

[ Top ]