Thursday 7 October 2004

This site will be updated on 14 October  2004 at 17:30

Youth - Jeug

• Jong wetenskaplikes skitter
• Diens vir matrikulante
• Grootdag vir plaasskole se leerders

Jong wetenskaplikes skitter

[ Top ]

LAERSKOOLLEERDERS José May en Keascher Allies het hulle nie laat afskrik deur die kompetisie van ouer hoërskoolleerders by die Nasionale Expo vir Jong Wetenskaplikes in Pretoria hierdie naweek nie, en het huis toe gekom met een van die spesiale toekennings wat gemaak is.

Hul projek oor maniere waarop brandgevaar binne informele behuisingsgebiede verminder kan word, het aan hulle 'n kontantprys van die Suid-Afrikaanse Instituut vir Siviele Ingenieurs besorg vir die beste prys in die behuisingskategorie.

Daarby spog elkeen ook nou met 'n silwer medalje, om te voeg by die medaljes wat hulle op die onlangse streekfinaal op Stellenbosch gewen het.
Dié duo is die trots van Mary Help of Christians Primêr.

STERRE. José May en Keascher Allies (voor) en Melanie Niewoudt (agter) het Paarl se naam hoog gehou in Pretoria.

Melanie Nieuwoudt van Hoërskool La Rochelle het 'n brons medalje by die nasionale byeenkoms gewen vir haar landbouwetenskaplike projek wat kunsmatige inseminasie van kleinvee vergelyk met natuurlike bevrugting.

Die drie was onder die vyftien projekte uit die Stellenbosch-streek (Boland, Weskus en Overberg) wat na Pretoria gereis het vir die nasionale byeenkoms waar byna 500 inskrywings deur belowende, jong wetenskaplikes van regoor die land meegeding het vir medaljes en spesiale trofees.

Al vyftien projekte het medaljes ontvang, terwyl spesiale pryse aan twee projekte (onder wie Keascher en José se projek) uit die streek toegeken is.

Vier leerders sal ook die streek op internasionale vlak verteenwoordig by expo's in Swede en Chile.

Volgens 'n trotse Erika Hoffman van die Instituut vir Wiskunde en Wetenskap Onderwys (IWWOUS) van die Universiteit van Stellenbosch, wat die groep leerders vergesel het, is dit die beste wat die Stellenbosch-streek nog by die nasionale byeenkoms gedoen het.

Die onlangse streeksuitdunne is gereël deur IWWOUS en die US se Fakulteit Natuurwetenskappe.

Die Expo bied jaarliks aan jong wetenskaplikes op skoolvlak die kans om hul staal te toon met uitvindings, ontwerpe en navorsing in 24 verskillende wetenskaplike kategorieë.

DIE VGK Huguenot hou Sondag om 09:45 'n diens vir matrikulante, in samewerking met plaaslike sekondêre skole.

Volgens ds Freddie Ayford beoog hy om dit 'n jaarlikse instelling te maak.

Alle matrikulante word na hierdie diens uitgenooi wat ook geïntegreer word met die afsluiting van die CAB-naweek.

DIE polisie gaan op Maandagoggend 27 Oktober die leerlinge van al ses plaasskole in Wellington betrek by 'n projek op die Hawequa Jeugterrein.

Ongeveer 1500 kinders en onderwysers sal betrokke wees by hierdie byeenkoms waar Captain Crime Stop besoek sal aflê.

Dit word aangebied deur die Landelike Beveiligingseenheid Wellington wat betrokke is by sosiale misdaadvoorkomingsprojekte en praatjies by skole.

Daar sal ook sprekers wees van die Kinderbeskermingseenheid, Dwelmtak en Brandweer om die kinders op hierdie onderskeie vakgebiede toe te spreek.

Hulle sal ook noodvoertuie soos 'n ambulans, brandweerwa en onlustevoertuie kan besigtig.

Die kinders sal elk 'n maaltyd en koeldrank ontvang, en moontlik 'n geskenkie. Finansiële steun is verkry vanaf Sanlam Investment Management, Ceres Fruit Juices en Davey's Busdienste.

Vir navrae, kontak inspekteur PD Novella by 872-2913.

[ Top ]