people







				Thursday 9 May 2002



	This site will be updated on: 16 May 2002 at 17:00


	People - Mense
	Rugpyn nou net 'n gerug Man aangeval by foon


	Rugpyn nou net 'n gerug


	[ Top ]

wdamon19 DIS ongehoord om twee dae ná 'n rugoperasie op te staan en rond te loop, sonder 'n rugstut of 'n helpende hand, nie waar nie?

Met 'n nuwe tegniek, wat al drie keer suksesvol in die Paarl Medi-Clinic uitgevoer is, blyk dié wonderwerk nou waar te wees.

Daar is tien dokters in Suid-Afrika wat hierdie nuwe metode gebruik nadat hulle 'n kursus in Frankryk of in Duitsland voltooi het. Die afgelope twee maande is daar in Suid-Afrika al 50 operasies gedoen waar artroplastiek gebruik is.

'n Paarlse ortopediese chirurg, dr Jack Eksteen, het drie van die ses operasies wat in die Wes-Kaap uitgevoer is, gedoen.

Uit sy teater loop daar nou 'n


	FLINK. Damon Scheepers (49) van Welington is vyf dae ná sy rugoperasie so flink op die been dat hy sy chirurg, dr Jack Eksteen, vir die grap in 'n rystoel kan rondstoot.

plaaswerker en 'n polisieman van die Paarl en 'n munisipale werker van Wellington pynloos en regop, soos hulle maande laas kon doen.

Mediese tegnieke verbeter voortdurend. In die 1950's, vertel dr Eksteen, is probleemgewrigte styfgemaak.

Tien jaar later, en vir die volgende 20 jaar, is prosteses ingesit in plaas van die styfmaak.

Nou is daar die "totale omwenteling" rondom spinale chirurgie, met die koms van artroplastiek van die rugkussing.

'n Wiggie van chroom/kobalt-allooi en poli-etileen behou die hoogte sodat die rugkussinkie nie platval nie.

Die beweging van die segment bly dus behoue en die lewensverwagting van die kussinkie word verleng.

In teenstelling met die snit deur neurochirurge, wat van die rugkant af gedoen word, word dié nuwe operasie soos 'n keisersnit deur die buik uitgevoer.

Daar is dus geen skade aan die rugspier nie en min gevaar aan die senuweewortels, verduidelik dr Eksteen.

"Die belangrikste is, jy brand nie jou brûe nie en ek glo daar sal in die toekoms beperkte rugfusie gedoen word," meen dr Eksteen.

In Frankryk het die uitvinder van dié metode tussen 1990 en 1993 talle sulke operasies gedoen en toe tussen sewe en elf jaar gewag om te sien wat die resultaat sou wees. Sowat 93% was geheel en al bevredigend.

Boonop is die pasiënt twee dae na die operasie op die been. Hy kan ná twee weke motor bestuur en ná drie maande arbeiderswerk verrig.

Nie soos in die "ou" dae nie!

* A new method of spinal surgery (artroplasty) has patients up and about within two days.


	Man aangeval by foon

	Emile Butler


	[ Top ]

wcoetzee19 AS dit nie was vir die 66-jarige Chris Coetzee se boks-vaardighede nie, sou hy lelik seergekry het.

Coetzee, van Roodeberglaan, is voorverlede Vrydagaand om 20:50 aangerand toe hy 'n oproep wou maak vanaf die publieke telefoon by Labori Sentra in Hoofstraat, Suider-Paarl.

Hy vertel dat hy op pad was om melk te koop toe hy 'n oproep wou maak en agterkom dat hy sy selfoon vergeet het.

"Ek het by die telefoon gestop en net die gehoorstuk opgetel toe iemand my om die nek gryp," sê hy.

"Die man het my agteroor probeer trek, maar ek het vorentoe gebeur. Nog twee van sy makkers het aangehardloop gekom en geskreeu 'gee die mes'."

Dis toe dat Coetzee, wat in sy jonger dae 'n SA junior boks-kampioen was, sy boksvaardighede inspan.

"Die vuiste het geklap en hulle het my op die grond probeer druk. Hulle het my hemp oor my kop getrek, maar ek het uit die hemp geglip.

"Dis toe dat die drie laat spaander het. Ek het na my bakkie gehardloop om 'n knuppel te kry, maar die drie was klaar weg."

Ten spyte van 'n eina-lyf en 'n hou voor die kop, het die drie net met 'n bietjie kontant en Coetzee se bakkie-sleutels ontglip.

Wat hom rooi laat sien, is die feit dat ten tyde van die voorval, daar 'n paar vroue op die muurtjie by die telefone gesit het, en dat hulle geen poging aangewend het om hulp te kry nie.

'n Klag van aanranding is by die Polisie gelê.

'n Kollega van Coetzee, Thomas Rasmeni, is die volgende middag by die OTM by dieselfde sentrum beroof van sy bankkaart en R500 kontant wat hy getrek het.

* An ex-boxer managed to fight of robbers at a pay phone in Suider Paarl.

[ Top ]
Tel: (021) 871-1170 - e-mail: edit@ppost.co.za