|
DIE sinnelose dood van jong kinders is iets wat moeilik verwerk word, het Leon de Jager, adjunk-direkteur van Onderwys (OBOS Weskus/Wynland), gesê tydens die onlangse Voetganger Sigbaarheidsprogram in die Paarl.
Glimbande is aan leerders van 40 skole van Drakenstein, Stellenbosch, Breedevallei, en Witzenberg uitgedeel.
"Veral in landelike gebiede waar huise ver van die skool af is en kinders in die donker reeds begin stap, is hierdie bande 'n manier om hulle sigbaar te maak."
Voetgangersterftes vorm 45% van alle ongevalle op paaie in die Wes-Kaap, die hoogste van al die provinsies. Dit is sowat 600 sterftes per jaar.
"Dit is belangrik dat ons moet toesien dat die bande gedra word," het De Jager benadruk en bygevoeg dat dit nie net die onderwyser se plig is nie.
"Met die glimbande wat vandag hier uitgedeel word, wil ons poog om leerders te beskerm teen liggaamlike beserings,"het Edmund Pheko, Boland Distrik raadslid, gesê.
Die glimbandprojek is 'n gevolg van uitgebreide navorsing deur die WNNR om die gevaarlikste voetgangerareas te bepaal en te probeer oplos.
Glimbande was een van die mees geslaagde projekte in die landelike gebiede. In die Wynland-gebied is voetgangersterftes binne een jaar met 82% verminder.
'n Werkgroep is in September verlede jaar gevorm om te fokus op die sigbaarheid van leerders. Geld is verkry van die Departement van Gemeenskapsveiligheid, Arrive Alive en die Nasionale Departement van Vervoer vir die maak van glimbande.
* Reflective sashes save pedestrian lives. |
