Thursday 10 June 2004

This site will be updated on 17 June  2004 at 17:30

Nuus - News

• Buite beheer
• Farmers up in arms
• 'n Bergie is ook 'n mens
• Klubbesture moet orde hou
• Gelol met sekshof

Buite beheer

[ Top ]

TWINTIG mans en vroue is Maandag hospitaal toe gehaas toe 'n vragmotor waarmee hulle 'n geleentheid uit Suider-Paarl gekry het, teen 'n boom gebots het.

Sammy Welcome van Hermitagestraat, Paarl-Oos, die vragmotorbestuurder wat die werkers van Bouckaert-Soenen opgelaai het, is van dronkbestuur aangekla.

Die vragmotor behoort aan 'n grafsteenmaatskappy van Kuilsrivier en is volgens die eienaar sonder sy toestemming geneem.

Hy het glo net na 17:00 by die tekstieldrukkery in Suider-Paarl stilgehou en die werkers onder 'n kap tussen granietblokke en konstruksietoerusting laat inklim.
Volgens getuies het Welcome op die draai in Arboretumlaan kort voor die

BESEER. Kollegas het hulle oor mekaar ontferm ná die botsing Maandag waarin 20 werkers van Bouckaert-Soenen in Arboretumlaan beseer is, soos Esra van Wyk wat hier vir David Timotheus  bemoedig.                                                                                      

Paryspad beheer oor die voertuig verloor. Die vragmotor het meters ver teen die veiligheidsreling geskuur en toe teen 'n akkerboom gebots. Passasiers het in alle rigtings geval.

Ambulanspersoneel moes bontstaan  en het tien pasiënte na die Paarl Hospitaal vervoer. Nog pasiënte is met private voertuie hospitaal toe geneem.

Hulle was gister almal buite gevaar.

Die vragmotorbestuurder is nie beseer nie. Hy is ná 'n wilde  gestoei deur drie verkeersbeamptes in 'n verkeersmotor gelaai en vir bloed-alkoholtoetsing weggeneem.

Toe die oproep van 'n tweede ongeluk ontvang is, moes brandweerpersoneel, die polisie en die publiek hand bysit.

Verkeersbeampte Nico Stuurman het van die Ou Paarlpad met Nuwe Eskdalestraat na die toneel gejaag, na bewering sonder sirene en blou lig.

By die aansluiting van Jonesstraat in De Zoete Inval, was hy in 'n botsing met die bakkie van Herman Els betrokke.

Els is met 'n 30cm lange sny oor sy kop deur bure  na die Medi-Clinic geneem.

Sy 13-jarige seun, wat nie beseer is nie, het 'n noodhulpkissie by die Elswoning enkele meters verder gaan haal, en het sy pa help verbind.

Stuurman is onder 'n kombers toegewikkel, en moes 'n uur lank wag vir 'n beskikbare noodvoertuig.

Hy is nie ernstig beseer nie.

* Twenty people were injured when a truck hit a tree in Paarl South. The driver had to be subdued  for blood alcohol testing.

FARMERS are up in arms after receiving property tax accounts from Drakenstein Municipality in May, backdated to July 2003.

Early last year Paarl Post reported that farmers outside the traditional municipal areas would be taxed on their property for the first time from 1 July 2003.

Farmers objected to the property tariff imposed by the municipality, and implementation was delayed,

After negotiations to lower the tax rate from ,35c in the Rand to ,24c, back-dated accounts were supposed to be sent out in December, but due to a computer slip-up this never happened. The magnitude of the error was only established in May, after which the accounts were finally posted.

Said one farmer, "I had no idea that we were already being taxed. Now I have to pay thousands of rands without warning, and soon I will be receiving another account for an even larger amount for the coming tax year.

" This is highly irregular and plays havoc with one's financial planning."

Because accounts were sent out late, penalties which would normally have been slapped on the 1200 overdue accounts, have been reversed at the instruction of the Mayoral Committee.

Councillor Arthob Petersen called the events a "litany of errors which is totally unacceptable".

The Committee asked the Municipal Manager, Jacques Carstens, to investigate the matter for possible disciplinary steps. The amount that has to be written off because of the error, must also be ascertained.

* Property tax will rise by an average 7,5% from 1 July. Residential properties are taxed at 1,14c in the Rand, agricultural properties in towns are taxed at 0,59c in the Rand, agricultural properties outside towns are taxed at 0,25c in the Rand, and commercial properties at 1,44c in the Rand.

Usually property tax is payable per annum, unless the ratepayer asks to be billed per month.

The Municipality has extended the cut-off date for applications to pay property tax on a monthly basis to 25 June.

Applications must be sent to the Finance Department at PO Box 12, Paarl 7620 or send e-mail to andrea@drakenstein gov.za. For enquiries, phone André Abrahams at 807-4515.

DIE feit dat dit 'n bergie is wat verkrag is, maak die daad nie minder afstootlik nie. Elke mens is gelyk voor die reg.

Met dié opsomming het landdros Patrick Ross onlangs 'n beskuldigde aan verkragting,vir 10 jaar tronk toe gestuur in die Paarl streekhof.

Martin Swartz, oorspronklik van Agter-Paarl, was op 1 Desember 2002 saam met 'n vriend per fiets in die Bergrivier Boulevard onderweg toe die misdryf gepleeg is.

Die mans het om 04:00 die hawelose vrou en haar vriend wakker gemaak waar hulle aan die suidelike draai langs die rivier geslaap het.

Die vriend is deur Swartz se makker onder bedreiging van 'n mes stil gehou terwyl Swartz die vrou verkrag het.

Ná die voorval het die twee mans saam op die fiets geklim en verder gery.

Insp Githa Kilian het die saak ondersoek en Swartz in hegtenis geneem.

"Die hof is daar om elke mens se reg op lewe, privaatheid en op haar liggaam te beskerm," het landdros Ross gesê.

"Die grondwet sê elke mens is gelyk voor die reg. Die feit dat die vrou langs die Bergrivier bly en 'n bergie is, beteken nie sy is nie 'n mens nie.

"Dit is 'n brutale aanval en afstootlike daad gepleeg teenoor 'n mens."

'n GEBREK aan sportmangees en klubbesture wat nie beheer kan uitoefen nie, is die wortel van die geweld-probleem in die provinsie se klubwedstryde.

Dít is aangevoer as die onderliggende oorsaak van die probleem in 'n spesiale vergadering  Maandagaand op Wellington wat gehou is nadat die Boland onder skoot gekom het vir die sogenaamde "geweldstoestande" wat in sekere klubwedstryde plaasvind.

Moorreesburg Rugbyklub het verlede week alle bande met Boland Rugby verbreek nadat spelers in 'n Superliga A1 wedstryd teen Roses United van Wellington weens beweerde vuilspel steke en mediese behandeling moes ontvang.

Moorreesburg, een van die sterkste klubs in die Boland, het aangedui dat hulle voortaan hul rugby gaan speel by Rugga SA, 'n liggaam wat deur 'n oud-voorsitter van Robertson Rugbyklub, Stoney Steenkamp, op die been gebring is, en as alternatief dien vir spanne wat ontevrede is met die huidige situasie in klubrugbystrukture in die Wes-Kaap.

Amptenare van die Boland Rugby Unie (BRU) asook voorsitters en afrigters van al die klubs in die provinsie het die vergadering bygewoon wat deur die Boland-president, Jackie Abrahams, gelei is.

"Ek sou my plig as president versuim as ons nie die probleme deur sinvolle gesprekvoering probeer oplos nie," het Abrahams Maandag gesê.

Hoewel hy erken het dat daar by sekere klubs probleme is, het hy aangevoer dat die beeld van klubrugby in die Boland, soos weergegee in die koerantberigte van die afgelope week, buite konteks was en "dalk 'n wrede veralgemening is."

"Die beeld van Boland Rugby is aan flarde geskeur," het hy gesê.

Dronkenskap, onwettige drankverkope, onwelvoeglike taalgebruik, en geniepsige of vuilspel en bakleiery van die veld af is die groot probleme by klubwedstryde, volgens 'n verslag wat voorgelê is.

"Elke klub is verantwoordelik vir orde, dissipline en die bestuur van rugby op sy gronde. Ek weet dit is nie die geval by sekere klubs nie. Baie klubs doen weinig of niks om te verseker dat mense veilig voel op en langs die rugbyveld.

"Daar is sekere klubwedstryde waarnatoe ek nie my dogter sal neem nie want ek kan myself beskerm, maar nie vir haar ook nie," het Abrahams gesê.

Hy het bygevoeg dat dit die verantwoordelikheid van die klubbestuurslede is om na die probleme om te sien.

"Wys besope toeskouers by die hek weg, en stop die onwettige dranksmokkelary by die velde. So moet toeskouers wat onwelvoeglike taal gebruik ook van die veld verwyder word.

"By sekere velde is die bestuur egter onsigbaar, hulle is almal bekommerd of die eerste span nou wen of wil die skeidsregter konfronteer oor 'n beslissing."

"As jy 'n bevreesde persoon is, moenie 'n bestuurslid wees nie. 'n Bestuursposisie is nie 'n eer nie. Jy moet jou man kan staan en die mense aanvat wat verkeerd doen langs die veld," het Abrahams gesê.

'n Lid van die vergadering het gesê dat dit moeilik is om sekuriteit by sekere velde te verseker aangesien dit in gebiede geleë is waar smokkelhuise en ander ongewenste elemente dit omring.

"Van al die klubs in die Boland is 90% bruin, met velde in agtergeblewe gebiede. Ons weet daar moet 'n proses gevolg word tot die opvoeding van ons mense. Maar dit maak die uitdaging net soveel groter. Ons moet nie 'n slaaf word van ons omstandighede nie," het Abrahams gesê.

Volgens Gerhard van Vuuren, voorsitter van Ceres Rugbyklub, is sy spelers bang om op sekere velde te speel.

"Hoekom moet spelers bang wees om op sekere velde te speel? Ons kan sê dit is geisoleerde voorvalle, maar net een voorval waarin iemand met 'n bottelnek gesteek of 'n speler se oë wat probeer uitgekrap word, is te veel," het Van Vuuren gesê.

Hy het bygevoeg dat Ceres "niks van Rugga SA wil weet nie."

"Maar dit help nie spelers sê Saterdag vir ons op die rugbyveld, 'Gaan speel vir Rugga SA nie'. Dit help nie ons gee hier op 'n vergadering 'n front van eenheid voor en klap hard hande as daar van rassisme gepraat word, maar dan word ek 'n rassis genoem as ek iemand langs die rugbyveld uitwys wat verkeerd doen nie," het Van Vuuren gesê.

Voorsitter van die Botrivier Rugbyklub, WC Oelofsen, het op sy beurt gesê dat spelers van sekere klubs wat nie die besoekende bestuur groet nie, eenkant alleen hul motors trek en "hoogmoedig langs hul neuse af kyk" na die ander spelers, gemoedere langs die veld ook versuur.

"Dit maak ook emosies seer," het hy gesê.

Daar is ook genoem dat die skeidsregter dikwels die rede is vir die gebruik van vuiltaal en aggressie langs die veld.

"Julle sal verbaas wees oor sekere afrigters se gebrek aan kennis van die reëls. Dat 'n skeidsregter 'n fout kan maak ís so, maar hel, hanteer hulle as mense," het Abrahams geantwoord.

Abrahams het gesê dat dit grondwetlik onmoontlik is om Rugga SA te stop.

"Maar dit maak my diep ongelukkig dat hy mense bymekaarmaak en op 'n pad lei waar daar vir hul geen toekoms lê nie. As hy dit wil doen, moet hy Boland Rugby en Sarvu uitlos. Hy is oningelig. Hy dra nie kennis van wat Sarvu doen vir klubs en amateurrugby nie," het hy gesê.

Die Bolandse president het 'n beroep op almal teenwoordig gedoen om hulle te verbind tot die aanspreek en oplos van al die betrokke probleme.

Jackie Abrahams het beaam dat Moorreesburg Rugbyklub steeds deel kan wees van die Boland Rugby-unie, maar dat hy nie na Moorreesburg sal gaan vir onderhandelings nie.

* Moorreesburg Rugbyklub het in antwoord op 'n uitnodiging van Boland om vanaand op Wellington te vergader, gesê die BRU moet die gemeenskap van die dorp daar kom toespreek aangesien hul "volgens 'n mandaat van die gemeenskap opereer". Hulle het die uitnodiging van die hand gewys.

DIE Nasionale Vervolgingsgesag lol met die hof vir seksuele misdrywe in die Paarl.

Hierdie week was dit so hittete of die hof moes sy deure sluit, en die honderde kinders wat by dié gebou in Markstraat vertroosting gevind en geregtigheid sien seëvier het, is aan hul aanvallers se genade oorgelaat.

Sedert die totstandkoming van die hof twee jaar gelede stry en baklei die aanklaer, Anita Potgieter, al om permanent aangestel te word.

Elke paar maande moet haar kontrak hernu word, en elke keer kos dit ritse vorms invul, dosyne fakse en nog meer telefoonoproepe tussen die Paarl, Kaapstad en Pretoria.

Potgieter het selfs al twee maande lank sonder salaris gewerk en moes 'n klein baba by die huis laat omdat sy as kontrakwerker nie op kraamverlof geregtig is nie.

"Dis burokratiese rompslomp," het 'n onthutste landdros Annamarie Immelman hierdie week gesê. As koördineerder van die streekhof moet sy selfs hoftyd inboet om die hof vir seksuele misdrywe aan die lewe te hou.

"Anita het in hierdie hof al wondere verrig.

"Maar elke paar maande haak dit met haar kontrak wat nie hernu word nie. Dan begin die stryd van voor af."

Die nuutste krisis volg op 'n skrywe verlede maand: Veels geluk, julle het 'n permanente seksuele misdrywehof.

Die hofpersoneel is in die brief aangesê om 'n amptelike opening te reël.

Van dié brief was hierdie week geen sprake nie - toe Potgieter weereens haar kontrakperiode met gesukkel moes probeer verleng.

"Ons het 'n wonderlike span hier waarmee 'n mens 'n lang pad kan stap - die polisie, distriksgeneesheer, die gemeenskap wat so baie vir die kinders doen," sê Potgieter.

Hulle kan nie nou tou opgooi nie, want die gemeenskap mag nie in die steek gelaat word nie.

Die vertrouensposisie wat met 15 polisiestasies in die Boland opgebou is, mag nie weggegooi word nie.

"Daar is 'n netwerk wat die kinders ondersteun. Wat word van hulle as ons ons deure toemaak?" vra landdros Immelman.

Met die onsekerheid oor die kontrakhernuwing, moes al die sake wat hierdie week op die hofrol was, uitgestel word.

Kinders en ouers wat Maandag van sover as Grabouw en Prince Alfred Hamlet gekom het, is huis toe gestuur nadat hulle ure lank in die koue by die hof moes wag.

"Haar middelnaam is Jammer," het getuies by die hof van Potgieter gesê.

"Jammer dat die saak nie loop nie. Jammer dat ons maar moet huis toe gaan. Jammer dat ons kinders die dag uit die skool moes bly.

"Sy is jammer vir die beskuldigdes, hulle moet maar terug tronkselle toe. Jammer vir die polisie en die tussengangers vir die gemorste tyd.

"Ons hoop sy word permanent aangestel.Ons kinders het haar nodig."

Teen gistermiddag  is beloftes van 'n aanklaersdienskontrak van die Vervolgingsgesag ontvang, maar nog geen amptelike skrywe nie was beskikbaar nie.

[ Top ]