|
VIR sommige is dit 'n dag om in die tuin te werk, laat te slaap of inkopies te gaan doen, maar vir baie jongmense is komende Woensdag se herdenking van die jeugopstand van 16 Junie 1976 'n viering van hul menswees.
Onderwysstudent Charles Lamprecht, voorsitter van die Wellingtonse Studenteraad van die Kaapse Technikon, sê Jeugdag het 'n groot historiese verbintenis en mag nie vergeet word nie.
"Die dag is daar om dié jeug wat voor ons gegaan het te onthou en om uit die foute van die verlede te leer," sê hy.
"Jongmense kan 'n verskil in die land maak, hulle moet oorneem waar hulle voorgangers opgehou het.
"Ons moet 'n positiewe bydrae in die land begin maak en nie net wag vir hooggeplaastes om ons toekoms vir ons te bepaal nie," sê hy.
Volgens hom is skole die hoeksteen van die jeug se ontwikkeling: "Ons moet begin om in ons onderwysers en kinders te belê. Hulle is die platform waarvan groot dinge in die land kan gebeur," sê hy.
Edwina van der Horst, ook 'n vierdejaar-onderwysstudent by dié kollege, sê die feit dat jongmense gesterf het vir hul vryheid moenie vergeet word nie.
Volgens haar is een dag in die jaar eintlik te min om die verlede te gedenk.
"Daar moet meer geld in ontspanningsplekke vir die jeug belê word om hulle aan te spoor om 'n meer positiewe leefwyse te volg."
Samantha van Wyk, voorsitter van die studenteraad by Hugenote Kollege op Wellington meen dié dag moet die jeug herinner om nie hul "roots" te vergeet nie.
"Dié dag moet gebruik word om oor ons (die jeug) verantwoordelikhede te besin sowel as hoe ek die geleentheid kan gebruik om 'n beter persoon van my te maak," sê dié student in maatskaplikewerk.
Uiteindelik hang dit van jouself af wat jy met jou lewe maak, meen sy.
"Wat jy vandag insit beïnvloed jou môre," sê dié meisie van Warrenton in die Noord-Kaap.
Christi Thirion, 'n student in jeugbediening by Hugenote Kollege, sê behalwe vir die Comrades Marathon is Jeugdag ook die dag waarop jongmense hul vryheid kan vier.
Hy meen dis tyd vir alle jongmense om meer positief oor die lewe te dink.
"Ons het baie om voor dankbaar te wees en kla te veel. In vergelyking met ander lande in Afrika is Suid-Afrika tops."
Volgens hom benadeel Vigs, werkloosheid en ekonomiese ongelykheid wel die land.
"Maar daar is hordes geleenthede wat moet raakgesien word om 'n verskil te maak aan die welvaart van die jeug. Ons moet begin om die hartseerverhale in positiewe verhale te verander," sê hy.
Sipho Bokuva van Wellington, 'n sakestudent by Koinonia, sê dit is die jeug se plig om op die nagedagtenis van die jeug wat op dié dag gesterf het, voort te bou.
"Baie kinders het gesterf om vir ons die geleenthede te gee wat ons nou het. Jy kan nou studeer waar jy wil, werk waar jy wil en jou potensiaal ontwikkel."
Volgens hom moet daar drasties gekyk word na die hoë werkloosheidsyfer in die land. Meer werk moet vir die jeug geskep word.
Esmerelda Jansen, ook 'n sakestudent by Koinonia, sê die jeug het 28 jaar gelede groot offers gebring: "Van wat hulle ingesit het, pluk ons tans die vrugte."
Volgens haar moet die jeug begin belê in hul toekoms en meer belang stel in die Suid-Afrikaanse politiek.
"Plaaslike vryheidsvegters soos Lizzie Phike en Rocky Mafekeng het geveg sodat die jeug 'n beter toekoms kan hê. Hulle is vroue van formaat."
Peter-John Pekeur, 'n grafiese kunsstudent by die Peninsula Technikon en ook 'n "hip-hop" kunstenaar in Paarl, sê vir hom is jeugdag 'n geestelike fees.
"Soos Jesus sy lewe vir sy volk opgeoffer het, het talle jeugdiges op dié dag vir ons hul lewens opgeoffer en gesterf sodat ons 'n beter lewe kan hê.
"Ons het keuses, wat hulle nooit gehad het nie," sê hy.
Sy kunstenaarpa, Selwin, inspireer hom deur sy skilderye.
"My pa skilder altyd mense van verskillende rasse wat hande vashou en saam leef - dit is die pad wat ons in die toekoms in die land moet volg."
* On Youth Day, the youth must commemorate those who made sacrifices to ensure their freedom, say local youth leaders. |
