people







				Thursday 10 October 2002



	This site will be updated on: 17 October 2002 at 17:00

	People - Mense
	Lekker bly lekker, selfs op 104 Spanmaats op krukkelys Pikkie Rossouw oorlede Oud-Paarliet sterf


	Lekker bly lekker, selfs op 104
	Malané Bosman


	[ Top ]

woues MEER as tweehonderd jaar se lief en leed lê agter die blad van die twee oudste dames van Silwerkruin in Wellington.

Op Valentynsdag volgende jaar is mev Annie Truter 104 jaar oud. Mev Maggie McKenzie is vandag, op Paul Kruger se geboortedag 10 Oktober, reeds 104 jaar oud.

En hoekom word hulle so oud?

Dit lê nie in die gene nie - geeneen se voorouers het so lank geleef nie.

GROOT GESELS. Maggie Mc Kenzie (links) en Annie Truter van Wellington, Silwerkruin se oudstes, het baie jare se gesels tussen hulle.

"Dis die Here se wil," kom dit gelyk van aunt Annie en Mrs McKenzie, soos die twee oues van dae bekend is.

En moenie dink 'n mens verloor belangstelling in die lekker van die lewe net omdat jy al so baie jare daarmee aankom nie.

Vleis is die lekkerste, of soos aunt Annie met 'n lek oor die lippe sê: "Daar is niks beter as 'n lekker braaiboud nie."

Waarmee hou mens jouself besig op dié hoë ouderdom?

Aunt Annie lees nog elke dag haar koerant, want "ek wil weet wat aangaan."

Mrs McKenzie praat graag met haar Here. Die oë is nie meer so goed vir lees nie.

Aunt Annie het ses seuns gehad, waarvan vier nog leef. Dr Helius Truter woon in Wellington, Daantjie Truter in die Paarl en die ander in Durbanville en Johannesburg.

Mrs McKenzie het al 'n seun en 'n dogter aan die dood afgestaan. Haar dogter, Barbara Cooper, het vanjaar uit Wellington na Worcester getrek, terwyl haar seun in Natal woon.

Die twee dames met die baie jare tussen hulle het hierdie week gemaklik saam op 'n bank in een van Silwerkruin se woonkamers gesit.

"Ek is tog so doof," hoor jy die een gesels, haar mond naby die ander se oor.

"En dis regtig nie lekker nie. Nou hoor ek nie meer alles wat om my gesê word nie."

* One of Wellington's two centenarians celebrates her 104th birthday today.


	Spanmaats op krukkelys
	Malané Bosman


	[ Top ]

SPANMAATS moet mos alles wil deel - selfs al is dit die krukkelys weens geskeurde knieligamente.

Vroeër hierdie rugbyseisoen het Wellington se o.21 kaptein, Nicus Bergh, die kruisligamente in sy linkerknie geskeur. Hy kon nog van die veld afstap, maar toe vou sy been onder hom in.

Sy voorland was drie dae in die hospitaal, ses weke op krukke, en 'n seisoen wat sy losskakeltrui in die kas sal moet bly hang.

Twee weke gelede doen sy skaaphond, Chips, oudergewoonte "veldwerk" terwyl die jong manne krieket in die tuin speel. Ná die "wedstryd" let Nicus op dat Chips nie op sy regterpoot kan trap nie.

Toe die "krieketbesering" dan nie beter word nie, bevind Chips hom in die dierehospitaal op die dorp.

Glo dit of te nie, die kruisligamente van sy regter(agterbeen)knie is geskeur, en die kraakbeen het ook seergekry.

Na 'n operasie en drie dae in die hospitaal was Chips weer tuis, met 'n effe kleiner rekening en minder steke as sy mensmaat.

Maar net so ongemaklik met die dokter se advies: "Hy moet hom tog stil hou."

* A Wellington rugbyplayer and his dog both had to undergo knee operations after "sports" injuries.


	Pikkie Rossouw oorlede


	[ Top ]

'n BEKENDE inwoner van Noorder-Paarl, Pikkie Rossouw (71) van Doreenstraat, is Maandag tuis oorlede, vermoedelik weens 'n hartaanval.

Mnr Rossouw, 'n voormalige munisipale bergbewaarder, was bekend vir sy diens in die gemeente en sy liefde vir duiwe.

Hy was ook saam met sy vrou Sussie bekend vir die maak van potjiekos by kompetisies. Sy het hom verlede jaar ontval.

Hy word oorleef deur 'n seun Kobus, en 'n dogter Ansie van Zyl, albei van die Strand, en vier kleinkinders. Die begrafnisdiens is môre om 10:00 in die NGK Paarlberg.


	Oud-Paarliet sterf


	[ Top ]

'n BEKENDE oud-Paarliet, Sammy Andrews (84), is Dinsdag op Caledon oorlede, vermoedelik weens hartversaking. Hy het sy hele lewe, behalwe die afgelope sewe jaar, in die Paarl gewoon.

Andrews was vroeër jare bekend as voorsitter van Rangers rugbyklub, ouderling van Bethel Kong Kerk en offisier van die Royal Stars Kerskoor.

Hy word oorleef deur sy vrou, Netta, kinders Sammy, Laurel en Cynthia Swarts, tien kleinkinders, 14 agterkleinkinders en broer Barend van Kuilsrivier. Die begrafnis is Saterdag 10:00 te Fieldstraat 20, Paarl en daarna in die Bethel Kong Kerk.

[ Top ]
Tel: (021) 871-1170 - e-mail: edit@ppost.co.za