Thursday: 11 Septembert 2003

This site will be updated on: 19 September  2003 at 17:00

 Letters - Briewe

• Ernstige aanklag
• Chaos met aanwys van verkeershoof
• Hoekom 'n biblioteek sonder rekenaars?
• Paaie 'n nagmerrie
• Diefstal begin klein
• Wonderlike mense
• Vlieëmekka in Paarl

DIE dood is 'n traumatiese ervaring en baie mense vind hul vertroosting dikwels langs die graf van 'n geliefde.

Selfs mense wat lank reeds die verlies verwerk het, besoek nog gereeld die begraafplaas om grafte skoon te maak en blomme daarop te plaas.

Tradisioneel is dit 'n plek van rustigheid, 'n plek van eerbied, 'n plek wat deur mense gerespekteer word.

Kleintyd het die meeste van ons ook geglo dat dit 'n plek van spoke is, en heelparty van ons glo dit tot in lengte van dae.

Maar in die Paarl het die begraafplaas nou 'n plek van rowers en misdadigers geword.

Die dooies se grafte word gevandaliseer en die lewendes word aangeval en beroof. Selfs vroue in groepe is nie meer veilig nie.

Maar die owerhede trek net hul skouers op - niemand wil verantwoordelikheid neem vir die wetteloosheid in die begraafplaas nie.

Almal besef dat die probleem nie oornag opgelos kan word nie, maar daar is tog relatief maklike korttermyn oplossings, soos om patrollies op spesifieke dae en tye te hê wat mense in staat sal stel om die begraafplaas in vrede en veiligheid te besoek.

Intussen bly dit 'n ernstige aanklag teen 'n gemeenskap en 'n teken van morele verval, dat sulke onheilige bedrywighede enigsins geduld word.

GRAAG wil ons onder die burgemeester, raadsheer Herman Bailey, se aandag bring die chaotiese toestand, met betrekking tot die aanstelling van die verkeershoof in die Drakenstein munisipale area.

Dit het onder ons aandag gekom dat 'n verkeershoof aangestel was sonder dat 'n behoorlike demokratiese proses geloop is.

Ons vra 'n onmiddellike regstelling van bogenoemde proses en wel in die vorm dat verkeersbeamptes en amptenare teruggeplaas word soos voorheen, voor samesmelting, tot tyd en wyl ons 'n behoorlike indaba gehou het met betrekking tot alle rolspelers in hierdie proses.

Ons voel hier was blatant gediskrimineer teen die verkeershoof van Wellington.

Nooit in enige diensvergaderings met u was dit onder ons aandag gebring hoe ver hierdie proses strek nie.

Al sou ons ook menigmale vra vir die hoof van Gemeenskapsdienste, Johan Lambrechts, en die onderburgemeester, Anthea Sheldon, om in te sit om hierdie aangeleentheid uit te sorteer.

Ons vra dus, gegrond op bogenoemde, dat die vorige status quo behou moet bly, siende baie komponente van die Drakenstein Munisipaliteit, onder meer sport en transport die status quo gehandhaaf word.

Transformeer een, transformeer alles. Behou een, behou alles.

Chris Davids

Die bevinding van die tegniese werkgroep is dat die Hoof: Verkeersdienste korrek geplaas is ooreenkomstig die plasingskriteria.

AS belastingbetaler van Drakenstein Munisipaliteit wil ek graag my ontevredenheid uitspreek oor die dienste by ons plaaslike openbare biblioteke.

In omsendbriewe van die munisipaliteit en die pers hoor ons maar net die indeling van die "begroting" en die bekendstelling van die nuwe uitvoerende burgemeesterskomitee, met 'n salarisskaal wat skrik vir niks!

Tog was daar nie werklik vir ons plaaslike biblioteke se dienste begroot nie.

In Kaap Rapport van 13 Julie lees ek toe oor die Unistad se "Smart Cape"-projekte, wat basiese rekenaargeriewe en "gratis" Internet dienste in openbare biblioteke beskikbaar stel.

Die projekte is alreeds dwarsoor die Skiereiland beskikbaar. Elke biblioteek het vyf rekenaars met toegang tot die Internet, en die geriewe het reeds gehelp dat die plaaslike inwoners werk kry.

Ek dink met die begroting van die Drakenstein Munisipaliteit wat vir skootrekenaars teen 'n beweerde koste van R385 000 begroot, wat volgens my nie regtig nodig is nie, dink ek ons belastingbetalers se geld kan beter bestee word by so 'n projek soos dié van die Unistad, waarby ons hele gemeenskap baat sal vind.

As belastingbetaler wil ek aan die uitvoerende burgemeesterskomitee sê: dink eers twee keer oor die geld wat bestee gaan word aan skootrekenaars, waarvoor nie eens getender was nie, en spandeer dit liewers op gemeenskapsontwikkeling deur rekenaars by ons plaaslike openbare biblioteke te installeer.

Sodoende raak ons gemeenskap rekenaarbewus en werksgeleenthede word moontlik gemaak. Hierdeur kan ons 'n meer "gesonde" Drakenstein Munisipaliteit bevorder.

André Ayford

Elders is daar reeds sogenaamde "internetkafees" waar Jan Publiek teen 'n fooi toegang tot internet kan kry.

DIE stadsvaders en ingenieurs van die Paarl het seker die wêreld se moeilikste taak wanneer dit kom by die ontwikkeling van paaiestelsel van die dorp.

'n Nuwe pad word aangelê, na 'n maand of twee word dit weer opgekap om kabels en pype aan te lê. Word daar nie gekonsulteer met Telkom en ander afdelings gedurende die beplanning nie?

Dubbele rylane word sommer skielik enkelrylane, paaie bottelnek op die mees onverwagte plekke - sonder enige vooraf-waarskuwing.

Hoofstraat is een plek dubbelbaan, dan skielik weer enkelbaan (soos by die stadsaal tot die biblioteek). Dieselfde gebeur in Lady Greystraat en die noordpunt van die Hugenote verbypad.

Dit is ook 'n wonder dat daar nog nie 'n ernstige ongeluk by die T-aansluiting van Orleanslaan by Jan van Riebeeckweg plaasgevind het nie, wat 'n nagmerrie is om by in te draai.

Bekommerd

EK sien mense steel lugklokkies (wind chimes) - wat wil mense daarmee maak?

Myne is ook gesteel - dit het bestaan uit twee groen paddas met hulle handjies in die lug, met 'n ronde deurskynende ring waaraan die metaalstafies hang met die deurskynende skyfies wat teen die metaalstafies slaan.

Jy probeer jou eiendom mooi maak en dan word dit uit jou erf gesteel - hoekom?

Steel jy nou iets klein, is dit later iets groot en land jy binne in die tronk.

Moedeloos

EK wil graag'n spesiale dankie sê aan die Agapé beraders soos Jaco Geldenhuys.

Dankie aan Jaco vir sy hulp, opoffering, liefde vir sy medemens en ondersteuning aan ons moeder tydens haar siekte, asook sy bystand aan ons as familie met haar afsterwe.

Dankie Jaco, God sien jou werk op aarde. Nooit sal ek die dag vergeet nie toe jy my moeder, uitgeteer van die verskriklike siekte wat ons land verwoes, opgetel en man-alleen tot by jou motor gedra het.

Baie dankie ook aan die hospies Luthando vir jul werk en liefde tot met moeder se afsterwe slegs 'n dag later.

Anne Carelse

DIE Drakenstein munisipale area sit op 'n tydbom wat wag om in die somer af te gaan.

Die rede? Die "Fly-incubators" (nuwe wieldrom-vullishouers) het 'n merkbare toename (in ons area) in die aantal vlieë veroorsaak, om nie te praat van die stank as die Paarlse hitte toeslaan nie.

Ja, die munisipaliteit beroem hulle op dienslewering, maar die teenoorgestelde gebeur.

Met slegs eenkeer 'n week vullisverwydering is dit 'n groot probleem as jy vergeet om jou houer uit te sit (wat menslik is). Dan moet jy wag tot volgende week - en dan werk die "Fly-incubators" tog te lekker. Weereens die belastingbetaler wat benadeel word.

Fly-incubator