Thursday: 11 Septembert 2003

This site will be updated on: 19 September  2003 at 17:00

Youth - Jeug

• Vegters van formaat
• Kollege help kinders
• Lenteskool

DIE leerders in die graad 8D klas van Klein Nederburg Sekondêr het twee groot rolmodelle wat saam met hulle die skoolbanke deel.

Richard-Dean Arendse en Melissa Sherman moes albei op vroeë ouderdomme die moeilike stryd teen kanker veg.

Richard-Dean is in Maart 1999 met beenkanker gediagnoseer, nadat sy ouers 'n swelsel op sy linkerknie opgemerk het. Drie maande later is sy linkerbeen geamputeer.

In Augustus 2001 is sy regterbeen ook verwyder nadat die kanker ook daar sy verskyning gemaak het.

Hoewel hy nou in 'n rolstoel oor die weg moet kom en nie meer skool kan bywoon nie, is Richard-Dean steeds 'n moedige jongman wat maklik glimlag.

Melissa het aan die begin van dié kwartaal eers teruggekeer skool toe. Sy is in April met kanker gediagnoseer nadat sy las gehad het van 'n steekpyn in haar regtersy.

'n Doktersondersoek het 'n gewas op haar regternier aan die lig gebring.

Die moedige 13-jarige is 'n week later geopereer en is die gewas sowel as haar nier verwyder.

"Ek was bang aan die begin. Die dokters het gesê dit is kwaadaardig, maar dat die gewas nog nie versprei het nie en dat dit so gou moontlik verwyder moet word," vertel die meisie met 'n skamerige glimlag en trek versigtig die wolmus oor haar kop reg.

Ná die operasie moes sy vir byna vyf maande chemoterapie ondergaan. Sy het nietemin daarin geslaag om verlede kwartaal haar eksamen, alleen in 'n kantoor, af te lê.

Hoewel al die kinders in die skool haar situasie verstaan, is dit haar noue vriendekring wat haar die meeste ondersteuning gegee het die afgelope tyd.

Melissa is nou skoon van die kanker en, sê sy met 'n sagte stem, dit is "baie lekker" om weer by die skool tussen haar vriende te wees.

* Two students of Klein Nederburg Secondary are fighting cancer.

ONDERWYSSTUDENTE van die Wellington-kampus van die Kaapse Technikon bied tans hulp met leerprobleme aan leerders van plaaslike skole uit die benadeelde gemeenskappe.

Daar word hoofsaaklik aan lees, spelling en wiskunde aandag gegee asook motoriese probleme. 

Hulpverlening word twee keer per week aangebied deur studente wat elk twee leerders hanteer, een vir lees en spelling en een vir syferkunde. 

Sewe plaaslike skole word so bedien, maar slegs 'n beperkte aantal leerders per skool kan geakkommodeer word.

By die aanvang word informele toetsing op elke leerder gedoen. Na aanleiding daarvan word 'n analise van probleme en diagnose saamgestel en die programme individueel daarvolgens beplan onder leiding van Irene Lewis, dosent in spesiale onderwys.

Studente werk een dag by die skool terwyl die leerders al om die ander dag na die kampus gaan vir hulpverlening.  v

MATHCARD se Lenteskool by Hoërskool Gimnasium is net om die draai. Dit vind in die skoolvakansie plaas van 29 September tot 3 Oktober.

Die sluitingsdatum vir inskrywings is Vrydag 19 September en 'n groot getal leerders het reeds ingeskryf.

Die vakke wat vir graad 11- en 12-leerders aangebied word, is wiskunde, natuur- en skeikunde en rekeningkunde.

Belangstellende leerders wat nog wil inskryf, moet vinnig spring om teleurstelling te voorkom.

Volledige brosjures met inskrywingsvorms is beskikbaar by Hoërskool Gimnasium, Pam Golding, De Jagers Uitrusters, Waltons, Westermans Apteek (Noorder-Paarl) en Wellington Toerismeburo.

Vir meer inligting, skakel 872-0307 of 082-854-3611.