Hulle is teen middernag, ná 'n rojale kreefmaaltyd en wyn, na hul huisie 75m van die see. Leilani sou die volgende oggend gaan draf het, en Pierre sou met 'n motorfietsie agterna gery het.

"So voor nege het Leilani my skielik aan die arm gegryp en gegil. 'n Brander so hoog soos 'n dubbelverdieping het op ons afgerol. Hy was vyf meter van ons af, en het al gebreek in 'n swart- en wit skuimmassa.

"Die glas van die skuifdeure het meegegee en ons is met matras en al van die bed afgegooi tot teen die dak.

"Ons is in die badkamer ingespoel, en ek is deur die venstertjie uitgedruk. Leilani het agter 'n kas vasgesit tot ek haar kon uittrek.

"Toe sit ons op die muurtjie om ons buitestort. Ek sê nog 'Bok, ons is nou veilig', toe hoor ons die mense skree. En toe kom die volgende brander."

Die twee het geklim tot op die nok van hul huisie terwyl Pierre die heeltyd gedink het 'dis 'n nagmerrie, dit sal verbygaan'. Toe tuimel die baksteenhuisie soos 'n kaarthuis inmekaar.

"Die krag van die water het ons uitmekaar geruk. Ek het water gesluk, in goed vasgespoel, onder die water gerol, en toe in 'n palmboom vasgespoel."

Daar het Pierre vir lewe en dood vasgehou terwyl meubels en opdrifsels teen hom vasgespoel het.

Hy het dit toe nie besef nie, maar Leilani is deur die water hoog in 'n ander palmboom gegooi.

"'n Mercedes, een van daardie oues met die regop ligte, het by my verbygerol in die water.

"Mense kom by jou verby, en word deur die water teen die tralies van 'n gebou doodgedruk.

"Ek het om hulp geskree terwyl almal hardloop, so 800m van die strand af. 'n Chinees het op die derde verdieping van 'n hotel omgedraai, en 'n reling afgetrap na my toe. Dit was toe net bokant die water.

"Ek is so dankbaar vir al hierdie mense. Die man hoef nie te gehelp het nie. Hy was op soek na sy vrou."

Teen daardie tyd was mense se klere van hul lywe afgeruk. Die Chinees het vir Pierre 'n broek gegee wat veels te klein was.

"Ek het niks gehad nie, en van toe af, elke keer as ek moet klere wissel, moet die te-klein geleende klere van my lyf afgesny word," dink hy terug met 'n glimlag.

Toe sien hy vir Leilani in 'n palmboom sit. Twee mans het op mekaar se skouers gestaan en haar afgetel. Sy het diep wonde gehad, en vreeslik gebloei.

Dis toe dat mense skree "nog water". En weer moes hulle vlug.

Daar was vier groot branders, met tussenposes van so vyf minute, onthou Pierre.

"Ons het begin hardloop na die berge toe ons by 'n motor kom."

"Ek ry", het Pierre aan die Thaise vrou gesê. Maar skielik was daar weer water voor hulle en hy moes die motor deur 'n bos draai.

"Dis toe dat die vrou die sleutel uittrek omdat ek haar kar 'breek'.

"Toe moes ons ook loop. Dit het stadig en sukkel-sukkel gegaan, want Leilani het al baie bloed verloor en was baie swak.

"'n Boomstomp het haar bors deurboor, sy was oortrek van diep snye en wonde, en senings in haar linkervoet is erg beskadig."

'n Man van Bangledesh het saam aangesukkel. Sy voete was sleg gesny. Hy het sy vrou en seun verloor en was toe van sy dogtertjie geskei.

Leilani het al flouer geword en was byna bewusteloos toe sy begin Sondagskoolliedjies sing.

"Ek wil huil as ek dink dat ons lewend daar uitgekom het. 'n Tiplorrie het ons van die berg af kom haal. Ek het gedink ons kom nooit by 'n hospitaal nie.

"Die goedheid van die Thaise mense kan ek nie beskryf nie. Ons is met 'n bakkie na die eerste hospitaal geneem, maar dit was vol.

"Toe 60km verder na 'n vloothospitaal, waar hulle gesê het Leilani is te ernstig beseer.

Hulle het vir haar 'n drup gegee en uitgestuur. Op die bakkie het 'n Sweedse veearts die binneaarse drup aangesit."

Hulle moes 120km verder na die volgende hospitaal. Saam op die bakkie was 'n Rus met twee bottels vodka. Die een het hy op sy vrou en Leilani se wonde gegooi totdat sy gesê het dis nou genoeg.

"Toe sê hy nog die bottel is byna leeg, en die tweede gaan hy uitdrink. Die Rus se vrou is later oorlede."

Agt uur nadat die eerste brander hulle geslaan het, het hulle by 'n hospitaal aangekom waar hulle opgeneem is.

Daar is die letters SA en 'n nommer op hul lywe geskryf en is hulle na sale geneem. Laatmiddag die volgende dag is Leilani se wonde toegewerk, en Pierre s'n nog 'n dag later, die Woensdag.

"Leilani is verdoof vir die operasie, maar teen die tyd dat hulle by my hand gekom het, was die verdowingsmiddels al op.

"Die dokter wou twee van my vingertoppe afsit, want toe was daar erge infeksie, en hy het nie tyd gehad vir lank aan my werk nie. Ek kon hom darem oorreed om eerder die snye net met 'n steek te heg. Gelukkig is my vingers gered."

"Die eerste dae het ons rys en water gekry, en daarna het die plaaslike inwoners vir ons vis en hoender gebring, en vir ons lemoene gevoer omdat ons hande so stukkend was."

Die Donderdag het die Sweedse regering hul burgers begin uitvlieg. 'n Vrou het haar plakker vir Leilani gegee.

"Ek het net gepleit 'I'm husband', en oral saamgegaan."

Weer is die Le Roux's 80km ver agter op 'n bakkie, met komberse wat die inwoners vir hulle gegee het.

"Dit was stamperig en seer, maar ons was op pad na Phoeket.

"Die Thaise lugmag het ons na Bangkok gevlieg waar ons saam in 'n private saal opgeneem is. Leilani is geopereer en 'n handvol sand en gras is uit die septiese wond op haar bors uitgehaal.

"Die Thaise regering was wonderlik. Hulle het enige vorm van dominee na die hospitaal gestuur om ons by te staan."

Vrydag is Leilani in 'n Johannesburgse kliniek opgeneem waar nog twee operasies uitgevoer is.

Tans sterk sy by haar familie in Mosselbaai aan, terwyl Pierre haar net lank genoeg daar laat om nodige papierwerk op Wellington uit te pluis.

So tussendeur kan hy glimlag.

"Ek het lekker gewig verloor van die rys en water. En ek sal nou nooit daardie trourok sien wat toegesluit was in 'n tas (sodat ek nie kan loer nie).

"Die tas het met sy verskriklike rooi lint (sodat ons dit dadelik op lughawens kon uitken) met die vloedwater by ons verbygedryf.

"Dan is daar my Cat stewels wat Leilani niks van gehou het nie. My koffer het 5kg meer as hare geweeg, en toe raas sy nog omdat dit glo my swaar skoene is. Ek sweer daardie stewels staan nog vas op die fondasie van ons huisie.

"Ek het 'n ander mens teruggekom. Die branders en die water sal ek vergeet, maar die dood en die kinders kan ek nie verwerk nie.

"Nou word ons oorweldig deur die goedheid van vriende en die belangstelling van vreemdelinge. 'n Mens voel baie klein.

"Leilani sê sy hou van nou af net in die Kruger Wildtuin vakansie.

"Ek weet ek sal weer teruggaan Thailand toe. Ek wil vir die mense daar gaan dankie sê."

* A Wellington couple, injured and traumatised by the tsunami in Thailand, are relieved to have lived through the ordeal.

ARSON is suspected after a large section of Paarl Mountain nature reserve was swept by a veld fire which started on Sunday last week, and lasted for four days.

An estimated 450 hectares, mostly fynbos in the mountain reserve, were destroyed.

Arson is suspected, as a fire was lit near Jan Phillips Mountain Drive 1500m north of the Mill Water Flower Garden.

The first smoke was spotted shortly after 16:00 on Sunday afternoon.

The blaze quickly spread due to a strong southeasterly gale, which pushed the flames northwards.

Residents of Groenvlei and owners of thatched homes in die area feared for the worst.

The fire continued to burn strongly on Monday, damaging some vines high up on the farms Keurfontein, Vredenhof and Eureka in northern Paarl.Helicopters were used to draw water from farm dams to douse the flames.

More than 90 firefighters and municipal workers were deployed every day in efforts to contain the blaze.

A fire tender slipped down a slope on Tuesday night, and could only be removed from the mountain on Wednesday.

At one stage farmworkers' houses were threatened but the fire was finally contained on Wednesday when firemen started a counterfire on the peak of the mountain.

"The dedication of Drakenstein firemen, the willingness of fire brigades of the Winelands and Stellenbosch municipality, and the aid of farmers are to be applauded," said fire services chief Derick Damons.

'n BEAMPTE by die padwaardigheidseksie van die verkeerstoetsstasie in Daljosafat, is na bewering betrokke by die werksaamhede van 'n voertuig- diefstalsindikaat.

Skokgolwe het verlede week deur die Vallei gedreun met die inhegtenisname van die verkeersman Arrie Cloete van Moolmanstraat, Paarl, asook Wellingtonse besigheidslui wat na bewering in onwettige voertuigtransaksies betrokke sou wees.

Die Wellingtonse sakeman Herman Louw en sy skoonseun Johannes de Jongh ('n wynmaker van Bottelary), die Wellingtonse motorhandelaars Deon Wiggins, Bennie Wiggins en sy motorverkoopsman Quinn Hough word van bedrog beskuldig.

'n Span polisielede het Vrydag vroegoggend tegelyk met lasbriewe vir arrestasie by die wonings van die mans toegeslaan.

Behalwe Bennie Wiggins, wat met vakansie was, is die mans na die Strand polisiestasie geneem. Hulle is laatmiddag almal op borgtog van R2 000 vrygelaat nadat die borgaansoek van advokaat Alnero de Villiers, wat vir Deon Wiggins optree, toegestaan is.

Die optrede was 'n nadraai van die arrestasie verlede jaar van Danye Louw, eienaar van Boland Trade Centre in Kerkstraat, Wellington, en die beslaglegging op gesteelde voertuie by sy woning in Berg-en-Dal en by sy sakeperseel. Uitgebrande onderstelnommerplaatjies is in die Louws se braaiplek ontdek.

Danye (28) is aangekla van die diefstal van sewe voertuie asook sewe klagtes van bedrog.

Hy is twee dae lank aangehou in die Strand, waar 'n Mitsubishi Pajero kort tevore gesteel is, voordat hy in die landdroshof daar verskyn het.

Borgtog van R2000 is toegestaan en die saak is tot 9 Februarie uitgestel. Dit is ook die datum waarop die ses ander beskuldigdes weer in die hof sal verskyn.

Kort ná sy inhegtenisname is daar ook beslag gelê op 'n gesteelde vierwielmotorfiets en drie  motorenjins wat deur sy pa, Herman Louw, by 'n kennis gestoor is.

Hierdie week het 'n erg ontstelde Deon Wiggins van Deon Wiggins Motors in Stokeryweg die Paarl Post met sy prokureur, Bokkie Duvenage, genader.

Toe die ondersoekbeampte, insp Randy Wessels, se nommer (918-3000) in Oktober  in die Paarl Post verskyn het, het Deon hom dadelik geskakel.

"Ek het 12 voertuie by Danye Louw gekoop en van hulle is herverkoop. Ek het niks gehad om weg te steek nie. Ek het elke keer die regte pad met die registrasie geloop en die polisie wat die papiere, enjin en onderstelnommers nagegaan het vir klaring, het niks ongerymds opgetel nie.

"Nou blyk dit egter dat twee voertuie gesteel was voordat ek dit by Louw aangekoop en laat finansier het."

Omdat die saak sub judice is, kan getuienis nie bekend gemaak word nie, maar Deon wil tog die publiek waarsku oor hoe onskuldiges in 'n strik kan trap en baie geld kan verloor.

'n Motor word gesteel. Dan word die papiere en enjin- en onderstelnommer van 'n afgeskryfde voertuig van dieselfde fabrikaat en model na dié voertuig oorgedra.

Op die oog af lyk alles reg, en die handelaar (aankoper) neem die voertuig vir polisieklaring, en daarna vir registrasie en finansiering.

"Maar selfs dán kan ongerymdhede oorgesien word," sê Deon.

"Mense wat privaat koop, moet self die geskiedenis van die voertuig nagaan en ook 'n polisieklaring kry nog voordat hulle betaal."

Volgens Duvenage is daar regstappe ingestel teen Louw vir die onkoste van die twee transaksies - wat meer as R100 000 beloop.

"Daar word ook regstappe oorweeg teen die polisie weens onregmatige arrestasie en nalatigheid met die klaring."

Volgens verkeershoof Japie Cornelissen gaan die werksaamhede van die padwaardigheidseksie voort soos normaal.

"Korrupsie en wanadministrasie is onaanvaarbaar. Ons betreur die voorval en vertrou dat die feite spoedig openbaar gemaak sal word."

Die publiek word aangemoedig om met navrae, of indien hulle bewus is van korrupsie, die verkeershoof te skakel by 872-4755.

Volgens insp Wessels kan nóg optredes volg.

* A traffic official and Wellington businessmen have been arrested in an investigation involving alleged vehicle theft and fraudulant registration.

'n STUDENT het die vakansietyd in die munisipale swembad in Wellington verdrink.

Ameul Fransman (23) van Desmorestraat 26, Wellington, het waarskynlik die Woensdag oudergewoonte aan die vlak kant afgekoel.

"My seun kon nie swem nie, en ons glo dat hy ingestamp is," het sy hartseer pa, Pieter Fransman, gesê.

"Dis so ontstellend. Daar is geen lewensredders nie, geen noodhulpfasiliteite nie. Ek weet toegang tot die swembad is op eie risiko, maar dis baie moeilik om te verwerk.

"Ameul was so 'n wonderlike seun. Hy was altyd met almal vriendelik. Daar was seker 500 mense, van oud tot jonk, by die begrafnis."

Hy het aan Bergrivier Hoërskool gematrikuleer en het verder studeer as rekenaaringenieur. Ameul word oorleef deur sy ouers, Pieter en Catherine, sy broer Juwayne (17) en suster Kaylin (3).

* Einde verlede jaar is 'n Kaapse besoeker dood nadat hy in 'n swembad by die Bergrivier vakansie-oord in Suider-Paarl onder die water verdwyn het.

* In nog 'n tragiese sterfte het 'n 10-jarige meisie, Sasha-Lee Hendricks van Eersterivier, op Nuwejaarsdag gesterf nadat sy by Wiesenhof aan die Klapmutspad in 'n vlak swembad gekry is.

Daar was die dag meer as 2000 mense by die ontspanningsoord.

'n Besoeker het noodhulp op die bewustelose meisie toegepas tot die ambulans opgedaag het, maar tevergeefs.

* 'n Middeljarige vrou, Jacoba Strauss, het einde verlede jaar in 'n plaasdam op die plaas Dennegeur by Franschhoek verdrink.

* Vrydag is die liggaam van 'n man, bekend as die hawelose "oom Tier" in die water onder die Lady Greystraatbrug oor die Bergrivier ontdek.

Hy het onder die Markstraatbrug gewoon totdat hy in die water beland het, enkele dae voor die ontdekking van sy lyk. "Oom Tier" het vermoedelik aan natuurlike oorsake gesterf.

* A young man drowned in the Wellington municipal swimming pool, one of many drownings during the festive season.

[ Top ]

Tel: (021) 871-1170 - e-mail: edit@paarlpost.co.za  

[ Top ]