|
'n LEERDER van Laerskool Gimnasium, John Henry Collins, het in Desember deelgeneem aan 'n interkerklike gedenkdiens vir die Tygerberg Kinderhospitaal.
John Henry, 'n graad 6-leerder, het "Song of the Cross", gesing saam met sy tannie, Wena Moelich.
Wena het die lied gekomponeer spesifiek vir die geleentheid, en toe besluit om 'n kind te betrek by die singery - en kon toe sommer so binne familie-verband op John Henry se nommer druk.
John Henry is goed bekend in die Paarl vanweë sy sang-prestasies.
Die gedenkdiens is gelei deur die aartsbiskop Desmond Tutu, beskermheer van die Kinderhospitaal. Kinders, sommige in rystoele, het papierblomme aan die aartsbiskop oorhandig, asook 'n unieke Christusbeeld gemaak en geskenk deur die kunstenaar, Carroll Boyes.
Die Tygerberg Kinderhospitaal is in 2000 bekendgestel en is in die 10 verdieping G-vleuel van die Tygerberg Akademiese Hospitaal. Jaarliks word 16 000 babas en kinders toegelaat en meer as 100 000 kinders word jaarliks as buitepasiënte hanteer.
Navorsing word onder meer gedoen op tuberkulose, MIV/Vigs, kanker en die hantering van pasgebore babas en die swanger moeder.
Die hospitaal bied ook 'n skole-uitreikprogram aan, met 'n paar sangitems, elektroniese aanbieding, asook die Tyger Tier (in kostuum).
Skole kan vir Wena Moelich kontak by 938-9225 (soggens) of 083-233-8311. Hoërskole is ook welkom - die program word aangepas by hulle behoeftes (bv die kwessie van MIV). |
WENNER. 'n Trotse Ricardo Hendricks van die Klopse-troep die Tulips, het die tweede agtereenvolgende jaar die senior solo-sangitem by die Klopsekompetisie op Wellington gewen. Hy is, soos die vorige keer, op die kitaar begelei deur Arthur Klaase. Ricardo, wat in die Paarl woon, wil aanhou deelneem, want, sê hy, wen jy vyf keer ná mekaar, is daar 'n spesiale prys. Foto: Malané Bosman