DIE Suid-Afrikaanse nasionale fietsryspan het Vrydag op Bellville die Drienasies Byeenkoms oorheers.

Dié span onder leiding van JP van Zyl het die aand geen gelyke gehad nie en die spanne van Duitsland en Italië met eersteklas fietsry oortref. Hoewel die Federasie span ook moedig probeer het, kon hul nie die prestasie van hul Suid-Afrikaanse eweknieë nadoen nie.

Die Italiaanse span was egter ongelukkig deurdat hul wêreldkampioennaelryer, nog voor die amptelike begin van die byeenkoms sy sleutelbeen gebreek het, nadat die band van sy wiel afgekom en hy geval het. Hy is inderhaas hospitaal toe gejaag. Dit het die Italianers se aanslag grotendeels verswak.

Plaaslike ryers Garth Thomas (Proteas) asook Ashley Kulsen en Colin Parsons wat vir die Federasie span gery het, het hul baie goed van hul taak gekwyt.

Dit was veral in die puntewedren, uitvalwedren, en Madison waar Thomas homself laat geld het.

Hy was op pad na 'n derde plek in die uitvalwedren toe sy afrigter hom opdrag gegee het om te rus, 'n taktiese skuif maar vir die baie Paarliete wat die byeenkoms bygewoon het, ietwat van 'n teleurstelling.

Thomas het ook in die puntewedren punte ingesamel maar toe sy spanmaat in 'n wegbreek betrokke was, moes hy in die bondel bly.

Sukses het vir hom in die madison gewag toe hy en spanmaat, Robbie Dale, 'n derde plek behaal het, ten spyte daarvan dat dit die eerste keer was wat hulle in die item saamgery het.

Parsons en Kulsen het wel nie plek gekry nie, maar was nietemin sterk kompetisie vir die ander ryers.

Oormôre kry Paarliete geleentheid om weer die gewilde madison-item op die Faurestraat Stadion te aanskou.

Die laaste madison-wedren wat hier gery is, is deur Parsons en Dale gewen.

'n Misverstand in die laaste rondtes tussen Kulsen en Thomas het beteken dat hulle met 'n derde plek tevrede moes wees.

Indien genoeg spanne opdaag sal die madison oor 50 rondtes bepaal word. Die byeenkoms maak voorsiening vir wedrenne in al die kategorieë en begin om 14:00.

DIE top-atleet van Paarl Gimnasium, Monique Balsamo (regs), neem hier die voortou in die 400m hekkies vir dogters o.19 tydens Saterdag se Boland Ussasa atletiekkampioenskappe op Daljosafat.

Balsamo het die rekord in dié item verbeter met haar tyd van 60,47s, asook 'n rekord in die 100m hekkies verbeter met 'n tyd van 14,6s. Sy het ook eerste geëindig in die 100m (12, 40s).

 Balsamo is een van sewe Gimmies wat in die Boland span opgeneem is. Claud-Marie du Toit het in die hamergooi vir meisie o.19 die rekord met bykans 10m verbeter met haar afstand van 41,82m. Louw Smit se tyd van 12,70s in die 90m hekkies vir seuns o.14 het verseker dat sy naam voortaan in die rekordboeke sal pryk.

 Gert Scoombie (o.15), Theo van Huysteen (o.17), Christoffel Hartley (o.19), Proppie van der Merwe (o.19) en Claud-Marie du Toit (o.19) is in die Bolandspan opgeneem en sal in die hamergooi deelneem terwyl Kobus van Wyk (o.17) in die 100m en 200m sal meeding tydens die SA atletiekkampioenskappe wat op 22 Maart in Germiston aangebied word.       

'N DRIE in die doodsnikke van sy wedstryd teen Raithby, het Albions Saterdag stert tussen die bene na die Paarl laat terugkeer.

Albions het van die begin af die botoon gevoer, met veral die voorspelers wat onder leiding van die haker, Brendon Hendricks, oorheers het.

Agterlangs het die twee spanne gelyk opgeweeg, maar balbesit wat die besoekende agtal gekry het, het meer geleenthede in Albions se rigting gegooi.

Vroeg in eerste helfte breek Adam Moeraf deur 'n gaping en stuur vir Lincoln du Preez weg om Albions se eerste drie te druk.

Die Paarliete hou vol met hul aavallende hardlooprugby en slaan gapings links en regs.

'n Moedelose Raithby het in 'n poging om die aanslag te stuit, die een strafskop na die ander afgestaan met een wat tot 'n strafdrie lei.

Heelagter John Stevens verdoel en Albions loop 12-0 voor. Kort voor rustyd druk die tuisspan wat die rustydtelling op 12-5 te staan bring.

In die tweede helfte druk Raithby nog twee keer en wen die wedstryd 12-17.

Die tweede span wen 36-0 en die derde gekeurdes speel gelykop 3-3.

Albions speel Saterdag weg teen Franschhoek United.

Gemengde sukses

In 'n harde wedstryd in Kylemore het die tuisspan 'n naelskraap 7-6 oorwinning oor Rangers behaal.

Mark Adams slaag met 'n skep- en strafdoel. Arnold Fortuin druk vir Kylemore.

Rangers II verloor 19-0 terwyl die derde span 22-12 seëvier. Rangers speel op 23 Maart weg teen Franchhoek.

Die Rooi Rose van Gardens het Saterdag op Gardens Park vir Paarl 11-5 geklop. Jeremy Hammers het vir Gardens gedruk terwyl Jerry Vermeulen met 'n skepdoel en strafdoel geslaag het.

Warriors het Paarl United Saterdag met 18-7 geklop. John Salon en Gavin Fortuin het Warriors se drieë gedruk, met Joos Pieterse wat met twee strafdoele en een doelskop suksesvol was.

Young Peoples het Saterdag op Saldanha sy goeie vorm voortgesit toe hy die tuisspan met 24-16 geklop het. Vir Peoples het Jacques Lategan, Justin Fortuin en Hugan Andersen (2) drieë gedruk. Bernard Davids het twee doelskoppe behaal.

Peoples speel Saterdag om 14:00 teen UWK op die Boy Louw velde.

DIE Boland Korrektiewe Diens Atletiekklub van Drakenstein hou eerskomende Woensdag sy sesde 10km Aandwedloop.

Die wedloop volg vanjaar 'n ander roete weens die padwerke aan Hoofstraat. Drawwers sal tydens registrasie die nuwe roete verneem.

Die Aandwedloop wat sedert sy ontstaan nog elke jaar in gewildheid gegroei het, het 'n reeks kontantpryse op die spel. Wenners in die senior mans en vroue afdelings wen elkeen R150, met tweede en derde plekke wat onderskeidelik R100 en R75 sal inpalm.

Die eerste veteraan man en vrou sal elkeen met R100 beloon word, terwyl die mans- en dameswenners van meesters, groot meesters en juniors elkeen die kans staan om R75 te wen.

Die wedloop begin om 18:30. Die inskrywingsgeld is R15 en atlete moet in hul klubkleure draf. Stappers is ook welkom.

Vir meer inligting skakel David Strauss by 862-3299 of 083-980-6495.