|
TEN spyte van een van die droogste jare in die geskiedenis, en bykomend daarby lae pryse wat deur produsente behaal is, het WPK
self 'n goeie jaar beleef.
Dit is die trant van die voorsittersverslag wat deur George Eksteen, Voorsitter van WPK Beleggings met sy hoofkantoor op
Malmesbury, tydens die algemene jaarvergadering op 2 Desember gelewer is.
Ondanks 'n matige groei van slegs 4,7% in omset, het WPK se wesensverdienste toegeneem met 58% tot R43,7 miljoen.
Aandeelhouersbelang as persentasie van totale bates het toegeneem tot 42,9% en rentedraende skuld beloop 27,8% van totale bates
aangewend.
Volgens Eksteen is die verbeterings toeskryfbaar aan hoofsaaklik nie-bedryfsaktiwiteite soos laer rentekoerse en inkomste uit
beleggings asook kostebesparings.
WPK is die grootste enkele aandeelhouer in Pioneer Voedselgroep wat oor die jaar ook uitstekend presteer het.
WPK het vanjaar die eerste keer 'n dividend van R5 miljoen verklaar.
Eksteen het ook tydens die vergadering aangekondig dat die Direksie besluit het om die skuldbriewe van lede terug te betaal wat die
totale uitkerings aan lede op R10,3 miljoen te staan bring.
Corwyn Botha, Besturende Direkteur, het in sy rede gesê dat die huidige sterk randwisselkoers groot druk op landbouprodusente plaas
en dat produkpryse onder druk gaan bly.
Die groot uitdaging gaan wees om, indien en wanneer die mededingingskommissie die beoogde samesmelting met Boland Agri in 'n nuwe
Kaap Agri goedkeur, die sinergisme van die twee ondernemings saam te voeg tot voordeel van produsente en aandeelhouers.
WPK verwag die uitslag van die mededingingskommissie vóór einde Januarie.
Die pas afgelope graanoes in WPK se gebied was weereens ondergemiddeld, alhoewel produsente nie heeltemal so erg getref is soos die
meer noordelike deel van die Swartland nie.
Daar is egter ook gebiede waar die oes as swak beskryf kan word en teen die huidige pryse realiseer produsente tans kwalik sowat
R1000 per ton.
|
