Sport

• Paarl veg hard
• Nou of nooit vir Peoples
• Vineyards is ligakampioen
• Juksie-talent gesoek
• Watsonia vertrap Young Gardens
• Paarl Krieketklub vereer spepelers
• Paarl Soccer Club scores with promotion

ONDANKS 'n karaktervolle terugvegpoging moes die eerste span van Paarl Rugbyklub Saterdag met 'n 29-26 nederlaag in hul wegwedstryd teen Primrose tevrede wees.

Die besoekers verdien beslis 'n klop op die skouer vir die wyse waarop hulle van hul 21-3 agterstand met rustyd teruggeveg het, en met twee bonuspunte terug huis toe is.

Die omgesukkelde Paarl span het dan ook vier drieë gedruk in die tweede helfte toe Philip van Staden, Morné Kershoff, Marco Martin en Jacques Hendricks agter die doellyn gaan kuier het.

Hendricks was ook in die kol met drie doelskoppe.

Die wedstryde is egter in 'n gespanne atmosfeer gespeel, met geniepsige spel wat handuitgeruk het in aldrie wedstryde.

In die tweede span wedstryd is die Paarl-haker, Heinrich Foster, se oogvlies geskeur nadat 'n Primrose-speler sy vinger in Foster se oog gedruk het. Hy moes Saterdagaand steke ontvang.

In 'n doktersverslag aan die WP Rugbyunie skryf dr Edwin Jordaan: "Ek sien die geval as aanranding met die doel om ernstig te beseer."

Die kaptein van die tweede span, Dawie Aggenbag, het vroeg in die tweede helfte sy span van die veld gelei nadat die Paarliete nie meer die vuilspel kon hanteer nie.

In die derde span wedstryd is daar ook twee Paarl-spelers beseer weens ontoelaatbare spel.

Die eerste span wedstryd het ook heelwat strafkaarte opgelewer.

Paarl se tweede en derde spanne het 24-5 en 32-10 verloor.

Die bestuur van Paarl Rugbyklub sou gisteraand vergader om te bespreek of die klub 'n klag by die Westelike Provinsie Rugby Voetbalunie gaan indien.

"Die spel wat gespeel is, was nie 'n openlike bakleiery nie, maar was definitief geniepsig, veral in die losskrums," het Bertus Valentyn, bestuurslid van Paarl Rugbyklub gesê.

"Die eerste span wedstryd het in dieselfde trant verloop. Die gees waarin die wedstryd gespeel is, was verkeerd met veral seker spelers wat doelbewus té geniepsig gespeel het," het Valentyn wat die wedstryd aanskou het, Woensdag gesê.

Ten opsigte van die belangrike kragmeting en laaste ligawedstryd teen Young Peoples Rugbyklub wat Saterdag op Faurestraat gespeel word, kan die Tiere 'n harde stryd te wagte wees.

"Dit is net nog 'n wedstryd wat ons wil wen om ons doel te bereik en dit is om in die boonste helfte van die eerste liga punteleer te eindig," sê Valentyn.

In antwoord op of die Tiere enige gunste van hul Paarlse bure te wagte kan wees, sê Valentyn: "Ons gaan nie die wedstryd gooi nie. Ons benader dit soos enige ander wedstryd. Ons wil die seisoen afsluit met dieselfde toewyding as waarmee ons dit begin het."

WANNEER hul laaste wedstryd Saterdagmiddag om 16:00 afskop sal dit 'n reg of weg situasie wees vir die eerste span van Young Peoples Rugbyklub.

Peoples met 33 punte is tans tweedelaaste op die punteleer van die WP se eerste liga, 'n punt agter Belhar.

Peoples moet Saterdag hul wedstryd teen Paarl op Faurestraat Stadion wen, maar moet dan ook duim vashou dat Silvertree vir Hamlets klop en dat laasgenoemde ook nie twee bonuspunte verdien nie.

"Ons het te veel beserings om nog enige veranderinge aan te bring voor Saterdag se belangrike wedstryd maar die spelers is almal positief en weet wat hulle moet doen," het Trevor Davy, van Peoples Dinsdag gesê.

* Paarl Rangers sak ook af na die derde liga. Op 25 punte is hulle in die tweedelaaste plek van die tweede liga en agt punte buite bereik van die derdelaaste span, Caledonian Roses.

* Vineyards het Saterdag die vyfde liga gewen toe hy vir Sir Lowrians geklop het. Vineyards op 71 is nou buite bereik van die Strand Pioneers wat tweede lê met 65 punte. Dié twee spanne speel Saterdag in die Strand teen mekaar.

* Young Standards dobber net buite die relegasiesone in die derdelaaste plek van die vierde liga met 38 punte.

Die Paarliete is egter net 'n enkele punt voor Kylemore en dié twee spanne speel Saterdag teen mekaar.

DIE eerste span van Vineyards Rugbyklub het Saterdag op skouspelagtige wyse hul plek as kampioene van die WP se vyfde liga verseker deur Sir Lowrians op Daljosafat 48-19 te klop.

Vineyards het in die proses sewe drieë ingeryg en die toeskouers trakteer op mooi hardlooprugby.

Die tuisspan is egter binne die eerste vyf minute stil gespeel toe die flank, Abbas Hendricks, se skop in die kwartgebied afgestorm is en Sir Lowrians deurstorm en druk.

Vineyards het egter dadelik teruggeantwoord met Adli Moerat (losskakel) wat ook 'n skop afgestorm en self gaan druk het.

'n Drieë-fees het gevolg met Anwar Dulvie (skrumskakel), John Koopman (heelagter), Hendricks, Wasfie Nackerdien (flank) en Moses Crouse (2, senter) wat agter die doellyn gaan kuier het.

Arief Slamdien se drie strafskoppe en twee doelskoppe het die 48 punte volgemaak.

Crouse is as man van die wedstryd aangewys.

Vineyards het die groot sege behaal sonder sy groot staatmaker, Adam Moerat, wat verlede week met 'n handbesering gesukkel het.

Dié woelige losvoorspeler sal egter Saterdag weer in aksie wees vir sy span.

Die tweede span het 33-6 verloor en die derde span het 5-0 gewen.

Hoewel Vineyards reeds die liga gewen het, is Saterdag se wedstryd teen Strand Pioneers (wat tweede op die punteleer lê) nog van groot belang.

Vineyards het tans 71 punte teenoor Pioneers se 65.

"Ons ag die wedstryd baie belangrik veral ten opsigte van dissipline. As daar miskien 'n bakleiery uitbreek en ons word gestraf deur punte wat afgetrek word, kan ons die eerste plek verloor," het Ganief Dulvie van Vineyards gesê.

Die bus vir Saterdag se wegwedstryd vertrek om 12:00 vanaf D'Elite Take Away. As bedanking vir hul lojale ondersteuning die seisoen, sal alle toeskouers verniet kan saamry.

DAAR is Saterdag 'n groot tree gegee om weer 'n junior jukskeiliga in die Boland gevestig te kry, toe 'n Skoledag in die Paarl gehou is.

Dit is die eerste keer in jare dat daar weer so 'n toernooi vir junior spelers aangebied is, en hoewel die getalle nog klein is, word daar verwag dat die toernooie sal groei.

Dit was grotendeels net laerskoolspanne met heelwat beginners wat Saterdag deelgeneem het, met 45 nuwe spelers wat die bane volgestaan het.

Twaalf spanne van Paarl, Wellington, Robertson, Worcester en Caledon het vir die toernooi ingeskryf, met elke span wat twee wedstryde gespeel het.

Die entoesiasme onder die jong klomp voorspel 'n selfs beter opkoms by die volgende Skoledag-toernooi wat op 16 Oktober op Worcester gehou sal word.

Die doel van dié toernooie is om jukskei aan meer kinders bekend te stel en daar gaan binnekort ook meer skole betrek word met 'n kompetisie vir hoërskole.

'n Juniordag word Saterdag op Wellington gehou gevolg deur die Kaapland Interskole 'n week later ook op Wellington.

Skole wat belang stel om by die kompetisies in te skakel, kan die Boland Juniorkomitee skakel by 873-2775 (Nelius, Paarl), (023) 313-4899 (Paul-Daniël, Worcester) en 873-2454 (Jannie, Wellington).

DIE eerste span van Young Gardens is Saterdag op Vygieskraal deur die derde liga kampioen, Watsonia, met 51-15 vertrap.

Gardens het sy eerste span spelers gebruik om sy tweede span te versterk wat 'n kans staan om sy afdeling te wen. Die Paarliete se tweede span het dan ook 14-12 gewen en só sy kanse om bo-aan die punteleer te eindig, lewend gehou.

Gardens se derde span is vanjaar die kampioene in hul afdeling ná hulle wegholsege van 65-3.

Twee drieë deur Riaan Daniels en Rajeen Bothma asook 'n straf- en doelskop deur Chesley Theo het die eerste span se punte uitgemaak.

Gardens speel Saterdag tuis teen Windmeul United en dit sal die laaste wedstryd wees vir Gardens se veteraan-stut, Chrisbin Meyer. Meyer het al meer as 300 wedstryde vir Gardens gespeel.

DIE Paarl Krieketklub het Saterdag tydens sy jaarlikse prysuitdelingsfunksie spelers vereer wat verlede seisoen presteer het.

Tydens die geleentheid is Erasmus Hendrikse as speler van die jaar en beste kolwer in die Super Liga aangewys.

Hilton Solomon en Anwell Newman het die trofee vir sportman van die jaar gedeel.

Ander trofeëwenners was Alfredo Adams (beste bouler in Superliga), Cameron Cupido (beste bouler in Tweede Liga), William-Anthony Petersen (beste kolwer in Tweede Liga en mees belowende speler), Graham Adams (mees gevorderde speler), Carlo Crotz (hoogste telling), Rohan Goetham (beste boulsyfers), Nico Roos (beste bouler in Derde Liga) en Kelvin Beffels (beste kolwer in Derde Liga).

Tydens die geleentheid is ook aangekondig dat Novel Motoring Company die Paarl Krieketklub in die komende seisoen gaan borg.

Die klub hoop om sy verhouding met die nuwe borg verder uit te brei en spreek sy dank uit teenoor Novel Motoring Company vir die borgskap.

Sondag speel die eerste en tweede spanne van Paarl Krieketklub teen St Augustine's Krieketklub van die WP. Wedstryde begin om 10:00 op die Parys-velde en sal oor 50 boulbeurte beslis word.

Oefeninge vind plaas op Dinsdae (19:00 by Boland Park) en Donderdae om 17:00 by die Parys krieketvelde. Spelers word versoek om oefeninge by te woon met die oog op die vriendskaplike wedstryde en die eerste ligawedstryde wat op 2 Oktober begin.

Alle nuwe lede is welkom om die oefeninge by te woon.

THE Paarl Soccer Club's successful season paid dividends on Monday when they were crowned the division champions after beating Baltic Rangers 1-0.

Going into their last league match of the season Paarl's first team was second on the log with 37 points. Their opponents Baltic Rangers were the log leaders with 38 points effectively turning Monday's clash into an outright final.

The Paarl team stunned the team from Thornton halfway through the first half when right back, Harven Cupido, scored off a corner.

Although the hometeam pressed hard to boot in the equaliser and had a couple of shots at goal, the Paarl defence held and thanks to a great team effort secured the title.

This means that both the first and second teams of Paarl and Baltic will play in the first division of the Tygerberg District Union next season.

Paarl truly had a good season losing only two matches and drawing in five out of the 18 games played.

The Paarl Soccer Club hosts its Senior Tournament on 2 October at the Boy Louw fields, with their Over 35 Tournament being played a week later also at Boy Louw.

[ Top ]