Thursday 16 October 2003

This site will be updated on 24 Octcber  2003 at 17:00

Sport

• Bolanders lyk reg
• Albions beëindig Peoples se Super 4 heerskappy
• Paarl Post sportwenners blink uit in rugby, fietsry
• Top darts action delivered
• Paarl gimnaste blink uit
• Dawie in goeie vorm
• Peoples te sterk in Wellington

AS die weerdokters hul feite agtermekaar het en die reënwolke wel teen vanaand verdamp, sal die Boland se eerste SuperSport wedstryd môre tuis teen die KwaZulu-Natal Dolfyne sonder probleme begin.

"Dinge lyk maar triestig en die span is geforseer om binnenshuis te oefen, maar die spelers is almal positief," was Dinsdag die kommentaar van die Bolandse afrigter, Deon Muller.

Volgens Muller het die Boland se drie opwarmingswedstryde teen die OP, Griekwas en WP "redelik goed" verloop.

"Dinge het stadig begin, maar die kolwers het in elke wedstryd met groter selfvertroue begin speel. Mark Sanders, die nuweling van Natal, lyk goed en het twee tellings in die 40's en 'n 54 aangeteken, terwyl Chad Baxter teen die WP 79 aangeteken het. Gerhard Strydom se fokus blyk ook reg te wees en hy het 'n vyftigtal, 36 en 40 aangeteken. Die ander nuweling, Graeme Marais spog met 'n gemiddelde van 102 na twee vyftigtalle en nog 'n telling in die hoë veertigs."

Dit is nog nie groot-groot tellings nie, maar die tekens is daar dat die spelers reg is."

Muller het bygevoeg dat die nuwe aanwins van WP, Wesley Euley, 97 teen die WP en 85 teen Griekwas gemoker het.

Daarby het die Boland se veteraan-snelbouler, Henry Williams gewys dat hy nog baie vuur in hom het, en in die eerste wedstryd vyf paaltjies platgetrek.

Op 36 bring Williams die ervaring na dié jong span met 'n gemiddelde ouderdom van 24, en is hy om dié rede vir die orige twee wedstryde gerus.

Wallace Albertyn is ook goed op dreef, maar 'n vroeë teleurstelling is Jacques van Wyk wat las het van 'n lae-rugbesering.

"Dit is 'n klein besering wat hy êrens in die voorseisoense program opgedoen het, en wat hy in die vooraf-wedstryde vererger het. Hy sal dus nie in die eerste wedstryd speel nie," het Muller gesê.

Justin Ontong was deel van die SA A-span wat in Pretoria teen Sri Lanka gespeel het, en sou gister weer in die Paarl aangekom het.

"Justin is nog nie in die vorm wat ons hom graag sou wou hê nie," het Muller van die Boland-staatmaker gesê nadat hy 31 van 86 balle in die eerste beurt van die SA A se vierdagwedstryd aangeteken. Die Suid-Afrikaners se oortuigende oorwinning van nege paaltjies het beteken dat dit nie vir hom nodig was om in die tweede beurt voor die penne stelling in te neem nie.

Die Bolander is ook min kans gegee met die bal maar het in sy twee beurte 1/12 behaal.

In die eerste beurt van die tweede toets het Ontong 39 (van 56 balle) aangeteken en ook hier was die tuisspan so in beheer dat hy weer nie 'n tweede kolfbeurt gekry het nie.

Die Bolanders sal môre aan die ontvangkant wees van 'n uitgehongerde Lance Klusener wat op omstrede wyse sy plek in die SA span verloor het.

Zoeloe, wie se arbitrasiesaak teen die Verenigde Krieketraad van Suid-Afrika (VKSA) einde November aangehoor word, sal vir baie wil bewys dat hy nog heelwat vir die Proteas kan beteken.

Volgens Muller, sal sy spelers nie geïntimideer word deur die groot name van Klusener en Dale Benkenstein nie.

"Dis die voordeel wat ons het, die jong spelers is honger en wil presteer."

Muller het bevestig dat die nat toestande dalk 'n bouler-vriendelike blad tot gevolg kan hê, met heelwat beweging van die bal vir die naatboulers.

Die span is Mark Sanders, Chad Baxter, Gerhard Strydom, Justin Ontong, Graeme Marais, Con de Lange (k), Wesley Euley, Wallace Albertyn, Willem du Toit, Ryan Groeneveld, Henry Williams en Rashaad Magiet (12de man).

YOUNG PEOPLES se planne om vanjaar die Drakenstein Super 4 trofee vir die derde agtereenvolgende jaar omhoog te hou, is Vrydagaand deur Albions in die wiele gery.

Albions het met 'n karaktervolle vertoning die verdedigende kampioene met 31-23 geklop.

Die span van Roderick Allies het reeds vroeg met geesdrif weggespring en na 10 minute met 12-3 voorgeloop.

Drieë deur Jenovan Cornelissen (flank) en Ashley Manual (heelagter) asook 'n doelskop deur Alwyn Hugo (vleuel) en 'n skepskop deur John Stevens (losskakel) het Peoples geruk.

Melvyn Hermanus het Peoples se strafskop oorgesit.

Peoples het egter begin terugveg. Ná drieë deur senter, Ricardo Cornelissen, en skrumskakel, Barry Williams, wat albei verdoel is deur Hermanus asook 'n verdere strafskop deur dié veteraan-vleuel wat sy laaste wedstryd vir Peoples gespeel het, het die rustydtelling 20-15 in die Tiere se guns gemaak.

Albions het egter in die tweede helfte met lang skoppe verseker dat hulle in Peoples se gebied boer.

Daarby het Albions al die kanse wat hulle gebied is, in punte omskep, terwyl hul teenstanders weer heelwat foute gemaak het.

Haker Fuad Februarie het met 'n lang strafskop vir Albions geslaag, terwyl Stevens ook met nog 'n poging na die pale in die kol was en so sy span weer laat voorloop het.

'n Skitterende drie deur die speler van die toernooi, Cornelissen, het Albions se voorsprong verder laat vergroot na 28-20.

Hermanus het die Tiere weer 'n bietjie hoop gegee met nog drie punte, maar Stevens het verseker dat Albions vanjaar met die louere wegstap toe hy kort voor die eindfluitjie 'n moeilike strafskop deur die pale jaag.

In 'n aanskoulike plaatfinaal tussen Young Gardens en Paarl Rangers, was dit weer laasgenoemde wat soos 'n terriër bly klou het.

Gardens het die stryd 20-17 gewen nadat Rangers nog kort voor die einde 17-13 voorgeloop het.

Gardens se drieë is gedruk deur Tino Prins (losskakel) en Johan Bothma (skrumskakel). Prins was ook in die kol met twee strafskoppe en twee doelskoppe.

Vir Rangers het Romeo Alexander (vleuel) gedruk, terwyl Mark Adams (skrumskakel) met drie strafskoppe en Gabba Jones met 'n skepskop geslaag het.

SOOS die afgelope paar jaar die geval was, was die kompetisie in vanjaar se Paarl Post Sportman en -vrou van die Jaar nominasies besonder straf.

Sake is veral in die junior afdelings uitgespook, met deelname op internasionale vlak wat as een van die hoof-oorwegings uitgestip is.

In die junior vroue-afdeling was die wenner Tanya Rossouw van Paarl Gimnasium vir bergfietsry.

Rossouw se vier goue medaljes tydens die WP Bergfietskampioenskappe, vier goue medaljes tydens die SA Bergfietskampioenskappe en kroning as SA junior vrouekampioen asook 'n silwermedalje tydens die Afrika Ope Kampioenskappe het haar die beoordelaars se gunsteling gemaak. Stacey Gardiner was tweede en Marné van der Burgh derde.

Onder die junior mans was dit Pieter Louw van Boishaai wat met sy rugbyprestasies die beoordelaars se stemme gekry het.

Louw was deel van die SA o.19 rugbyspan wat die o.19 Wêreldbekertoernooi gewen het. Hy speel vir en voer die WP o.18 Cravenweekspan aan wat die nie-amptelike eindstryd van die toernooi teen die Vrystaat wen. Daarby word hy ook aangewys as die SA Skole kaptein wat hul wedstryd teen Frankryk wen en hy speel tans vir WP o.20.

In 'n naby tweede plek was dit Emile Clayton vir karate gevolg deur Sors Joubert vir atletiek (tienkamp).

Maureen Smith (duathlon) het met die louere weggestap in die senior vroue kategorie.

As WP duoathlon kampioen van 2003, verower sy 'n brons by die SA Kampioenskappe. Sy word in die SA Duathon span opgeneem wat aan die Wêreldkampioenskappe in Switserland deelneem, en eindig sewende.

In die tweede plek was die netbalspeler Dianthia Thyssen, met die judoka, Erica Lestrade van die Kaapse Technikon Wellington Kampus in die derde plek.

Onder die senior mans was dit die Springbok-fietsryer Garth Thomas wat eerste geëindig het.

Thomas het sy nasionale kleure verwerf met deelname aan die Drie Nasies internasionale baanfietsbyeenkoms vroeër vanjaar.

Hy is aangewys as Boland se padfietskampioen vir 2003 en verower ook twee goud en drie silwermedaljes tydens die Boland Baankampioenskappe. Hy ry ook 'n goud los in die Uitval-wedren tydens die SA Baankampioenskappe.

Die stoeier, Coenraad de Villiers, was tweede en nog 'n judo-man, Willie Stoffels derde.

THE 9th Versapak Club Tournament ended in a spectacular way when defending champions International Hotel won the tournament for the sixth time.

They started off like real champions, beating all their opponents before taking a loss against SAPS Blues in the last round.

The young team of Independent Flyers who played brilliantly, but showed lack of concentration at times, ended in second place, followed by Versapak and SAPS Blues.

The All-Versapak doubles final was a classic showpiece of darts. Wilfred Raats and Deon Marais really showed their skills when they beat the favourites Gavin Naidoo and Edward Noble (4-2).

The 15-year-old Thurlough Lottering (Independent Flyers) showed that he is in a class of his own when he beat the experienced Bob Marais (International Hotel) 4-1 in a titanic singles final. Marais can only blame himself for not closing on the firs and fourth legs when he got the chance.

A total 56 180's was delivered of which Wilfred Raats (Versapak) and Attie Bennett (International Hotel) got five apiece.

Bob Marais (Int. Hotel) got the highest game shot of 160. Lorenzo Arendse (Kappa) was announced as Sportsman of the Tournament.

On the domestic front Versapak Dart Club put on a majestic performance when they became the unbeaten champions of the Harold Uberstein trophy.

Mount View won the Isaacs trophy although they took a beat of 4-7 by Allandale in the final round. A total of twelve 180's were delivered while Edward Prince (Independent Flyers) got the highest game shot of 150.

TWEE gimnaste van die Paarl Gimnastiekskool het skittervertonings gelewer tydens die SA Gimnastiek Spele wat in Pretoria gehou is.

Gerhardt Vorster, 'n leerder van HJS, het ses medaljes verower: goud vir spronge, silwer vir ringe en beuelperd en 'n bronsmedalje vir vloer en rekstok.

Sy algehele derde plek in die Vlak 5 (16 jaar en ouer), het hom van 'n bykomende bronsmedalje besorg.

Die Gimmie André Smit het ondanks 'n teleurstellende begin goed teruggekom.

Smit het in sy eerste item, rekstok, twee keer geval, maar baie karakter getoon om 'n goud in die spronge en 'n bronsmedalje op die vloer te verower.

Albei gimnaste word deur André Boshoff van Paarl Gimnastiekskool afgerig.

TEN spyte van Sondag se bedompige toestande was die Paarliet, Dawie van der Walt, weer eens in skitterende vorm tydens die Paarl Ope Gholftoernooi op Boschenmeer.

Van der Walt het reeds na die eerste ronde 'n goeie voorsprong opgebou met sy 66 en hoewel hy in die tweede ronde twee houe meer (68) afgestaan het, was daar geen bedreiging van die ander spelers nie.

Sy 10 onder baansyfer was gans te goed vir die res van die veld. In die tweede plek kon sy Boland-spanmaat, Werner Theart (Kuilsrivier) slegs met 'n drie onder baansyfer spog, gevolg deur Mark Mahoney (Wellington) in die derde plek met een onder baansyfer.

Van der Walt het ook Saterdag tydens die Winelands-toernooi met die louere weggestap in die Langste dryfhou-kompetisie met 'n afstand van 279m.

In die onlangse Interprovinsiale toernooi in Port Elizabeth is hy as een van die beste spelers van die toernooi uitgesonder.

Hy het vir Boland op nommer een in die A-divisie verteenwoordig en 'n totaal van 7½ uit 10 punte vir sy provinsie ingepalm.

Boland het net-net tweede gekom, na WP, nadat hulle met Noordwes, Noord-Gauteng en Vrystaat afgereken het en met Sentraal-Gauteng gehalveer het.

Van der Walt het in die individuele kompetisie met die tweede en derde gekeurde amateurs in die land, Grant Veenstra (WP) en Rossouw Laubscher (Noord-Gauteng) klaargespeel. Die Paarliet self is tans veertiende gekeur.

DIE Three Ships Wellington Krieketklub het in die afgelope naweek gemengde welslae behaal.

Wellington se eerste span het tuis op die Pen Basson-velde teen Young Peoples gespeel.

Wellington kolf eerste en behaal 195/9 in hul toegelate 60 beurte. Warren Groeneveld (52 1x6, 7x4), Timmy Cornelissen (46 4x4) en Wickus van Lill (31 4x4) was die enigste kolwers wat weerstand bied teen die Young Peoples boulaanval.

Quinton Kannemeyer (2/33) en Jacques Krynauw (2/35) het vir die besoekers uitgeblink.

Young Peoples begin goed met Edwin Jacobs (28) en Elrich Jansen (40) wat die lopies inryg.

'n Mini-ineenstorting laat Peoples op 80/5 maar Kannemeyer (53 1x6, 6x4) en Krynauw (53 9x4) stuur die Tiere na 'n goeie vyf-paaltjie oorwinning.

Joshua Swanepoel (2/37) was die enigste Wellington-bouler wat die besoekers laat bontstaan het.

Saterdag speel Wellington I teen Worcester United weg.

Wellington se tweede span het egter 'n goeie vertoning gelewer op Hermanus waar hulle teen die tuisspan kragte gemeet het.

Hermanus wen die loot en stuur Wellington in om te kolf. Wellington verloor vroeg paaltjies, maar 'n goeie vennootskap tussen Abrie du Plessis (62 1x6, 7x4) en Marius Dempers (44 4x4), bygestaan deur Jaco Conradie (32 3x6, 3x4) bring hulle tot op 200 almal uit.

Hermanus se kolwers kon egter nie die mas opkom teen die gedissiplineerde boulwerk van Wellington nie.

Conradie (3/35), Barry Olivier (3/12) en Richard Stroebel (3/5) beperk Hermanus tot 111 almal uit. Wellington wen met 89 lopies. Wellington II speel Saterdag tuis teen Oostelikes.

Peoples II het op Daljosafat teen Van der Stel met een paaltjie verloor.

Peoples moker 238 lopies in 60 beurte, met Mark Phythian (43), Faghrie Jacobs (46nun) en Wade Anderson (32) wat lopies kry.

Die besoekers behaal die teiken van die heel laaste bal van die wedstryd en eindig op 239/9.

Riaan Jephta (4/62) het moedig probeer vir die tuisspan.

Peoples se vrouespan se wedstryd teen Van der Stel het gelykop geëindig.

Peoples teken 101 aan met S Laubscher (29) en Z Josphs (29) aan die spits, terwyl Audrey Pietersen (6/25) die groots aandeel daarin gehad het om Van der Stel vir dieselfde totaal uit te haal.