|
TWEE talentvolle Paarliete tree op 26 en 27 Februarie om 20:00 op in die Endlersaal saam met die US Simfonie-orkes, ter
viering van die Musiekkonserwatorium se eeufees.
Inge Pietersen (fluit) en Cobie van Wyk (perkussie) sal afsonderlik optree saam met die USSO, onder leiding van Xandi van
Dyk.
Albei is oudstudente van die Frank Pietersen Musieksentrum in die Paarl.
Cobie van Wyk begin slagwerk by Frank Pietersen Musieksentrum in Paarl op die ouderdom van 12 by die bekende
slagwerkspeler, Magda de Vries. Hy ontvang ook onderrig by Alida Stadler en Linda Muller.
Hy is nou 'n finalejaarstudent aan die Universiteit van Stellenbosch en ontvang onderrig by Suzette Brits.
Hy speel in die Universiteit van Stellenbosch Simfonie-orkes, Stellenbosch Simfoniese Blasers, en vorm deel van die
Stellenbosch Slagwerk Ensemble.
Hy is van 2003 'n aktiewe lid van die Stellenbosch Libertas Koor, en is gevra om as slagwerkspeler saam met die Holland
Simfonia in Rotterdam, tydens die wêreld-première uitvoering van die eerste Suid-Afrikaanse Mis - Messa Da Boa Esperanza - op te tree.
Inge Pietersen het haar eerste fluitles in 1994 by Caureen Engel by die Frank Pietersen Musieksentrum gehad. In 1995
is haar naam op die Unisa ererol geplaas vir fluit en klavier. Sy sit haar fluitlesse voort onder Milton Pietersen tot 1999, toe sy 'n onderskeiding behaal in graad VII (Unisa).
In 1996, 1998 en 1999 ontvang sy die Frank Pietersen Gedenktrofee vir die beste student by dié sentrum.
Inge voltooi haar B (Mus) onder Eva Tamassy en is tans besig met 'n Honneursgraad in Solo-Optrede onder dr Corvin Matei by
die Universiteit van Stellenbosch.
Sy is 'n deeltydse onderwyseres in fluit en teorie by Frank Pietersen en Bridge House.
Die afgelope drie jaar is sy ook 'n assistentdosent in die Musieksertifikaatprogram by die Universiteit van Stellenbosch.
Inge is tans 'n kadetspeler in die Kaapse Filharmoniese Orkes en was een van elf soliste wat verlede jaar aan die
Jeugmusiekfees deelgeneem het.
Hoogtepunt
Die Concerto-fees beloof om een van die jaar se musikale hoogtepunte te wees.
'n Keur van bewegings uit bekende en geliefde werke soos die Mozart Fluitkonserte in D en G majeur, die Glazoenof
Vioolkonsert, die Rachmaninoff Klavierkonsert no 2, die Prokofjef Klavierkonsert no 3 en die Chopin Klavierkonsert no 1 sal uitgevoer word, asook die ouverture tot Mozart se Die Huwelik van Figaro en die
aria "Hai già vinta la causa!" uit hierdie opera.
Kaartjies kan by Computicket bespreek word. Vir navrae, kontak die Departement Musiek by 808-2343 of e-pos music@sun.ac.za.
|
