|
DIE stelsel het haar lewe gekos, word gesê van die vermoorde Lisbé Smuts-Smith van Wellington.
As die tronkowerhede hulle werk behoorlik gedoen het, en die vermeende moordenaar nie op parool vrygelaat het nie, het
sy nog gelewe.
So voel ontstelde inwoners oor die dood van die begaafde akademikus wat verlede Maandagoggend in haar woning Twistniet
in Burgstraat, vermoor is.
Elton John Lourens (27), die verdagte, was kaalvoet en het 'n T-hemp en slaapbroek van Lisbé se seun Timotheus (17)
aangehad toe polisie hom kort na die moord op die Boland sportterrein in hegtenis geneem het.
Sy eie wit kniebroek en geruite hemp is in die kombuis van die moordhuis weggesteek. Hy het dié nat klere uitgetrek
nadat hy uit die swembad geklim het waar Lisbé se liggaam op die water bly dryf het.
Nog van sy klere, asook 'n byl en 'n slagtersmes, is in tuine in Tweedelaan gevind, by huise waar daar die oggend voor
die moord ingebreek is.
Lourens is bekend daarvoor dat hy sy langbroek en skoene uittrek om geruisloos deur huise te kan beweeg terwyl die
eienaars slaap.
Hy dra ook tot drie kortbroeke oormekaar, om van sy klere langs die pad ontslae te raak en so agtervolging te bemoeilik.
Lourens het 'n misdaadgeskiedenis vandat hy tien jaar oud was, met 25 veroordelings vir huisbraak en diefstal.
Toe hy in Mei verlede jaar op parool uit die gevangenis gelaat is, was dit nadat hy 'n vonnis uitgedien het vir 'n
oortreding gepleeg tydens 'n vorige paroolvrylating.
Lourens is nou in aanhouding in Allandale gevangenis tot die volgende hofverskyning op 1 April.
Verbetering
* Intussen is daar verbetering in die toestand van Alexa Kirsten (52), die buurvrou wat Lisbé te hulp gesnel en
toe aangeval is.
Alexa is uit die intensiewe eenheid van die Groote Schuur Hospitaal geskuif na 'n private kamer. Sy het nie meer die
suurstofmasjien nodig nie.
Alexa begin gevoel in haar linkerhand en voet terugkry nadat sy deels verlam was.
Die aanvaller het haar 'n gapende wond teen die kop toegedien en herhaaldelik in die skouer gesteek met 'n
skroewedraaier.
'n Trustfonds is gestig om te help met die lang rehabilitasie wat voorlê vir die vrou wat bekend is vir haar geverfde
lappe en handvlyt.
Bydraes kan inbetaal word by die prokureurs Ingwersen, Feenstra & Marais, te Absa Wellington 3334510 (taknommer
4040633095) met die verwysing "Kirsten".
* The "system" cost a woman who was allegedly murdered by a parolee, her life, say local residents.
|
