Thursday 17 June 2004

This site will be updated on 24 June  2004 at 17:30

Nuus - News

• Paaie word riviere
• Vrees na gas-lek
• Hunt for bodies on pass
• Beleggers in knyp na makelaar se dood
• Hofordonnanse leef in vrees
• Jagseisoen vir kaartdiewe

Paaie word riviere

[ Top ]

SOOS die swaar reëns Maandagoggend paaie en erwe in Drakenstein in damme en riviere omskep het, so het inwoners kritiek op die Munisipaliteit laat reën.

Huise is oorstroom en voertuie het onklaar gaan staan in strate waar afvoerpype net nie die volume water kon dra nie.

Altesame 70 mm is van Saterdagaand tot Dinsdag gemeet. Maandag alleen is 39 mm gemeet.

Met die grond versadig ná Sondag se deurdringende reën, het die hernude harde buie Maandagoggend, gronde weggespoel en afvoerpype in laerliggende dele oorstroom.

SEA OF WATER. A water deluge hit Paarl and Wellington on Monday, with many houses and factories knee deep in water after continuous rain since Saturday evening. This enterprising Paarlite decided to probe the blocked stormwater drainage in Zuidmeer Street from the safety of a rowing boat.                                                                                                                                                                                                                       

"In die 20 jaar dat ek in die Paarl is, het ek nog nie so iets gesien soos vanoggend nie. Die water loop dan sommer by die besighede is Laer Lady Greystraat in," het Erwin Wild gesê.

"Het die ou bedeling dan nie vir die nuwe bedeling verduidelik hoe hulle die stormwaterpype skoongehou het nie?"

Sarida Hendricks van Chopinlaan, Dalweide, is saam met haar buurvroue erg ontstoke: "Ons munisipale belasting styg elke jaar en ons paaie lyk elke jaar met die reën soos riviere. Ons kinders kan nie eers van die skole af geloop kry nie."

Inwoners van die nuwe Green Valley woongebied in Daljosafat kry weer, net soos die vorige winter, baie swaar. Die water loop dwarsdeur die huise, het gemeenskapleier Andrew Bassick gesê.

"Ons het 'n swembad in die tuin waar ons nie 'n swembad gehad het nie," het Maude Flink van Malanstraat, Wellington gesê.

Malanot Park, die laagliggende deel van Wellington se middedorp, het met die swaar reën Maandagoggend soos 'n groot meer gelyk.

In Disastraat, by die watertoring in Uitsig, Wellington, is inwoners ook swaar getref.

"Dis die vierde keer dat ons huis oorstroom," het Johan Lemmer gesê.

"En so ook ons bure. Dit is die munisipaliteit se skuld. Hier is 'n stormwaterpyp wat toegemessel is."

 In Dorisrylaan het die keermuur van Jannie van der Merwe op die wal van 'n stormwatersloot omgeval.

'n Buurman, Ockie Olivier, sê hy het verlede jaar al vir die Munisipaliteit gewaarsku dat hulle vir skadevergoeding aanspreeklik sal wees, nadat sy eie versekering geweier het om hul tuinmuur (wat darem nog staan) te verseker.

Die Frieslaars se huis te Versaillesstraat is vir die tweede agtereenvolgende jaar kuitdiep oorstroom weens 'n onvoldoende kasduiker onderdeur die pad. Munisipale fondse om die sloot oop te maak, is blykbaar nie beskikbaar nie. Groot skade is veroorsaak aan matte en huisraad.

Die plakkerswonings in die Noodkamp langs Maylaan, Wellington, is soos elke jaar met swaar reën oorstroom.

"Die huise moes al jare gelede gebou gewees het, maar die Munisipaliteit sloer en elke jaar is die mense onder water," het gemeenskapsleier Kaatjie Williams gesê.

In O-blok, Mbekweni, het die water van agter af gekom, dwarsdeur ons huise gestroom en by die voordeur uitgeloop, het 'n inwoner gekla.

"Die beddens dryf rond in Annie Benjaminstraat," het 'n inwoner, Kelly Neethling, laat weet.

Wonings in Springbok- en Lantanastraat, Paarl-Oos, is ook soos elke jaar, deur die stormreën oorstroom.

By Mastertreads in Jan van Riebeeckweg het verkeersbeamptes die verkeer gereguleer omdat die water bobeenhoogte was. Bande het in die straat afgedryf.

By die Huguenot Verbypad se aansluiting met Jan van Riebeeckweg en in Van der Stelstraat het motoriste uit Paarl-Oos nie geweet of hulle bult-op moes agteruit ry en of hulle maar die rivier voor hulle moes aandurf nie.

Mbekweni was tydelik van die Paarl afgesny, met verkeer wat nie die oorstroomde Drommedarisrylaan of Jan van Riebeeckweg kon gebruik nie.

By MediClinic het die bleshoenders tot byna in die pad geswem toe die nuutgevormde vlei soos 'n waterval oor die Bergrivier Boulevard gestroom het.

Met die water wat teen middag afgeloop het, het mense kans gehad om hulle huise skoon te vee van die modderwater.

Die brandweer moes op verskeie plekke hulp verleen, en het ook komberse en kospakkies uitgedeel aan mense in opslaanhuise.

* Large areas of Paarl and Wellington were flooded after  the first heavy downpours of the winter.

HONDERDE werkers moes verlede week twee fabrieksaanlegte in Suider-Paarl ontruim toe 'n dodelike gas in die lug ontsnap het.

Die gebied waar die nuwe Paarl Mall gebou gaan word, langs Tiger Foods, is Vrydagoggend ure lank afgesper. 'n Sterk ammoniak-reuk het in die lug gehang.

Brandweermanne in veiligheidsdrag het die perseel beveilig terwyl ambulanspersoneel mense met asemhalingsprobleme behandel het.

Werknemers van Tiger Foods en die KWV het rondgestaan en rustig op sypaadjies in die son gesit.

Volgens Gerhard Wiese, bestuurder van Tiger Foods, het die lek in die deel plaasgevind wat deur dié maatskappy vir ontwikkeling verkoop is.

Die pype op die perseel is drie weke gelede deur 'n kontrakteur skoongesuig nadat Tiger Foods dié deel van die aanleg ontruim en die pype afgesluit het.

Vrydag het skroothandelaars die staalpype afgesaag toe ammoniak skielik ontsnap het. Die ammoniak is tien minute lank in die atmosfeer vrygestel.

Sestien werkers van Tiger Foods, veral asma-lyers, is vir behandeling na die MediClinic geneem. Een werker van 'n skoonmaakdiens en vyf werknemers van die slopingsmaatskappy is ook behandel.

Hulle is Maandag weer hospitaal toe vir 'n opvolgondersoek.

Brandweermanne het dae ná die opruiming steeds velirritasie, hoofpyn en ongemak in die bors ervaar.

"Daar is streng regulasies wat nagekom moet word en ons doen alles in ons vermoë om almal se veiligheid en gesondheid te verseker," het Wiese gesê.

"Ons doen liewer te veel as te min."

* An ammonia gas leak last week forced hundreds of factory workers in Paarl South to evacuate the buildings.

AN INJURED woman who stumbled into the Franschhoek police station on Sunday night sparked a frantic search for a vehicle that had crashed down the mountain pass.

According to the Xhosa-speaking woman, the bakkie with five occupants had left the Franschhoek Pass on a sharp curve south of the summit at about 17:30.

She managed to reach the road in pouring rain and raised the alarm at 21:00 after stopping a passing motorist. Police and emergency personnel combed the cliffs with spotlights, but were forced to abandon the search at 03:00.

The search continued at first light on Monday. When the vehicle was spotted, it was perched against a rock on its roof in the fast flowing river at the bottom of the ravine.

Rescuers scrambled the 150m to the wreck. They found two bodies on the slope, a baby's blanket and toddler's shoe.

The crash victims had been driving from their home in Mfuleni (Kuils River) to Villiersdorp when their bakkie left the road in the vicinity of Jan Joubertsgat.

"The terrain is very hazardous," rescue co-ordinator Vincent Booysen said.

"The embankment is wet and slippery and the current is very strong in the river."

A helicopter, army personnel and volunteers from Correctional Services assisted police, search and rescue personnel and nature conservation officials in the dangerous operation.

Police divers searched the wreck and the raging river for the three-year-old child and remaining adult.

Late on Monday afternoon, the man's body was discovered trapped under water, 30m downstream from the vehicle. Rescuers struggled for more than an hour to haul the body up the embankment.

The toddler's was found 400m downstream on Tuesday afternoon.

Attempts to raise the bakkie to the road, remained unsuccessful.

DIE flambojante Wellingtonse makelaar wat vroeër vanjaar dood in sy woning aangetref is, het na bewering kliënte met meer as R20 miljoen ingeloop.

Sam Downing (49) het op 9 Maart gesterf, vermoedelik aan 'n oordosis slaappille. Hy het 'n brief aan sy gesin nagelaat.

Downing was wyd bekend en gewild.

Ná sy skielike dood het dit aan die lig gekom dat Downing Makelaars skuldig kon wees aan bedrog van miljoene rande.

Bewerings dat 'n piramideskema bedryf is, word deur vriende  as "'n oordeelsfout met beleggings" verduidelik.

Dit was veral middeljariges en bejaardes in Wellington en so ver as Vredenburg en Langebaan, wat hul aftreepakkette by hom belê het, en nou sonder 'n neseier vir hul oudag is.

"Dit is mos nie moontlik nie," het stomgeslaande beleggers gesê.

"Hy was so 'n wonderlike man. Jy kon hom altyd  deur 'n  ring trek en hy het dan almal altyd probeer help."

Dié herinnering het nou  versuur vir die Wellingtonner wat R400 000 by die makelaar belê het.

Ook vir die onderwyser  wat R300 000 kort voor Downing se dood aan hom gegee het om te belê.

'n Oud-hofbeampte  is met R80 000 ingeloop. 'n Bejaarde winkelassistent het R120 000 belê.

"Ek wil nie oor hierdie ding praat  nie," het 'n voormalige kliënt gesê.

"Ek wil ook nie daaroor dink nie. Ek moet dit vergeet, of ek sal my  tot  in 'n hartaanval opwerk.

"In my agterkop is daar die hoop dat ek darem ietsie sal terugkry, maar ek weet nie so mooi nie."

Die gestorwe boedel is kort na Downing se dood aan die likwidateur Ryno Engelbrecht oorhandig en is in die Kaapstadse hooggeregshof gesekwestreer.

Die spogwoning van die Downing-gesin te Bovleiweg 75, word op 25 Junie opgeveil. Die likwidateurs hoop om 'n miljoen rand te verhaal.

Beleggers wat rente ontvang het, sal waarskynlik hul opbrengste moet terugbetaal omdat die geld na bewering met 'n onwettige skema geïn was.

'n Afgetrede advokaat het met volmag namens beleggers uit Vredenburg die aansoek om sekwestrasie gedoen.

Die likwidateur het binne weke die steun van R16m se krediteure gehad en daar word verwag dat die syfer tot R20 miljoen sal verhoog.

Beleggers is onder die indruk gebring dat hulle geld op die aandelemark belê sou word.

"Dis weerlose mense wat hul makelaar vertrou het," het 'n bejaarde Wellingtonner gesê.

"Ons het almal gewag vir dividende, wat toe nooit gekom het nie. Ons het op die harde manier geleer daar is geen vinnige manier om geld te maak nie."

Vandag gis die mense op Wellington.

"Wat het van die geld geword? Waar is die honderde duisende rande wat belê is net weke voor sy dood?"

Onbewus van die bom wat sou bars, het familielede en vriende in Maart  die NG Moedergemeente Wellington volgepak by die begrafnis van die vriendelike  makelaar.

Hy laat sy vrou Adri, twee dogters en 'n skoolgaande seun.

Die polisie se forensiese ondersoek sal na verwagting eersdaags voltooi wees, en daarna sal die geregtelike nadoodse ondersoek in die Wellington landdroshof afgehandel word.

* An investigation is being conducted into the affairs of a Wellington financial adviser who committed suicide in March. An estimated R20 million is missing.

HOFORDONNANSE in die Paarl lewe in vrees vir hul lewe.

Verlede week is 'n ordonnans in die Paarlse jeughof aangeval,  gewurg en geskop.

Die hof is die volgende dag lam gelê toe ordonnanse verseg het om in die onveilige toestande te werk.

Ná 'n vorige aanval in die Paarl landdroshof is ordonnans insp John Massen medies ongeskik verklaar.

Insp John Coetzee werk steeds as hofordonnans, al is daar gepoog om sy keel met 'n skerpgemaakte tandeborsel af te sny.

Landdros Robert Lewis het waarskynlik Coetzee se lewe gered toe hy oor die hofbank gespring en die aanvaller vasgegryp het.

Insp Anthony Gouws is verplaas nadat sy duimsening in 'n aanval in die jeughof afgesny is.

In 'n ander voorval in die hof is 'n polisiebeampte se vuurwapen  van hom afgeworstel.

Verlede Woensdag is insp John Wagner voor die beskuldigdebank teen die vloer geslaan, gewurg en in die gesig geskop.

Die aanval was vermoedelik 'n ontsnappingspoging. Jeugdiges het uit die gehoor gespring en ook die ordonnans getakel.

Die aanklaer en 'n prokureur het uitgestorm om hulp te ontbied, waarna insp Wagner se kollegas die aanvallers oorrompel het.

"Ek het skoon die bewerasie gehad. Dit is net genade dat ek nie 'n oog verloor het nie," het insp Wagner (58) gesê ná mediese behandeling. Hy kry nou ook sielkundige berading.

Insp Wagner sal hierdie jaar met 30 jaar diens aftree.

"In die ou tyd het die skollies respek gehad, maar nie vandag nie," sê hy.

Volgens die pligstaat van ordonnanse moet hulle die gevangenes uit die selle na die hof begelei met 'n duikweg.

Hulle moet die hof beveilig en die landdros, aanklaer en die getuies beskerm.

Hulle moet die hof behulpsaam wees met die aangee van bewysstukke en die hof tot sitting roep.

Weens 'n mannekragtekort maak die departement Justisie nie voorsiening vir klerke in die hof nie en verrig ordonnanse ook administratiewe dienste.

Hulle skryf lasbriewe uit, roep getuies en beskuldigdes uit die hofgange, skryf skulderkenningsboetes uit en verlaat die hof om per telefoon getuies te kontak en reëlings vir borg te tref.

Wanneer hulle die hof verlaat om klerklike dienste te verrig, is die hofsaal sonder hul beskerming.

Ná die aanval verlede week het die ordonnanse besluit: "So kan dit nie langer aangaan nie."

Hulle het Donderdag verseg om te werk en het direkteur Deon Hagen van die Boland areakantoor gaan spreek.

Dir Hagen het twee lede van die Paarlse Misdaadvoorkomingsdiens na die hof afgevaardig om dié dag uit te help.

Elf ordonnanse werk by die streekhof in Hoofstraat en die landdroshof in die Bergrivier Boulevard, met nege hofsale en aanhoudingselle by elke hofgebou.

Daar word byna daagliks 'n saaglem, skerpgemaakte eetgerei of messe afgeneem wat prisoniers insmokkel. Verlede maand het meer as 1000 gevangenes deur die Paarl landdroshofselle gegaan.

Insp Andy Solomons is die enigste polisiebeampte aan diens by dié selle.

Ordonannse en aanklaers is dit eens, die gevaarlikste deel van die polisiebeamptes se werk by die hof is om alleen met beskuldigdes te wees.

Dit is veral die gang en trappe uit die landdroshofselle, waarlangs die ordonnans alleen saam met die beskuldigdes na die hofsale moet stap, wat hare laat rys.

Die gang is lank en donker. Gevangenes skakel gereeld die ligte af.

"Ons weet elke keer as ons die gang afloop dat ons oorval kan word," het ordonnanse erken.

Hulle het vanjaar aangetree met die belofte van twaalf addisionele polisiebeamptes vir die hof.

Dié lede is nog nie by die landdroshof nie.

Volgens dir Moses Mamela van die Paarl polisie is 18 polisielede op 'n vier-maande kursus waar hofprosedure behandel word.

"Die hof is vir ons 'n prioriteit," het dir Mamela Dinsdag gesê.

"Teen die einde van Oktober kan verligting vir die hofordonnanse verwag word."

Samesprekings word intussen gereël met verteenwoordigers van Justisie oor die kwessie van die klerklike dienste wat polisie-ordonnanse nou verrig.

* Court orderlies in Paarl fear for their lives following attacks by prisoners.

MAANDE al is daar 'n sindikaat-bankkaartdiewe in die Paarl en Wellington aan die woel en word kliënte van duisende rande besteel.

Die banke is bewus van die drie mans - donker van gelaat, een baie lank en twee korter - maar min van die klagtes bereik die ore en dossiere van die polisie.

"Ek het die voorval by die polisie aangemeld," het 'n gefrustreerde Paarliet gesê, "maar teen wie sou die saak gemaak kon word?"

'n Ander slagoffer vertel: "Die bankpersoneel het aan my gesê ek sal nie my geld kan terugkry nie. Dit sal ook nie help om die saak by die polisie aan te gee nie."

Die groep mans slaan veral op 'n Vrydagmiddag of Saterdag toe.

Een van die gewilde teikens is die Standard Bank in Kerkstraat, Wellington, waar die kitsbank agter hoë mure versteek is.

Daar is geen sekuriteitskamera nie, en tot onlangs ook geen sekuriteit nie.

Sedert die nuutste vlaag diefstalle van bankkaarte, is daar nou bedags 'n sekuriteitswag, soos ook by die Standard Bank-tak in Lady Greystraat, Paarl.

Daar is die drie beweerde rowers onlangs op video vasgelê. Die bank en polisie het besluit om nie foto's of identikits te versprei "voor verdere ondersoek" nie.

"Dit is nie goed genoeg nie," het slagoffers gesê, en die Paarl Post versoek om 'n beskrywing van die verdagtes en hul modus operandi bekend te maak.

Die lang, sterkgeboude man kom skielik oor jou skouer en gryp na jou kaart. Hy praat Afrikaans en gee voor dat die kitsbank foutief is en jou kaart gaan insluk.

Terwyl jy teëstribbel, word die transaksie gekanselleer en kry die man die kaart in die hande.

"Ek het nog gewag vir die kaart om uit te kom, toe het die man al die kaart vir sy makker aangegee.

"Daar is later vasgestel dat dié man onmiddellik by die masjien reg langs my R1000 van my rekening getrek het, terwyl ek ewe gewag het vir my kaart om uit te kom," het 'n Paarlse vrou gesê.

Terwyl 'n vrou op Wellington geld getrek het, het 'n netjiesgeklede man, wat sy as identies as die man in die Paarl beskryf het, oor haar skouer haar arm vasgegryp.

Sy het hom probeer afskud en toe het hy skielik verdwyn. Haar kaart wou ook nie uitkom nie, en die vrou vertel hoe sy sonder sukses die noodknoppies gedruk het.

Tien minute lank het sy voor die masjien gestaan voordat nog 'n kliënt opgedaag het, en sy in die bank kon hulp soek.

Teen daardie tyd is  haar daaglikse limiet by 'n ander bank in Kerkstraat getrek.

"'n Mens voel nie net sleg oor die geld wat jy verloor het nie," het die vrou gesê.

"Jy voel so onnosel. Hoe kon die man jou so uitoorlê? Eers later word jy kwaad."

Paarl polisie-insp Julia Claasen vra: "Maak asseblief 'n saak aanhangig. Sonder 'n aanklag kan die bedrog nie ondersoek word nie en kan die skuldiges nie aangekeer word nie."

* Cash card thieves are having a field day in Paarl and Wellington.

[ Top ]