Thursday: 18 Septembert 2003

This site will be updated on: 26 September  2003 at 17:00

Sport

• Geen keer aan selfversekerde Kavaliers
• Jong span Boland Krieket se troefkaart
• Rangers kou naels en wen net-net
• Langasems vaar goed
• Albions sukkel met uitklophou
• Paarl, Peoples pak mekaar
• Standards wen taai stryd
• Newtons se drome aan skerwe
• Swemklub verjaar

Goeie samespel deur die Boland-agttal en losskakel, Solly Goosen, se goeie gebruik van taktiese skoppe saam met 'n sterk bries, het die tuisspan teen rustyd met 31-7 stewig in die bestuurstoel gesit.

Die haker, Gustav Rademeyer, is vir sy goeie werk in die voorry beloon, met die man van die wedstryd toekenning.

Daarby het albei die flanke, David Hendricks en Kobus le Roux, ook hard ingeklim en goed druk toegepas.

In die agterlyn was Piet van Zyl (senter) weer 'n doring en druk hy twee drieë in die eerste helfte.

Die Boland se breier, Hawies Fourie, skryf sy span se sukses toe aan selfvertroue.

"Dit is nie iets wat sommer nou begin het nie. Ons het in die kwalifiserende kompetisie ook goeie rugby gespeel. Maar ons was by drie geleenthede ongelukkig en daarom speel ons nie nou in die Curriebeker nie.

"Die spelers se selfvertroue is groot na die afgelope oorwinnings en omdat ons ook min beserings gehad het, bly die groep van 22 redelik dieselfde wat ook bydra tot die spelers se vertroue in mekaar," sê Fourie.

"Die groot ding is dat niemand moed verloor het toe dit sleg gegaan het nie. Dinge begin nou vir ons gebeur danksy die toewyding van die spelers."

Beserings het egter twee veranderinge genoodsaak aan die span wat môre in Oos-Londen teen die Grens Bulldogs te staan kom.

Rademeyer (knieligament) en kaptein, Chris Potgieter (kuitspier) sal vir die volgende twee weke gerus word. Conrad Burke sal as haker oorneem terwyl Chean Roux op agsteman sy plek sal inneem en ook die kapteinskap sal behartig.

Die enigste ander verandering is Daniël Philander wat vir Solly Goosen op losskakel vervang.

Volgens Fourie wil hy Philander se goeie balverspreiding aanwend om die punte teen die Bulldogs op te stapel.

STERK kompetisie vir 'n plek in die span en die streng toewyding van 'n nuwe kaptein, sal vanjaar die groot dryfvere agter die sukses van die Boland Krieketspan wees.

Die jong Con de Lange, Boland se speler van die jaar vir 2002/2003 sal vanjaar die provinsie aanvoer. Justin Ontong, wat verlede jaar saam met Henry Williams  die span gelei het, het nee dankie gesê vir die kapteinskap om op sy spel te fokus.

"Ons het nie groot name in die span nie, maar ons het jeug. Ons is totaal onvoorspelbaar. As nuwe kaptein gaan ek daardie werketiek en toewyding van die manne saamvat en gebruik om onverskrokke te wees in alles wat ons doen, op en van die veld af," het De Lange Saterdag gesê tydens Boland Krieket se loods van die seisoenfunksie.

"Soos Graeme Smith (Proteas-kaptein) gesê het, ons moet ruthless wees."

Volgens De Lange sien hy uit na die uitdaging van die kapteinskap.

"Ek was die kaptein van meeste van dié spelers op skool (Boland o.18) en in een wedstryd verlede seisoen.

"Om nou dieper oor die wedstryd te dink en jou eie denkwyse by die span tuis te bring, gaan lekker wees," het hy gesê.

Die span se breier, Deon Muller, beaam die goeie gees onder die spelers.

"Con se selfversekerdheid en sy absolute vertroue in al die spelers is 'n groot bate. Hy weet wat hy uit elke speler wil hê, sonder om die speler persoonlik na te kom. Hy geniet ook almal se aansien en ondersteuning," sê Muller.

Volgens hom werk sewe van die gekontrakteerde spelers reeds sedert Mei aan hul fiksheid en basiese vaardighede. Willem du Toit, Jacques van Wyk, Gerhard Strydom, Chad Baxter, Rashaad Majiet en Con de Lange het in Engeland klubkrieket gespeel, terwyl Henry Davids na die nasionale akademie genooi is.

Davids het verlede jaar nie na verwagting vertoon nie, maar volgens Muller het hy "uitstekende vordering" gemaak by die akademie.

Hy bevestig dat daar sterk geleun sal word op spelers soos Justin Ontong, Con de Lange en Henry Williams.

"Daar is al lank gepraat oor Gerhard Strydom, Henry Davids en Willem du Toit. Dié seisoen is die waterskeiding waar hulle hulself moet bewys," sê Muller.

"Die verrassingselement die seisoen gaan dié individu wees wat met 'n goeie beurt of goeie boulsessie vorendag gaan kom.

"Dit word verwag van manne soos Justin, maar die ander het die potensiaal en dit sal 'n bonus wees wanneer hulle goed vertoon," sê Muller oor die span se onvoorspelbaarheid.

Dit is juis die groot potensiaal waarop die breier reken om die beste in sy spelers uit te bring.

"In die verlede was die ouens verseker van hul plek in die span, maar nou is daar 'n uitdaging vir elke plek. Vir geen speler is dit 'n uitgemaakte saak dat hy sal plek kry nie."

Die Boland speel drie opwarmingswedstryde voor die begin van die SuperSport meerdaagse reeks. Van 26 tot 28 September speel hulle OP in Port Elizabeth, van 30 tot 2 Oktober Griekwas in Kimberley en van 7 tot 9 Oktober vir WP.

Dit sal Muller die kans gee om met sy kolwer-kombinasies te eksperimenteer.

Boland het 'n geskiedenis van gebrekkige kolfwerk en die probleem is aangespreek met die kontraktering van Rashaad Majiet (WP) en Mark Sanders (KZN). Sanders het verlede jaar vir Natal se B-span vier honderdtalle aangeteken en hopelik sal hy vanjaar dieselfde vir Boland kan doen.

Magriet wat periodies vir WP gespeel het, maar tot dusver meestal in dié provinsie se B-span gekies is, sal ook hoop om sy merk in die Boland te maak.

Die leemte wat deur die uittrede van paaltjiewagter, Steve Palframan, gelos is, sal deur die nuwelinge Wesley Euley (WP, linkerhandse kolwer) en Graeme Marais gevul word. Albei dié spelers is ook ewe behendig met die kolf.

Onder die boulers sal die ervare snelbouler, Henry Williams, die Boland arsenaal lei. Hy sal bygestaan word deur die ewe vinnige Jacques van Wyk en Willem du Toit. Die regterhandse swaaibouler, Wallace Albertyn, wat verlede seisoen weens 'n dyspierbesering buite aksie was, sal vanjaar weer homself in die span wil vestig.

Die draaibalboulers, De Lange en Ontong, rond die Boland se boulaanval af.

DIE span van Paarl Rangers het Saterdag met die laaste beweging van die wedstryd 'n skouspelagtige doel aangeteken om hul wedstryd teen Caledonian Roses in Daljosafat-stadion met 20-14 te wen.

Met dié oorwinning het Rangers 'n tweede plek op die punteleer verseker en dat hulle volgende seisoen weer in die Premier-B liga sal speel.

In die eerste 15 minute het Rangers een aanval na die ander geloods, maar oorgretigheid en swak hanteerwerk het minstens twee drieë in die slag laat bly.

Mark Adams slaag met twee strafdoele, en die besoekers slaag ook met 'n strafdoel om die rustydtelling 8-6 in hul guns te maak.

Kort na die hervatting, vergroot Callies hulle voorsprong toe hul skopper weer met 'n strafdoel slaag. Rangers wis hul agterstand uit toe Roger Ruiters gaan druk en Adams verdoel.

Die spanning loop hoog toe Callies vier minute voor die einde met hul derde strafdoel slaag om die telling 14-13 in hul guns te maak.

Ná die afskop begaan Caledonian Roses 'n fout en Rangers kry besit. Die bal gaan vinnig na die vleuel wat vinnig na Ruiters aan die binnekant aangee. Ruiters klop die heelagter van Callies en gaan druk onder die pale.

Adams verdoel om die eindtelling 20-14 te maak.

Rangers se tweede span verloor 5-14, en die derde span wen 20-0 om hul voorsprong van vier punte op die punteleer oor Franschhoek te behou.

DIE Paarl-atlete het met verskeie onlangse padwedlope gewys wat in hul steek.

Onder die skoner geslag was Styntjie Prins die tweede veteraan wat die Puma Skiereiland Marathon in Simonstad voltooi het. Sy was agtste algeheel met 'n tyd van 3:11:44. 

Calvin Kroutz se 2:52:16 was goed genoeg om 'n 32ste plek te behaal. 

Tydens die halfmarathon wat by dieselfde geleentheid gehou is, was Hester Kotze die 15de vrou en tweede meester. Sy het die wedloop in net meer as 96 minute voltooi.

Elton Dass het die Riebeek-Kasteel Halfmarathon binne 93 minute en 28 sekondes voltooi om 38ste plek te behaal. William Michaels was kort op sy hakke in 44ste plek met 'n tyd van 95:51. 

Die vroue het ook tydens hierdie wedloop hul kant gebring. Cecilia Koen was 9de met haar tyd van 105:29. Ishelle Komado was die eerste junior (26ste algeheel) met 'n tyd van 122:37.  

HOEWEL Albions Saterdag in sy Premierliga A wedstryd op Faurestraat Stadion teen Paarl in die eerste helfte oorheers het, kon hulle dit nie deurvoer vir 'n sege nie.

Albions het op 'n hoë noot begin deur Paarl voor en agter aan te val. Hulle ruik ook eerste bloed toe Alwyn Hugo met 'n strafskop slaag. Hugo is weer die staatmaker toe hy kort daarna 'n drie in die hoek druk.

Met die wind wat gunstig vir hulle waai, verhoog Albions die druk en gaan kuier John Stevens in die doelgebied. Hugo verdoel.

Die heelagter, Ashley Manuel, druk om Albions rustyd met 20-3 te laat voorloop nadat Jacques Hendricks 'n strafskop vir Paarl oorgesit het.

In die tweede helfte was dit Paarl se beurt om saam met die wind te speel. Die tuisspan druk vier drieë deur John Claasen (2), Mark Kruger en Philip van Staden. Hendricks wat met twee doelskoppe en nog 'n strafskop slaag, rond die wedstryd af vir 'n 30-23 sege.

Albions se enigste punte van dié helfte kom van 'n skepskop deur John Stevens wat ook as hul speler van die wedstryd aangewys is.

Paarl se tweede span wen 25-3 en die derde span wen 19-5.

Young Peoples het Saterdag op Kenilworth met 'n puik spanpoging vorendag gekom om Primrose 22-20 te klop. Daarmee het Peoples die tuisspan uit die derde posisie op die punteleer geskouer en verseker dat hulle volgende seisoen in die Eersteliga speel.

Die wedstryd is in 'n stormsterk wind gespeel en Primrose het van meet af sake vir Peoples bitter moeilik gemaak en met harde en robuuste spel die Paarliete uit die wedstryd probeer haal. Die Tiere het egter die druk absorbeer en vir 80 minute lank soos ware tiere bly veg.

Die telling het deurentyd bly wipplank ry. 'n Spesiale stukkie spel in die 65ste minuut deur Ricardo Cornelissen (senter) het vir die keerpunt gesorg. Sy drie onder die pale het Peoples die voorsprong gegee.

Die tuisspan het in die laaste kwartier verbete aangeval, maar Peoples het dit beheersd afgeweer om so die wedstryd te beklink.

Melvyn Hermanus het met vier strafdoele en een doelskop geslaag.u

DIE rugbyspanne van Paarl en Young Peoples pak mekaar Saterdag op Daljosafat in hul laaste ligawedstryd van die seisoen.

Paarl wat tans die voorlopers is in die Premierliga A (75) sal hul plek bo-aan die punteleer wil behou, terwyl die Tiere (61) weer hul vierde posisie sal wil verbeter met 'n tuis-sege.

Paarl beskik oor agt Disa-spelers en het tot dusver net vier wedstryde verloor. Hoewel hulle die gunsteling is, was een van hul nederlae teen Peoples in die eerste ronde.

Volgens Trevor Davy sukkel Peoples egter met beserings, met sy beste senters Justin Fortuin (skouer), Sam Titus (gebreekte duim) en Herbie Pietersen (enkel) wat al drie op die kantlyn is.

Dan hang daar ook groot vraagtekens oor die nuwe losskakel-vonds, Dalwaine Cornelissen, en vleuel Jacques Lategan wat teen Primrose beseer is. Die Tiere se staatmaker-haker Cedric Williams en Rowan Claasen (slot) se seisoen is ook iets van die verlede.

"Almal weet egter as die Tiere die dag saamspeel, en die maroen-en-goue trui voor alles stel, is daar perde. Die span het reeds bewys dat as jy nog vir die liefde van die spel en vir klubtrots speel, alles moontlik is."

IN 'n aksiebelaaide wedstryd op Daljosafat het Young Standards Saterdag 46-42 met Raithby afgereken.

Dit was vir albei spanne 'n kritieke wedstryd aangesien die wenner nog in die wedloop sal wees om sy plek in die Premierliga C te behou.

Die wedstryd is teen 'n vinnige tempo gespeel en na 10 minute het die besoekers reeds 10-0 voorgeloop.

Twee drieë deur Marchall Brown en Elroy Arendse en 'n doelskop deur Elroy Arendse het Standards die voortou laat neem.

Raithby se agterlyn hardloop egter kringe om Standards se verdediging en ná 'n strafskop breek die rustyd aan met die telling op 18-12 in die besoekers se guns.

Ondanks Raithby se goeie gebruik van die wind om in Standards se gebied te kom, en die aanteken van 24 punte, klou die tuisspan verbete.

Standards se Juwaan Cornelissen (2), Jakkie Arries, Bradman Arendse en Brendon van Schoor druk drieë en Davey slaag met drie doelskoppe en 'n strafskop om die wedstryd te beklink.

Lynden Lewis en Lee Scholtz was die voorspelers wat vir Standards uitgeblink het.

DIE droom van Newtons om in die eindstryd van Boland se Superliga A2 te speel, is Saterdag aan skerwe gelê toe hulle teen Grabouw vasgeval het. Newtons het 14-11 verloor.

Met 'n vurige agtal aan die spits het die manne van Grabouw gou 'n voorsprong van 3-0 gehad. Newtons slaan egter terug met twee strafdoele deur Roderick Claasen (skrumskakel).

'n Drie deur losskakel, Ranfred Dazel laat Newtons rustyd 11-3 voorloop. In die tweede helfte was daar egter net een span op die veld - Grabouw.

Met 'n agtal wat al meer oorheers, teken Grabouw nog twee strafdoele en 'n drie aan.

In beseringstyd word 'n strafskop aan Newtons toegeken, met 'n kans om die telling gelykop te maak en só na die eindstryd deur te dring. Die strafskop misluk egter.

Vir Newtons het Ronnie Lottering (stut), Vlam Davids (vleuel), Ranfred Dazel (losskakel), Jonathan van Schalkwyk (senter) en Roderick Loverlot (haker) moedig probeer.

* Newtons vier vanjaar hul 60-jarige bestaansjaar met 'n feesdag op 27 September teen Roses United. Stalletjies vir dié dag is beskikbaar teen R150.  Kontak Thys by 083-333-3461 of 862-6437.

DIE Paarl Aquarius Swemklub vier vanjaar sy 25ste bestaansjaar.

Hulle vra dat alle oud-lede, waterpolospelers, ouers, ondersteuners, sinchroniseerders, kortom enigeen wat die afgelope kwarteeu by die klub betrokke was, met hulle in verbinding tree.

Hulle soek die inligting vir 'n brosjure oor die klub en ook vir al die ander feestelikhede wat beplan word.

Skakel Steven Booysen (872-0100 of 082-829-3937), Isaac Kock (862-5838 of 862-3900), Charmaine Muller (874-1271) of Nazli Gaidien (862-5457).