TYDENS die jaarlikse spoggeleentheid aangebied deur die Wellington Rapportryers, is PH Nortjé vereer met die gesogte toekenning Wellingtonner van die Jaar.

Dit is gedoen uit erkenning vir die besondere en deurlopende wyse waarop hy Wellington deur middel van sy skryfwerk aan die land bekendgestel het. 

Albert Marais, voorsitter van die Rapportryerskorps op Wellington, het in sy huldiging verklaar dat "oom Henry" waarskynlik meer as enigiemand anders die dorp op die kaart geplaas het. 

Nortjé se middelste seun, Francois, het die toekenning namens sy pa in ontvangs geneem aangesien Nortjé senior ongesteld is.

Nortjé en sy gesin het in 1954 Wellington toe getrek waar hy die eerste hoof van die Hugenote Laerskool was.

Daarna het hy betrokke ge-raak by die onderwyskollege op die dorp waar hy tot 1982 viserektor en waarnemende rektor van WOK was. 

Hy was bekend vir sy fyn humorsin en gemoedelike geaardheid as vaderfiguur by die kollege.

In die jare vyftig en sestig  het hy 'n reeks humoristiese sketse oor die dorp se inwoners vir Die Huisgenoot geskryf. 'n Keur hiervan het verskyn onder die titel, Wellington se Suiker. 

Ander boeke uit sy pen is Die Wildedruif Val, Die Groen Ghoen waarvoor hy die Scheepersprys vir jeuglektuur ontvang het, en die mees onlangse Kor-sies van Growwebrood. 

Hy het altesame 23 boeke gepubliseer. Hy wen in 1982 'n prys vir die beste jeugroman, in 1994 die ATKV prys vir jeuglektuur en in 1998 die FAK-prestigeprys vir sy bydrae tot ontspanningslektuur.

Na sy aftrede in l983 het Nortjé en sy vrou hulle in die Strand gevestig waar hy steeds as Wellingtonner bekend staan. 

Onder die gaste by die funksie was vorige wenners Annatjie van Wyk, Herman Bailey, Johan Mouton en Etienne Smit. Verlede jaar se wenner, die plaaslike onderwyskollege, is verteenwoordig deur Vincent Landey, kampushoof van die Wellington kampus van die Kaapse Technikon waarby die onderwyskollege nou ingeskakel is. 

Die spreker, adv Frans Stroebel wat verbonde is aan die Vredesparke Stigting, het gepraat oor leierskap in 'n veranderende wêreld. Hy het die gehoor aan sy voete gehad met sy spitsvon-dighede en opwindende mede-delings oor Suid-Afrika se toe-rismepotensiaal.  

* Author PH Nortjé, formerly of Wellington, received the Wellingtonner of the Year award last week.