|
 FRANSCHHOEK se bekende Jan (Patat) Roux, voormalige onder-burgemeester, kultuurkenner en meesterbouer, is gister dood in sy woning aangetref.
'n Moordklag word ondersoek, al is daar geen tekens van inbraak nie, en kon daar nie vasgestel word of iets uit die woning, Die Eike in Akademiestraat, vermis word nie.
Mnr Roux (72) se liggaam is ontdek toe 'n sekretaresse van Franschhoek Meesterbouers die oggend voor 'n geslote deur van die huiskantoor gekom het.
Sy seun, Deon Roux, het die deur oopgesluit en sy vader op die vloer in die badkamer aangetref.
Hy was leweloos, met 'n snywond aan sy wang en kneuswonde aan sy arms.
"Die motief is duister," het kapt William Reid van die Boland-area kommunikasiediens gesê.
"Die omstandighede is egter so vreemd dat 'n moorddossier geopen is en totdat 'n na-doodse ondersoek die teendeel bewys, word moord ondersoek.
"Geen verdagtes is nog geïdentifiseer nie."
Jan Roux, wyd bekende restourasiekundige, was wel afgetree, maar steeds nou betrokke by sy Franschhoek.
Hy het gedien op Franschhoek se estetiese komitee, was lid van die trusteeraad van die Hugenote gedenkmuseun, op die Franschhoek Trust en het belang gehad by die dorpsmuseum.
Onlangs is daar in die tuin van die stadsaal vir hom 'n borsbeeld onthul vir sy diens as voormalige burgemeester en jarelange stadsraadslid, en is hy tot ere-raadsheer benoem.
"My grootste verwyt is dat hy nooit kon doen wat hy vir sy dorp wou doen nie, 'n boek oor Franschhoek wat ons hierdie winter voor sy kaggel sou aanpak," het Annemarie Burger, museum-vakkundige, gesê.
"Sy kennis van die argitektuur van Franschhoek, die geskiedenis en die Vallei en sy mense, is nou weg."
Mnr Roux word oorleef deur sy seuns Deon (aan hoof van Franschhoek Meesterbouers), Charl van Somerset-Wes en sy dogter Carina de Villiers van Goudini, asook agt kleinkinders en sy suster Margaret Rabie van Franschhoek.
Die roudiens is Saterdag om 10:00 in die NG Kerk, Franschhoek.
* A former deputy mayor of Franschhoek was found dead in his home yesterday. |
