|
 "JULLE kan maar vir my dophou
Ek is nie die GROOT oog
wat waak oor die smalle en breede weg nie.
Ek is maar net sy afgevaardigde -
gewoon mens - uit 'n vrou gebore -
maar 'n gesant - een wat gestúúr is Oudtshoorn toe."
Só begin Johann Nel se splinternuwe eenmanvertoning, 'Broer Loer!', wat vanjaar by die Kunstefees of Oudtshoorn te sien is.
Die teks is weer eens gebaseer op die werk van MM Walters, een van Nel se gunsteling-skrywers.
"Ons draai Groot Broer se kameras om en loer 'n slag na hulle wat so lus-tig en voël-vry koeke-loer... Dié satire openbaar wat agter die loersiekte lê - die Afrikaner in 'n veranderende Suid-Afrika!"
Die satiriese stuk is in die Hindon Lesinglokaal en kaartjies kos R40. Regie is oudergewoonte deur Juanita Swanepoel. Sy en Nel het die afgelope jare bewys dat hulle 'n wen-kombinasie vorm.
"Sy is 'n wonderlike regisseur met 'n besondere aanvoeling vir die woordkuns," prys Nel.
Nel, gebore en getoë op Despatch, het hom in die sewentigerjare in die Paarl kom vestig.
Hier het hy vir 23 jaar Engels gegee by Hoërskool Gimnasium en hier het die toneelgogga hom ook ernstig gebyt.
"Kyk, ek het altyd gehou van voorlees en op skool moes ek gereeld my lesse vir ander onderwysers en klasse gaan lees, omdat ek dit so 'móói' gedoen het."
By Gimnasium het hy dramas opgevoer, van komedies tot tragedies en selfs 'n swart-en-wit rolprent gemaak. Sy studente het gereeld by die ATKV- en ander toneelfeeste opgetree en pryse gewen.
In die negentigerjare verlaat hy Gimnasium vir die reklame-wêreld waar hy hom nog steeds bevind.
In dié jare nader Juanita Swanepoel, toe by die Universiteit van Stellenbosch, hom om saam met die studente te speel in die gewilde 'Só is ons gebek'.
Uit dit het die verbintenis tussen die twee ontwikkel en in 1998 word 'Uitverkoop' uitverkoop op die KKNK. Gebaseer op die werk van MM Walters, eindig die stuk vierde op die top tien van Krit, die feeskoerant.
Nel se fassinering met Walters kom 'n lang pad. In 1975, in Taaljaar, het hy gespeel in 'Die Wingerdstok sal rank', Walters se opdragwerk. Later is hy ook in 'Drakenstein, O Drakenstein', 'n opdragwerk vir Paarl Munisipaliteit en ook 'Heildronk op Boschendal', wat vir Boschendal geskryf is.
In 1999 volg 'Praat van die Duiwel', en toe "Ha-ha Afrika", albei uitverkoop.
By verlede jaar se KKNK wy Nel sy aandag aan WEG Louw, een van Juanita se gunstelinge. 'Soveel om vir mekaar te sê' is nog 'n weghol-sukses.
"Eintlik het ek besluit om vanjaar af te vat en 'n bietjie te rus," vertel Nel, "maar uiteindelik het ek besluit ek het 'n verantwoordelikheid teenoor my gehoor wat my die afgelope jare ondersteun het."
En dus is daar 'Broer Loer!'.
Ten spyte van sy sukses op die verhoog en ook as voorleser op die radio, is Nel 'n intens private mens.
"Om met Walters te werk is 'n uiters verrykende ervaring, miskien omdat hy ook baie privaat is." |
