|
Die projek spruit uit die sosiale akkoord tot 'n ontwikkelingsinisiatief wat presies vier jaar gelede onderteken is tussen die gemeenskap, die Franschhoek Munisipaliteit en die Franschhoek Development Company (Frandevco) nadat lank gekla is oor die afwesigheid van laekostebehuising in die dorp.
Nie alleen sal inwoners van plaaslike plakkerskampe nou huise kry nie, maar die ooreenkoms verseker ook werkskepping en ekonomiese deelname aan die prima-eiendomsprojek waar die Franschhoek Country Club Estate aan die voet van die Franschhoekpas gebou gaan word op meentgrond.
Dit sal bestaan uit eksklusiewe kleinhoewes, 'n hotel en spa omring deur wingerde en fynbos op 'n terrein van 102 hektaar wat teen 'n baie billike prys van R13 800 van die Munisipaliteit gekoop is.
Die opbrengs, asook die belastinginkomste wat die ontwikkeling gaan bewerkstellig, sal aangewend word om grondeise op te los, asook vir huiseienaarskap en ekonomiese deelname vir die agtergeblewe gemeenskappe op Franschhoek.
Die sosiale akkoord wat die agtergeblewe gemeenskappe met die munisipaliteit en ontwikkelaars aangaan in ruil vir die behuising, sluit in dat huiseienaars wat skuldig bevind word aan 'n misdaad soos handeldryf in alkohol of dwelms, wat plakkery aanmoedig of in gebreke bly om hul munisipale rekenings te betaal, die reg op hul eiendom verloor. Hierdie verbintenis is ingesluit in die titelakte van elke erf.
Die bemagtigingsarm van die projek sluit ook in gesubsidieerde mediumkoste behuising wes van die tennisklub en 'n aftree-oord van 120 eenhede wat ontwikkel word op restitusiegrond vir winsdeling deur grondeisers en Frandevco.
Hierdie unieke oplossing vir grondeise word deur oud-pres Nelson Mandela gesteun.
Die Mooiwater-behuisingsprojek word ontwikkel deur Newhco. Alle dienste is ondergronds aangebring en daar is 'n verskeidenheid huisontwerpe in volksboukundige styl.
Finansiële pakkette vir aanbouings waaraan werknemers kan deelneem, sal oorweeg word deur Absa, bankier van die projek.
Daar word voorsien dat werk vir inwoners geskep sal word deur die landbou- en kommersiële aktiwiteite wat sal dien as aanvulling tot die hotel en spa op die Franschhoek Country Club Estate wat met 'n "mashie" gholfbaan, boetieks, gesondheidsklub en konferensiesentrum sal spog.
Daar sal ook 'n organiese olyfplaas en akwakultuurkompleks wees met staproetes en vlieghengel. Ander moontlikhede is 'n kulinêre opleidingsentrum en handwerk-kunssentrum.
Op die terrein van 102 hektaar wat grens aan die La Rochelle natuurreservaat, sal ook sowat 80 private eiendomme (kothuise, plaashuise en dorpshuise) ontwikkel word. In die proses sal die fynbos herstel word en indringerplante verwyder word.
Dr Willem Steenkamp, sekretaris van die ANC-tak en uitvoerende beampte van Frandevco, het sy blydskap uitgespreek dat die projek uiteindelik geloods is met die samewerking tussen die gemeenskap, die munisipaliteit en die sakesektor.
Die Franschhoek Bemagtigingstrust (Fremco) onder voorsitterskap van John Samuel van die Mandela Trust, sal omsien na die belange van voorheen benadeeldes wat deelneem aan die projek.
Ten spyte van die algemene tevredenheid, het 'n groep betogers Vrydag hul ontevredenheid te kenne gegee dat die gemeenskap "nie geken is" in die proses nie en nie na die loodsing genooi was nie.
* Franschhoek residents were overjoyed at the launch of the first RDP housing project in the town, which will see 771 new houses constructed this year. |
DAAR was groot blydskap in Groendal, Franschhoek, verlede week toe die nuwe behuisingsprojek by Mooiwater met die voltooiing van die eerste drie huise afgeskop het.