|
DIE twee-jaarlikse Nasionale Hennie Joubert Klavierkompetisie wat deur die Wellingtonse Musiekvereniging, in samewerking met die Kaapse Technikon, Wellington-Kampus aangebied word, begin Woensdag.
Hierdie kompetisie is oop vir top pianiste tot en met die ouderdom van 18 jaar en het reeds Internasionale erkenning ontvang vir die top gehalte van repertorium en aanbieding.
Uit vanjaar se bykans twee dosyn inskrywings, verteenwoordigend van vyf lande van herkoms, het die seleksie-paneel elf deelnemers gekies om aan die semi-finale ronde deel te neem.
Die semi-finale ronde begin Woensdag om 09:00 in die Goodnowsaal en behoort teen 20:30 afgehandel te wees. Verversings sal deur die dag te koop aangebied word.
Op Vrydagaand 30 April is daar 'n semi-finale konsert in die Goodnow waarin al die semi-finaliste sal optree.
Hierdie konsert begin om 19:30 en na afloop hiervan, sal daar 'n prysuitdeling plaasvind, waarin elke semi-finalis 'n goue sertifikaat sal ontvang.
Sekere kategorie-pryse word toegeken en dan word die vyf finaliste aangekondig wat op 24 Junie, begelei deur die Kaapse Filharmoniese Orkes, aan die finale ronde in die Endlersaal, Stellenbosch sal deelneem.
Die deelnemers speel (in alfabetiese volgorde) elk eers 'n sonate van Scarlatti, daarna 'n Suid-Afrikaanse komposisie en dan 'n program van ongeveer 45 minute elk, wat insluit 'n Prelude en Fuga van JS Bach, 'n sonate uit die klassieke tydperk, asook uitgebreide werke uit die 19e en 20e eeue.
Daar sal geen plekbesprekings vir beide die semi-finale rondes wees nie. Seisoenkaartjies is beskikbaar teen R50 wat 'n program insluit wat sal dien as toegangskaartjie vir beide die Woensdag en Vrydag.
Persone wat slegs die konsert op die Vrydagaand wil bywoon, sal R40 toegang betaal wat 'n glasie wyn na die tyd sal insluit. Skoliere en studente betaal R5 vir die Woensdag en die Vrydagaand.
Programme is by die deur beskikbaar.
Die beoordelaars vir vanjaar se kompetisie is: André Serfontein (voorsitter), John Roos (Unisa), Marie Gaerdes (SAVMO), Hendrik Hofmeyr( komponis), Sandra Kettle (UK), Cecilia Laurens (UK) en Johan de Klerk (Wellington Musiekvereniging).
Die elf semi-finaliste is James Bester (Port Elizabeth), Ammiel Bushakovitz (George), Pieter Crathorne (Stellenbosch), Klara du Plessis (Bloemfontein), Henco Espag (Polokwane), Julia Hong (Pretoria), Randy Hu (Windhoek), Esthea Kruger (Stellenbosch), Moonhee Lee (Pretoria), Gareth Ross (Johannesburg) en Bruce Williams (Stellenbosch).
Vir meer inligting kan die Kaapse Technikon Wellington-Kampus geskakel word by 864-5200/864-5228 of u kan die webwerf besoek by www.ctech./conf/piano |
