People - Mense

• Nuwe hoof
• Legendariese Paarlse dokter sterf
• 'n Man met 'n  plan

Sy het 22 jaar gelede as onderwyseres in Biologie en Natuurwetenskappe by die Hoërskool President in Bellville aangesluit en word adjunk-hoof.

Sy het haar man, Pieter, skoolhoof van President, daar ontmoet en is in 1995 met hom getroud.

Die egpaar woon in Thornton, maar sy sien dit nie as 'n nadeel nie.

"Pieter het sy skool, en ek myne. Hy weet hoe betrokke ek by my skool is en hy verstaan dat ek my ure so sal inpas.

"Dit is vir my 'n geweldige uitdaging omdat  Hoër Meisieskool so verskil - kleiner as President, net meisies, dubbel-medium, en 'n koshuis.

"Dit wil voorkom asof hier 'n goeie balans heers tussen kultuur, akademie en sport. Dit is altyd belangrik in 'n skool.

"Ook moet ouers deesdae meer betrokke wees by opvoeding. Alleen as ons die vennootskap van ouer, kind en onderwyser tot sy reg laat kom, kan almal gelukkig wees.

"En van wat ek hier sien, is die Hoër Meisieskool 'n dinamiese en gelukkig skoolgemeenskap."

* Paarl Girls' High has a new principal.

'n LEGENDARIESE Paarlse geneesheer, Piet Rens (84), is Sondag na 'n kort siekbed weens kanker oorlede.

Dr Rens het sy hele professionele lewe (van 1952) in die Paarl gepraktiseer, en het tot kort voor sy dood nog pasiënte gesien.

Hy was so geliefd onder veral sy senior pasiënte, dat hy op hul aandrang genoop was om sy praktyk voort te sit ten spyte van sy ouderdom.

Dr Rens is gebore op Mkhoma in Malawi, waar sy ouers sendelinge was, en het gematrikuleer aan die Hoër Volkskool op Heidelberg (Transvaal).

Hy het na matriek 'n meestersgraad in Sielkunde aan die Universiteit van Stellenbosch behaal, waarna hy besluit het om hom as geneesheer te bekwaam aan die Universiteit van Pretoria. Daar het hy op die Studenteraad gedien.

Hy was alombekend en gerespekteer in sy professie, en was onder meer verskeie kere voorsitter van die plaaslike tak van die Mediese Vereniging. Hy  was van 1965 bestuurslid van Paarl Hospitaalraad.

Hy was 35 jaar lank distriksgeneesheer en was twintig jaar lank (van 1975 tot 1995) op deeltydse basis mediese beampte van Paarl Munisipaliteit, waar hy betrokke was by die bestuur van die Sonstraal TB Hospitaal.

Hy het in sy vrye tyd graag gejag en kleipiering geskiet. Hy was ook 'n kuns- en musiekliefhebber en was voorsitter van die Daljosafat Kunsstigting.

Hy het hom die laaste tien jaar toegelê op chirurgie, en het gereeld spesialiste bygestaan met operasies. Die laaste operasie waarby hy geassisteer het, is in Maart uitgevoer, kort voordat hy siek geword het.

Dr Rens word oorleef deur sy eggenote Ina, en kinders Albrecht van Johannesburg, Marié van die Paarl en Nicolaas van Kaapstad.

Die begrafnisdiens is vanoggend om 10:00 in die NG Toringkerk.

* Well-known Paarl doctor Piet Rens has died of cancer.                                                                                                                                                                                                                  

DAWID HERBERT van die Paarl is nie 'n man wat maklik in sak en as gaan sit nie.

Werkloos en met 'n vrou en twee kinders om te onderhou, het hy gaan sit en sy situasie in oënskou geneem.

Dawid het twaalf jaar ondervinding by 'n bande-onderneming en dit, saam met die toestand van ons paaie, het sy besluit maklik gemaak.

Nou is hy die eienaar van 'n tuis onderneming by sy huis, Adriaanstraat 17, in Smartietown. Hier kan hy enige band, van 'n fiets tot 'n vragmotor, regmaak.

Herbert bied 'n 24-uur diens en het al mense van Gouda, Wellington en die stad gehelp.

Selfs die polisie verwys mense na hom, want veral in die nag kan dit maar lol as 'n mens met 'n pap band sit.

Maar dit is nie die einde van Herbert se drome nie: "As ek net 'n ou, tweedehandse bakkie en kompressor in die hande kry, dan kan ek soveel meer doen. Dan kan ek ry na mense toe en hulle sommer baie vinnig help."

Mense kan Herbert kontak by 072-751-6071.

[ Top ]

[ Top ]