 |
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
||||||||||||||||||||||||||||||||||||||||||||||||||||||||||
|
|
|
|
|
|
|
|
|
|
|
VYF plaaslike spelers, twee van die Boland en drie van die WP, is vanjaar in die SA Skolespan opgeneem. Dié span is Saterdag aangekondig nadat die o.18 Coca-Cola Cravenweek op Nelspruit ten einde geloop het. Die Vrystaat het die WP in die nie-amptelike eindstryd 17-16 geklop en so 'n einde gemaak aan die Streeptruie se oorheersing van die afgelope paar jaar. Ashley Johnson (agsteman), Carlo Prinsloo (stut) en Ricardo Croy (losskakel), aldrie van Paarl Gimnasium, is in die span opgeneem terwyl Randall April (vleuel, Hoërskool Bergrivier) en Hilton Lobberts (flank, New Orleans Sekondêr) as plaasvervangers ook deel uitmaak van die oefengroep. Al die spelers het 'n goeie Cravenweek agter die rug. April het in die wedstryd teen die Valke 'n driekuns drieë ingeryg en so sy span gehelp na 'n 34-20 sege. Johnson en Lobberts het albei verlede jaar in die SA Akademiespan gespeel en was ook deel van die SA o.19 oefengroep. Johnson het in die proewe uitgeval, maar Lobberts het wel die o.19 Wêreldbeker-span gehaal. Die Boishaaier Terry Jacobs (vleuel) van WP is in die SA Akademiespan opgeneem. Die SA Skolespan kom op 14 Augustus teen die Akademiespan te staan in 'n voorwedstryd vir die Springbokke en Nieu-Seeland Drie Nasies-toets op Ellispark. |
|
|
|
|
|
DIE Boland o.21 netbalspan het verlede week in Potchefstroom die interprovinsiale toernooi goed begin deur hul eerste wedstryd teen die WP oortuigend met 43-31 te wen. Die span het deurgaans afgeronde en gedissiplineerde netbal gespeel wat gereeld deur die opposisie en toeskouers gekomplimenteer is. Die spanne was egter uiters mededingend in die rondomtalie-wedstryde. Die Boland-span moes ná sewe wedstryde Vrydagoggend nog die OP klop om hul plek later die middag in die eindstryd teen Vrystaat te verseker. Boland klop OP, wat uiteindelik derde eindig in die toernooi, oortuigend 57-25. Die Vrystaat, wat vier SA o.21-spelers insluit, was op papier die gunsteling om die titel te wen en was die enigste span teen wie Boland in die uitklop-wedstryde 52-51 verloor het. Boland saam met hul afrigter, Mariana van Zyl, was egter gefokus en het van meet af die pas aangegee. Ratsheid op los balle wat die gevolg was van voortdurende druk van al sewe spelers, akkurate voer- en doelwerk, asook konsentrasie, het Boland ná die eerste kwart 17-5 laat voorloop. Vrystaat het egter nie gaan lê nie en was ná die derde kwart slegs vier doele agter. Puik onderskeppings en volgehoue konsentrasie het Boland die vierde kwart 13-11 en ook die wedstryd 46-40 laat wen. Michelle Hess is in die SA o.21-span opgeneem wat tans in die Cosana-toernooi tussen verskeie Afrikalande speel. Claudia Basson, Zsa-Zsa Temmers en Deidré Gerstner is ook in die SA o.21 oefengroep opgeneem vir 2005 se o.21 Wêreldbekertoernooi. Die volledige tellings van die Boland-span: Boland klop WP 43 - 31, Boland klop Gauteng-Sentraal 43-33, Boland klop Zululand 44-41, Boland verloor teen Vrystaat 51-52, Boland klop Noordwes-Suid 52-41, Boland klop Gauteng-Noord 52-27, Boland klop Gauteng-Oos 73-30, Boland klop OP 57-25, Boland klop Vrystaat 46-40. |
|
|
|
|
|
DIE eerste span van Young Peoples kom Saterdag op Daljosafat voor 'n groot toets te staan wanneer hy die moeilike span van Silvertree die stryd aansê. Die Paarliete het in die eerste ronde in Mitchell's Plein lelik op sy neus gekyk toe hy nie die vurige spel van die tuisspan kon hanteer nie. Die wedstryd bied die Tiere 'n gulde geleentheid om homself reg te ruk ná sy 52-19 nederlaag van verlede week. Die spelers weet wat van hulle verwag word en die afrigters sal beslis die sweep klap tydens die span se voorbereiding. Peoples is 'n trotse klub en middelmatige vertonings is onaanvaarbaar. Die klub se ondersteuners sal ook Saterdag weer in hul hordes optrek om die span aan te moedig. Die wedstryde begin om 13:30. Young Warriors verras * DIE span van Young Warriors het Saterdag verras toe hy vir Honey Dews in hul Drakenstein Plaasunie-wedstryd 14-13 geklop het. Ricardo Kalimiena het Warriors se drie gedruk, terwyl Jerome Laurence met twee strafskoppe en Joos Pieterse met 'n skepdoel geslaag het. Young Warriors speel Saterdag tuis teen New Stars. Vineyards staan nie terug vir Retreat * DIE eerste span van Vineyards lê steeds in die tweede posisie op die Vyfde Liga punteleer, nadat hulle Saterdag vir Retreat 29-14 geklop het. Die vertroue wat die keurders in die nuwe losskakel, Victor Manuel, geplaas het, het vrugte afgewerp. Manuel het spel goed dikteer en die agterlyn goed aan die gang gesit. Daarby het hy self een van die vier drieë gedruk en drie doelskoppe en 'n strafskop oorgeskop. Vineyards se staatmaker, Adam Moerat (flank), het weer 'n barshou gespeel en is met twee drieë beloon. Die vleuel, Arief Slamdien het ook gedruk. Die span se kaptein, Abas Hendricks (flank) is as speler van die wedstryd aangewys. Die tweede en derde spanne het 31-10 en 10-5 verloor. Vineyards speel Saterdag weg teen Richmond Rangers. |
|
|
|
|
|
IN 'n poging om die ontwikkeling van jukskei in sy geheel vinniger te bevorder, het die Boland Jukskei Unie onlangs 'n werksessie in die Paarl gehou. Tydens die werksessie is daar besluit dat drie ontwikkelingsessies op 16 Oktober, 13 November en 12 Februarie in elke dorp in die Boland waar daar jukskei gespeel word, aangebied sal word. Volgens Kobus Bester, voorsitter van die Boland Unie, is dit 'n nuwe benadering tot die ontwikkeling van die spel. "Voorheen het ons gekonsentreer om nuwe spelers die spel te leer. Ons wil nou ontwikkeling op alle vlakke van die sport uitbou," sê Bester. Tydens die werksessie waar al 13 klubs in die Boland teenwoordig was, is ses projekte van stapel gestuur om die doelwit te bereik. Projek Global mik om die spel aan soveel moontlike individue bekend te stel, terwyl Projek Afskop gaan poog om meer administrateurs, afrigters en skeidsregters op te lei. 'n Uitreik-aksie na vroue, voorheen benadeelde mense en gestremde individue op deelnemers- en bestuursvlak, is die oogmerk van Projek Bolruit. Projek Windolene mik om alle geleenthede en geriewe as 'n goeie vertoonvenster van die sport te bestuur en toeganklikheid aan almal te verseker. Deur Projek Jukfin probeer Boland Jukskei om finansieel selfhandhawend te wees en laastens, is Projek Commitment ingestel om te verseker dat die Boland aan alle kampioenskappe en toernooie deelneem wat deur Jukskei SA gereël word. Instansies en individue wat belang stel om by van die projekte betrokke te raak, kan Bester skakel by 872-0492 of 072-219-6413. |
|
|
|
|
|
|
|
[ Top ] |
|||
|
[ Top ] |
|||