AL ooit aan 'n heeltemal ander bestemming as die gewone gedink? Wat dan van een van die Pole - Noord of Suid!?

Dit klink mos nou onmoontlik, sal jy sê. Nie as dit afhang van Hans van Heukelum, wat toere na Antarktika en Arktika reël nie.

Hans het besluit om Paarliete die geleentheid te gee om dit ook te kan meemaak. Klink nogal aanloklik om na die yswêreld te gaan as 'n mens dink aan die somerhitte wat nog vir ons voorlê.

Voordat Hans hom in die ysige koue begewe het, het hy ook 'n draai in die Paarl gemaak. Hy het sy loopbaan begin as student aan die Paarl-Opleidingskollege, waar hy twee jaar kuns studeer het.

Hy het sy kunsstudie op Stellenbosch voltooi en daarna 'n jaar lank onderwys aan die toe pasgestigte kunssentrum in die Paarl gegee.

Maar sy voete het gejeuk en hy het allerhande rigtings uitgetoets totdat hy agtien maande gelede met sy eie toeronderneming begin het. Eers was dit net die Pooltoere - waarmee hy in elk geval al nege jaar besig is - maar daar het nog ander bygekom, waarvan die mees onlangse toere met die Trans-Siberiese Sneltrein is.

Luister 'n mens na hoe opgewonde Hans oor die twee Pole raak, kry jy self lus om dit te beproef. Daar wag geensins ontberings op die toeris nie.

Ysbrekers is spesiaal ingerig om luukse huisvesting te verskaf en goeie kos word voorgesit. Kleiner, ysversterkte bote word ook gebruik.

Die beste tyd om Antarktika toe te gaan, is tussen November en Maart, want dan is dit somer en lig. Vir die Noordpool is Mei tot September weer die aangewese tyd.

Hans kan nie uitgepraat raak oor die wonder van die ongerepte natuurskoon nie. En die ongelooflike stilte, wat dit amper soos 'n pelgrimstog maak, kos vir die siel.

Maar gaan luister liewer self na Hans, want hy het al hierdie wonderlike bestemmings self meegemaak.

'n Lesing en skyfievertoning van die Poolgebiede word op Dinsdag 4 Februarie om 18:30 in die Paarl Museum deur Hans aangebied. Skakel Emma Kriel by (021) 872-5563 of 083-364-1463 as jy belang stel om dit by te woon.

A MUCH-LOVED community worker in Mbekweni, Miriam James (60), has died.

Miriam was the backbone of the Help and Healthy Feeding Scheme in the township, seeing to the needs of children and others.

She died after suffering a heart attack in her 112 H-Block home on Saturday January 11.

"It was so sudden," Violet Kota,  said.

"Miriam was so kind and she will be missed by all. It is especially the children who are very sad. She really loved the children and she gave so much to the community.

"It will not be easy to find someone to take her place."

Miriam leaves four children. A burial service will be held at 11:00 on Saturday in the Mbekweni Community Hall.

REHABILITASIE geniet groot aandag by Korrektiewe Dienste en hulle is altyd op die uitkyk vir nuwe geleenthede.

Só is tien gevangenes van Allandale onlangs deur die Rooikruis opgelei in tuisversorging.

Die intensiewe weekkursus het baie van die manne geverg, aangesien sommige van hulle glad nie kan lees of skryf nie.

Volgens suster Ester Lottering maak die groep die lewe baie meer gemaklik vir die mediese personeel asook vir hulle mede-gevangenes.

Hulle versorg pasiënte wat nie siek genoeg is om siekeboeg of  hospitaal toe te gaan nie, in hulle selle.

"Hulle het self 'n diensrooster uitgewerk en verpleeg die siekes 24 uur per dag."

Hulle gaan ook volgende jaar uitgeplaas word na die Luthando tehuis vir verswakte pasiënte om daar praktiese ervaring op te doen.

Allandale het 'n ruk gelede ook 'n groep Dots-versorgers opgelei om na TB pasiënte om te sien. Hulle werk met groot sukses onder die gevangenes.

Suster Lottering sê sowel die tuisversorgers as die Dots-versorgers kry sertifikate en word op 'n buiteregister gelys sodat hulle ná ontslag hulle nuwe vaardighede in die gemeenskap kan gaan gebruik.

Suster Lottering het haar dankbaarheid uitgespreek teenoor die Rooikruis en ook Drakenstein Rotariërs, wat vir verversings gesorg het tydens die kursus.