|
DAT Waylain September leef vir krieket is duidelik. Tydens die onderhoud is dit moeilik om sy aandag te behou en moet dié kranige speler telkens sy oë wegskeur van die wedstryd tussen sy span, Boland, en Griekwas wat deel uitmaak van die SA Plattelandtoernooi.
Wanneer nog 'n paar Boland paaltjies kort op mekaar val en hy sy kop mismoedig skud, besef jy hoe sterk bruis krieket deur sy are.
Dit is dus geen wonder dat hy die enigste Boland speler is wat vir die SA Skolespan gekies is nie. Hy is ook een van twee Boland spelers wat in die Boland o.19 krieketgroep opgeneem is. Die Boishaaier, Vince Pennazza, is die ander speler.
Waar die gewone seun as o.9 tjokker met krieket kennis gemaak het tydens die Bakers Mini kriekettoernooie, was dit nie die geval met Waylain nie.
"Ek het eers in Standerd 1 op Dalweide Primêr begin krieket speel," sê die 18-jarige wat vanjaar in Graad 11 aan New Orleans Sekondêr is.
"Ek was van die begin af meer gefokus op boulwerk," vertel die hotklou. Hoewel hy vandag 'n linkshandige draaibalbouler is, was dit nie altyd die geval nie.
"Ek het begin as snelbouler, maar in 1999 toe ek o.15 was, het 'n rugbesering gemaak dat ek nie meer so vinnig kon boul nie. Dit is toe dat my afrigter, Derick Ruiters, voorstel dat ek begin draaiballe boul."
Ná twee maande se oefening kon hy die bal laat toertjies doen, en sedertdien is daar vir hom niks lekkerder as die kompetisie tussen bouler en kolwer nie.
"Ek hou van die spel - om te boul, kolf en te vang, dit is alles vir my lekker. Dis veral lekker as jy op die veld is en jy kan 'n paar woorde na die kolwer se kant toe gooi. Ek speel die 'game' lekker hard," som hy sy spel op.
Amper net so oorheersend as sy toewyding tot krieket, is sy ondersteuning van sy provinsie. Dit kom veral duidelik na vore wanneer mens hom vra wie sy rolmodelle is.
"Justin (Ontong) en Con (de Lange)," sê hy. Geen van die grootkanon oorsese draaiboulers nie? "Nee, net daardie twee. Hoewel ek links boul en Justin regs, kan hy baie doen met die bal en 'n mens kan baie by hom leer. By Con wat ook links boul, kan jy net soveel leer," vertel die jong man met 'n lojale blik in sy oë.
Hoewel hy tydens die SA Skolespan se onlangse wedstryd teen WP (WP het met sewe paaltjies gewen) twaalfde man was, was sy verkiesing tog die hoogtepunt van sy krieketloopbaan tot dusver. Daar is egter nog baie wat hy wil bereik.
"My mikpunt vir die jaar is om Boland se senior B-span te haal en om daarna vir Boland te speel," sê Waylain wat vanjaar sy tweede jaar vir Paarl-Oos Krieketklub speel.
Hoewel krieket ruimskoots nesgeskop het in sy hart, is rugby ook een van Waylain se voorliefdes.
"Ek speel haker, een van die lekkerste posisies wat daar is. Jy is die 'main' ou daar voor en jy beheer die pak," vertel September, wat al twee keer vir New Orleans se eerste span in die derby uitgedraf het en verlede jaar vir die Boland Akademiespan gespeel het.
Maar as hy moet kies tussen krieket en rugby? "Krieket al die pad," sê hy nog voor die vraag geuiter is.
Hy is 'n aanvallende bouler deur en deur, maar hy beaam dat hy wel aan sy kolfwerk wil skaaf om 'n meer gebalanseerde speler te word. Sy respek vir 'n goeie kolwer word geïllustreer wanneer hy die sterkolwer, Jacques Kallis, uitsonder as sy rolmodel in die Protea-span.
Sy beste prestasie met die bal het hy in 2001 behaal in 'n skoolwedstryd teen Vredenburg waar hy vier paaltjies vir die verlies van net drie lopies ingeoes het. Van sy 10 boulbeurte was nege leeg.
Volgens Deon Muller, afrigter van die Boland krieketspan, is Waylain beslis 'n talentvolle speler.
"Hy het die eienskappe om in 'n goeie speler te ontwikkel, daarby is hy ook 'n linksdraaibalbouler en hulle is maar yl gesaai. Hoewel hy 'n bouler is, het hy al in die middelkolforde 'n paar 30- en 40-talle aangeteken en kan hy in dié opsig ook groei," vertel Muller.
Hy het bygevoeg dat hy Waylain al twee keer genooi het om saam met die Boland span te oefen en dat Ontong en De Lange albei "baie beïndruk" was met sy vermoë om die bal te draai.
Hy het beaam dat Boland goed na die jong speler gaan kyk om te verseker dat hy eersdaags sy plek in provinsiale krieket kan volstaan.
September is die eerste Boland speler wat sedert 1997 in die SA Skolespan opgeneem is. Die huidige Boland snelbouler, Willem du Toit, was die laaste speler wat dié prestasie behaal het.
"Dit is goed om te sien dat die ontwikkelingsprogramme wat daar gestel word, vrugte afwerp," het Pietie Williams, hoof-uitvoerende beampte van die Boland Krieketraad gesê. |
SKY HIGH. Benjamin Makhabane in the white shirt of Mbekweni Sundowns and Xolane Zenzwa of Cosmos, meet in mid-air during their big derby clash in the Castle Third Division match on Saturday. At half time the scores were level at 0-0. A few minutes into the second half, however, Cosmos took the lead when the left wing, Thulani Manqwane scored. Cosmos won 1-0. Pic: Leon Steenkamp