Letters - Briewe

• Die publiek se regte word hier geminag
• Dis moeilik om so iemand te keer
• Verkeersman 'n spesiale geval?
• Dorp gaan agteruit
• Hoekom kry ons nie almal gratis krag soos in Kaap?
• Reëlings by dié konsert was nie na wense nie
• Poskantoor stel my erg teleur
• Waar is die dorp se skoonmakers?
• Wie's jou bure? (Editorial)

EK is seker dat ander mense soos ek die Paarlse Verkeersdepartement gekontak het oor die misbruik van die sypaadjies en strate deur die busse en ander swaar voertuie op die hoek van Tulbagh- en Meerhofstrate.

Hulle het aan my erken dat die omstandighede soos ons dit ervaar nie wettiglik aanvaarbaar is nie.

Daar was voorheen geleenthede waar hierdie voertuie én stukkende motors elders geparkeer was na optrede van die Verkeersdepartement. Kort voor lank herhaal die situasie hom dan maar weer.

Dit is vir my onverstaanbaar dat sommige entrepreneurs vir hulle terreine kan aanskaf om hulle voertuie te stoor, terwyl ander ongestoord aan gaan. Ek rig dus 'n versoek dat daar asseblief moeite gemaak word om die strate vir ons beskikbaar te maak.

Kan die eienaars van hierdie voertuie dan nie beboet word vir die onwettige parkering en gebruik van swaar voertuie in ons strate nie?

Daar is dae en veral naweke dat jy beswaarlik jou ry kan ry soos die voertuie in die straat staan (en dit nog boonop by 'n stopteken).

Gaan ons wag totdat 'n noodlottige ongeluk hom daar afspeel?

Motoris

Die waarnemende munisipale bestuurder, Hennie Barnard, reageer: Klagtes wat betref wetstoepassing kan direk onder Verkeer se aandag gebring word (872-4755). Indien die klaer terugvoering verwag, word dit onverwyld deurgegee.

EK het die hoofberig gelees en ook daarna al die hartseer, verwyte, menings en vrae oor wyle Lisbé Smuts-Smith en die persoon wat na bewering vir haar dood verantwoordelik was.

Kom ek vertel my ondervinding in die wrede wêreld, van ons "moeilike" seuntjie, tien jaar oud.

Wat hy al in sy kort lewetjie "gedoen" het en nog elke dag, laat jou hare rys en gee slaaplose nagte.

Baie mense wat die seuntjie ken en met ons oor hom praat sê: "Mevrou, jy maak 'n misdadiger groot".

Dis woorde wat seermaak, en wat doen jy omtrent die "probleem"  - ons nader baie hulplyne en opgeleide mense om ons te help, waar om te begin.

Ons kry sommer vroeg in die soekproses al te doen met "tyd sal hom uitsorteer, hy is nog jonk".

Maar so sal "jonkbly" vir misdade, diefstal en verkragtings bly tot die dood ons in die oë staar en dan is alles te laat.

Welsyn en skole wil nie "eintlik" betrokke raak nie en gee net "raad en pilletjies" en so gaan die seuntjie voort met sy "speletjies".

Vir toegepaste skole en inrigtings moet hy eers 'n toelaatbare ouderdom hê voordat hy toegelaat word en dan moes hy al verskeie inbrake, diefstalle en verkragtings op sy rekord hê waardeur soveel mense dan al gely het.

Op dié stadium is "alles reeds te laat" vir my en lees ons dan sulke skokkende nuus in ons koerant soos wyle Lisbé Smuts-Smith s'n.

Dit help nie om in koerante te kla nie en jou mening te lug of "die reg in eie hande" te neem nie, want dis maar net sekeres van ons wat "gelukkig" is om te wen daardeur, die res van ons word met pangas, messe en byle doodgemaak nog voordat ons "die reg in eie hande" kan neem.

Wat weet, Paarl

SATERDAGMIDDAG 4 Desember 2004 om 12:40 het verkeersvoertuig CJ 41882 voor my in Jan van Riebeeck rylaan gery.

Aan die noordekant van die Mbekweni robot het hy deur die spoedlokval, teen vinniger as die toegelate 60 kpu gery en die kamera het geflits.

Graag word verneem of:

1. Verkeersbeamptes in uniform  en in amptelike voertuie, sonder sy blou ligte aan, bo die wet verhewe is?

2. Indien nie, watter boete word van hom verhaal?

3. Sal daar dissiplinêre stappe teen hom geneem word omdat hy 'n  slegte voorbeeld vir die ander padverbruikers stel?

4. Hoe sal ons weet wat gaan gebeur indien die saak verder geneem sou word?

Dr N Kahlberg

Die waarnemende munisipale bestuurder van Drakenstein, Hennie Barnard, reageer: Niemand is verhewe bo die wet nie, maar elkeen verdien 'n regverdige kans voor die wet. Indien daar gevind sou word dat daar wangedrag by die betrokke beampte was, sal daar opgetree word ingevolge die beleid en regulasie, maar wat nie noodwendig beteken dat hierdie optrede 'n dissiplinêre verhoor  regverdig nie. Die klaer kan hierdie afdeling enige moontlike tyd, gerus skakel oor optredes wat geneem is.

DIE Paarl is besig om agteruit te gaan en die verantwoordelike persone sien dit óf nie raak nie  of kyk  om gerieflikheidshalwe liefs ander pad.

Dit wissel van mense wat op die grafte slaap, tot die "kamp" by Hugenotestasie en die leë erwe wat so toegegroei is van onkruid dat dit 'n brandgevaar inhou.

As daar 'n goeie voorbeeld is, dan is die kaal grond by Zomerlust Landgoed. Daar was al verskeie versoeke gerig dat dit skoongemaak moet word, maar dit val op dowe ore.  So erg is dit toegegroei dat plakkers kom slaap tussen die bosse.

Om op 'n Saterdagoggend in die Hoofstraat te stap moet jy omtrent 'n akrobaat wees om vir jou 'n pad oop te veg tussen voetgangers en groentesmouse. Vullis word net so op die sypaadjie en in die straat gelos.

Miskien moet daar 'n kennisgewing op die vullisdromme gesit word wat lui; "Hierdie is ornamente, moenie u afval in die drom gooi nie". Dalk sal dít die gewenste uitwerking hê. As ons stadvaders miskien nie bewus is van die toestande nie sal ek dit met graagte aan hulle gaan uitwys.

A Reinkea

DIT is alombekend, alhoewel miskien ver vergete, dat die Sentrale Regering 'n aantal gratis eenhede water en elektrisiteit aan alle huishoudings toegesê het. Plaaslike regerings moet aan die beleid uitvoering gee.

Drakenstein Munisipaliteit het in November 2002 uitvoering aan hierdie Regeringsbeleid gegee. Ons is met 6 eenhede ten opsigte van water en 20 elektrisiteit gekrediteer. Van 1 Junie 2003 is ons met 25 eenhede elektrisiteit gekrediteer.

Hierdie toegewing het egter op 1 Julie 2004 doodgeloop.

In die munisipale nuusbrief van daardie maand word verklaar: "Met betrekking tot die huidige beleid waar alle inwoners die eerste 25 eenhede elektrisiteit gratis ontvang, het die Nasionale Regering 'n verandering ingestel. Voortaan sal slegs verbruikers met 'n 20 Amp stroombreker, 50 eenhede gratis ontvang teen 'n koste van R3,9 miljoen."

In 'n Kaapse persberig van 12 November 2003 het die Nasionale Regering "voorgestel" dat die gratis 50KWh per maand net aan huishoudings verskaf word wat minder as 150KWh per maand verbruik.

Maar by my strandhuis in Gordonsbaai kry ek nog ten spyte van 'n verbruik van meer as 150kwh my 50kwh per maand gratis. Dit blyk dus dat dit - soos in die berig gestel was - slegs 'n voorstel was.

Waarom diskrimineer die Munisipaliteit teen inwoners, terwyl Kaapstad steeds vir almal gratis krag gee? Is dit weens ons hoë uitstaande skuld van meer as R112 miljoen?

Ons is geregtig op gelyke behandeling.

Anti-toi-toi

Die waarnemende munisipale bestuurder antwoord: Altesame 50 eenhede gratis elektrisiteit word voorsien slegs aan verbruikers met 'n 20 ampere aansluiting, omdat hierdie verbruikers as behoeftig beskou word. Ander gefokusde deernishulp word ook aan behoeftige inwoners gegee met behulp van regeringsfondse, wat moontlik elders anders toegepas word.

MET Steve Hofmeyr se vertoning by die amfiteater het ek vir my 'n piekniekmandjie en 'n bottel wyn saamgeneem om voor die vertoning te geniet.

Verlede Saterdagaand met "Drie van die Bestes" se optrede, het hulle my egter by die ingang meegedeel dat ek nie wyn mag inbring nie.

Ek kon nie die wyn in my motor gaan sit nie, aangesien ek my motor 'n kilometer ver by Laerskool Courtrai gelos het. Die wagte by die hek wou ook nie die wyn vir my hou tot ná die vertoning nie.

Ek het dit oorweeg om maar terug te gaan huis toe, maar hulle wou ook nie my kaartjies se geld teruggee nie. Al keuse was dus dat ek die wyn op die grond moes laat uitloop.

As die organiseerders so besluit het, sal ek hulle besluit respekteer. Wat my wel ongelukkig maak, is dat hulle nie konsekwent opgetree het nie.

Waarom laat hulle my by die Steve Hofmeyr vertoning toe om wyn in te neem, maar nie verlede Saterdag nie.

Vooraf is daar baie oor kunstenaars se optrede in die media geskryf. Waarom het die organiseerders nie daarin gemeld dat wyn nie toegelaat sou word nie.

Toe ek by 'n sekere ingang wou ingaan, is ek voorgekeer en ingelig dat dit net vir VIP persone is. Waarom moet hulle 'n mens soos 'n gek laat voel? 'n Kennisgewing met die woorde "slegs vir BBPs" voor die ingang kon baie mense die verleentheid gespaar het.

Van die wagte wat daar gewerk het, het ook nie die nodige temperament om met mense te werk nie. Ek het gesien  hoe 'n niksvermoedende man wat by die sogenaamde VIP ingang ingestap het so hard van agter af deur 'n wag aan sy hemp getrek is dat sy hemp geskeur het.

Ek waardeer wat die organiseerders vir die Paarlse gemeenskap gedoen het met die vertonings en hoop dat hulle daarop sal voortbou.

Ek wil egter net hê hulle moet weet dat daar baie ander mense is wat ook hieroor ongelukkig is en dat die ongelukkigheid maklik opgelos kan word.

JA Muller, Paarl

Die organiseerder, Gerhard Meyer, reageer: Dankie dat u die optrede bygewoon het.

Die perseel is gelisensieer om wynkelders in staat te stel om hul wyne teen baie billike pryse te verkoop. As gelisensieerde perseel laat ons nie drank van buite toe nie.

Dit was ook die reëling met die vorige konsert, maar die sekuriteit wat toe aan diens was, het dit nie konsekwent toegepas nie, dus het ons hul vervang met die optrede van Drie van die Bestes.

Die BBP ingang was wel van 'n bord voorsien, maar is die vorige aand gesteel en kon nie betyds vervang word nie.

Rakende die klagte van die sekuriteitpersoneel se optrede, kan ek noem dat die betrokke maatskappy se personeel by talle van die vernaamste feeste diens doen en gereken word as een van die beter maatskappye.

Ek dra nie kennis van enige klagte wat ontvang is van 'n persoon se hemp wat geskeur is nie, maar indien ek dit ontvang, sal ek dit dadelik oorhandig aan die hoof van die sekuriteitsmaatskappy aangesien sulke optrede nie aanvaar word nie.

Ek hoop dat u die volgende reeks konserte wat vanaf 25 Nov plaasvind weer sal bywoon en versoek ek u vriendelik om maar eerder u bottel wyn by een van die Paarl Kelders se stalletjie aan te skaf. Dankie vir u terugvoering.

OP 17 Februarie (12:50) was ek in die Wellington Poskantoor met 'n hele paar klante wat wag om bedien te word. 

'n Beampte het ingekom en papiere begin rondskuif en ek het haar gevra dat sy ons moet bedien. Toe sy loop, het ek na die toonbank gegaan, net om uit te vind dat 'n bordjie, "Gaan na volgende toonbank" reeds voor op die toonbank geplaas was, terwyl die ry met nog aangegroei het. Die een beampte het net haar handsak geneem en geloop.

Ek sien die poskantoor verkoop nou skryfbehoeftes ook. As hulle nie eens hul normale werk kan doen nie, hoe gaan hulle nog skryfbehoeftes ook verkoop?

Ek stel voor dat hulle die verkopery los en eerder 'n slotmasjien daar plaas wat koel-dranke aan afwagtende klante as lafenis, kan bedien.Gee beter diens, want, indien daar 'n manier was om posseëls in die hande te kry, sou ek dit oorweeg het. 

Gifappel

DOEN asseblief iets aan ons dorp, Wellington!

Die verwaarloosde en onversorgde sypaadjies in die woonbuurte is nie 'n mooi gesig nie.

Dis nié die inwoners se plig, werk of verantwoordelikheid om dit te versorg, in stand te hou of te verfraai nie. Daarvoor is die eiendomsbelasting definitief hoog genoeg.

Meer straatveërs is nodig om die strate gedurende handelsure in die besigheids- area werklik skoon te hou.

Afleivoere en dreineringstelsels is toegegooi onder papiere, koeldrankblikkies, plastiekhouers- en sakke, vrugte en groenteskille.

Hester de Kock, Wellington

DIE ou Paarl Tronk in Bergrivier Boulevard verander eersdaags van status - van 'n hawe vir inbrekers, tot beveiligde meenthuise waar inbrekers nie welkom sal wees nie.

Hoog tyd ook.

Vir dertien jaar lank, vandat die laaste gevangene uit die selle na ander gevangenisse verskuif is, staan die historiese gebou leeg. Tyd het sy tol geëis in verwaarlosing.

So nou en dan het 'n vervaardiger sy span gestuur om 'n kwas verf oor 'n muur en deur 'n sel te trek sodat daar 'n film gemaak kon word.

Maar eintlik het die selle, die binnehof en die werf, die eiendom van bosslapers en kwaaddoeners geword.

Dit terwyl die Departement Openbare Werke kou en herkou aan die wyd uiteenlopende voorstelle wat deur die Munisipaliteit en mense uit die Paarl aan hulle gestel is.

Al die potensiële kopers is opgeweeg - en almal is te lig gevind.

Tot einde verlede jaar. Toe gee Openbare Werke se minister Stella Sigcau die ja-woord vir die lede van Mbekwenpower Investment CC en hul beoogde multi-miljoen behuisingskompleks.

Die land het 'n reuse tekort aan tronke ja, maar die Paarl het 'n ewe groot tekort aan ruimte vir wooneenhede.

En as Paarliete kan kies wie hul bure moet wees, sal dit beslis nie inbrekers wees nie.