 |
|
||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
 |
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
||||||||||||||||||||||||||||||||||||||||||||||||||||||||||||
|
|
|
|
|
|
|
|
|
|
|
DIE Boland Kavaliers kan vanjaar dalk net 'n Oosterse kleurtjie kry, as 'n besoekende Japannese rugbyspeler kan bewys dat hy goed genoeg is om dié provinsie op die veld te verteenwoordig. Die Boland Rugby Unie verwelkom vanmiddag die Japanner, Yohei Shinomiya. Shinomiya, wat vir die Japanse klub Yamaha speel, sal vir die seisoen by Boland se Jackie Abrahams Huis op Wellington gehuisves word. "Ons het dit goed gedink om hom na die Boland te nooi. Dit kan in die toekoms iets beteken vir die Boland om kontak te hê met 'n klub in Japan, hetsy rakende die uitruil van spelers of idees," het die BRU se hoof uitvoerende beampte, Piet Bergh, Maandag gesê. "Ons onderhandel tans met 'n klub in die Boland om te hoor of hy vir hulle kan speel, maar op dié stadium sal hy in die Jackie Abrahams Huis bly," het Bergh bygevoeg. Volgens Bergh is daar geen beperkinge wat die Oosterling sal verhoed om vir die Kavaliers te speel nie. "As hy goed genoeg is, sal hy kwalifiseer om vir die Boland te speel," het hy gesê. Dit is die eerste keer dat die Boland Rugby Unie gasheer speel vir 'n oorsese speler. Die 26-jarige Shinomiya het verlede jaar Japan in die Internasionale Rugbyraad se Sewesreeks verteenwoordig en ook in 2002 en 2003 in Nieu-Seeland rugby gespeel vir die Mid-Canterbury span en North Harbour ontwikkelingspan wat die plaaslike klubkampioenskappe gewen het. Die blitsbuks wat die skaalnaald op 90kg laat bewe, is maar 'n skamele 1,78m lank maar behoort op vleuel/heelagter 'n glibberige kalant te wees om raakgevat te kry. Laat veranderinge aan die formaat van vanjaar se Vodacom-kompetisie het vandeesweek vir Bergh behoorlik laat kopkrap om die logistieke probleme op te los. Die Kavaliers sou op 18 Februarie (Buenos Aires), 23 Februarie (WP), 26 Februarie (SWD), 4 Maart (Maties) en 11 Maart (Leeus) vriendskaplike wedstryde gespeel het, met hul eerste Vodacom-wedstryd op 19 Maart teen die Griekwas op Boland Stadion. Volgens die aanvanklike formaat sou sewe spanne in twee groepe oorkruis teen mekaar gespeel het, met die top twee spanne in elke groep wat in die halfeindstryde sake sou uitspook. Die nasionale kompetisiekomitee het egter vandeesweek besluit dat al 14 provinsies teen mekaar moet speel. Dit beteken dat daar nou datums gesoek moet word vir 'n bykomende ses Vodacom-wedstryde. "Die Vodacom-kompetisie sal dus reeds op 25 Februarie begin. Hopelik kan ons die vriendskaplike wedstryde teen die SWD en Leeus as ligawedstryde afhandel," het Bergh Maandag gesê. Die flank Kobus le Roux sal nie tydens die Vodacom-reeks vir die Kavaliers beskikbaar wees nie, weens sy boerderyverpligtinge op sy plaas tussen Beaufort-Wes en Laingsburg. Hy sal egter weer terug wees vir die Curriebeker-kompetisie. Rugbygeesdriftiges kan môreaand reeds die vorm van beide die Kavaliers en Stormers spanne beoordeel wanneer dié twee mekaar in 'n vriendskaplike wedstryd op Wellington pak. Verskeie groot name uit die Vallei, soos Schalk Burger, Jean de Villiers en Marius Joubert, maak deel uit van Gert Smal se Stormers-groep, terwyl plaaslike Wellingtonners soos Louw Schabort, Boela du Plessis en Claude Arendse vanjaar vir die Kavaliers gekies is. Die spelers wat nie in die Kavaliers-span ingesluit is nie, sal as deel van 'n Boland Uitnodigingspan in 'n voorwedstryd teen 'n Boland Elite-span speel. Die jonger spelers in die Elite-groep sal speel vir een van vyf moontlike plekke in die Jackie Abrahams Huis. Die voorwedstryd begin om 17:15 en die hoofwedstryd om 19:00. Toegang is R20 en gratis vir skoliere. Stormers: Tiger Mangweni, Breyton Paulse, Gus Theron, De Wet Barry (k), Egon Seconds, Gaffie du Toit, Tertuis Carse, Joe van Niekerk, Schalk Burger, Luke Watson, Rob Linde, Alten Hulme, Faan Rautenbach, Hanyani Shimange, JD Möller. Boland: Antonius Verhoeven, Warren Petersen, Piet van Zyl, Jacques Badenhorst, Jonghikhaya Nokwe, Solly Goosen, Charl Blom, Henly du Plessis, Chris Potgieter, Conrad Burke (k), Henk Eksteen, Dawid de Villiers, Tommy Dixon, Gustav Rademeyer, Fabian Brandt. |
|
|
|
|
|
BOLAND ATLETIEK het sy voorbereiding vir vanjaar se SA kampioen- skappe in April met alle erns begin tydens die oefenkamp wat onlangs op Daljosafat Stadion plaasgevind het. Meer as 120 van die provinsie se beste atlete was genooi om die oefenkamp oor drie dae by te woon. Tydens die oefenkamp het die atlete raad ontvang van die internasionale afrigter, Ian Harries, wat onder meer die middelafstandatleet en Olimpiese silwermedaljewenner, Mbualeni Mulaudzi, afrig. Dr Harold Adams, mediese sportwetenskaplike van die Internasionale Atletiek Federasie en voorsitter van Atletiek Suid-Afrika se mediese komitee, het die atlete ingelig oor watter eienskappe 'n atleet nodig het om 'n Olimpiese kampioen te word. Wilfred Daniels, ervare spanbestuurder wat reeds meer as 100 Suid-Afrikaanse spanne oor 'n tydperk van 15 jaar na talle wêreldkam- pioenskappe en Olimpiese Speles vergesel het, het die atlete van raad bedien oor wat benodig word om vir nasionale spanne te kwalifiseer. Richard Stander, Raymond Julies en Basil Jantjies wat saam meer as 100 spanne voorberei het vir internasioanle en nasionale deelname, het inligting verskaf oor hoe atlete kan kwalifiseer vir die SA Kampioenskappe. Tydens die drie dae was al die atlete ook onderwerp aan wetenskaplike toetse onder leiding van dr Cathy Myburgh van die Stellenbosch Instituut vir Sport Wetenskappe om vas te stel waar die atlete se voorbereidings- programme verbeter kan word. Die atlete se vordering sal gemonitor word oor die volgende paar weke en dié vordering sal reeds gemeet word tydens die Boland Atletiekkam- pioenskappe wat vroeg in Maart op Daljosafat Stadion plaasvind. |
|
|
|
|
|
DIE Novel Paarl-span het die naweek verseker dat hulle die eerste ronde van die Bolandse Premierliga as die enigste onoorwonne krieketspan afsluit, deur met beide Paarl-Oos en Victoriane af te reken. Die Paarliete het 11 regstreekse oorwinnings in die kompetisie behaal, met slegs een onbesliste uitslag. Op die New Orleans-velde het Paarl se eerste span Saterdag 'n teiken van 247 afgeslaan, en met nog agt balle van hul 60 boulbeurte oor, op 'n drafstap met twee paaltjies gewen. Sondag op Coetzenburg kon Vics slegs 205 aanteken en die Paarliete het maklik met sewe paaltjies gewen. Met 'n voorsprong van 49 punte op hul naaste teenstanders (Maties), is die Novel Paarl-span nou die absolute gunsteling vir die kampioenskap. Op New Orleans was Paarl-Oos gelukkig om net-net die Top 8-kompetisie te haal, aangesien dié nederlaag gesorg het dat hulle twee plekke afskuif op die punteleer (agste). Hul totaal van 246/7 was die beste wat nog die seisoen teen Lynal Jansen se span aangeteken is, maar was steeds nie genoeg om die ligavoorlopers te pootjie nie. Manfred de Kock (61) en Roswen Jephta (52) het gesorg vir 'n stewige basis met hul tweedepaaltjie-vennootskap van 74 lopies, terwyl Elroy Abrahams (22) en Waylin September (27) ook die kolf lustig kom swaai het in hul laaste paaltjie vennootskap van 48 lopies, nadat die tuisspan gestruikel het op 194/6. Rohan Goetham (3/58) het in sy eerste Premierliga-wedstryd van die seisoen die meeste skade met die bal aangerig vir die besoekers, wat goed in die veld gelyk het. Die vangskoot waarmee Clint Philander van Jephta ontslae geraak het, was een van die bestes dié seisoen, terwyl Anwell Newman se direkte trefslag vanaf die diepby-grens om vir De Kock terug kleedkamers toe te stuur, die gang van die wedstryd verander het. Carlo Crotz en Dave Callaghan se tweedepaaltjie-vennootskap van 51 lopies het die beurt van die Paarl-span momentum gegee, maar die derdepaaltjie-vennootskap van 92 lopies tussen Callaghan (85) en Wesley Euley (75) het gesorg dat Paarl-Oos nooit in 'n posisie was om die wedstryd te wen nie. Callaghan het nege grenshoue geslaan, en Euley twee grenshoue en twee sesse. Dennis November (2/67) en Elroy Abrahams (2/44) het hard probeer vir die tuisspan, maar selfs nadat Jansen en Clint Philander in die laaste vyf boulbeurte van Paarl se kolfbeurt uitgehardloop is, kon die tuisspan steeds nie die uitklophou plant nie. Hilton Solomon het met 21 lopies in 14 balle die beurt kom regruk, om vir Anwell Newman en Goetham toe te laat om die afrondwerk te doen. In sy laaste wedstryd van die kompetisie, het Paarl vir Victoriane tot 205 in 60 boulbeurte beperk. Herman Ingwersen (51), Vince Pennazza (40nun) en Willem Kloppers (34) het met die kolf uitgeblink, maar Newman (2/38) en Callaghan (2/41) het hulle goed in toom gehou. Carlo Crotz (27) het met vyf grenshoue gesorg dat sy span goed afskop, terwyl die tweedepaaltjie-vennootskap van 93 lopies deur die aanvangskolwer William Wilson (42) en Callaghan (92nun) gou die veldwerkers se skouers laat hang het. Wilson het sewe keer die grens opgesoek, terwyl Callaghan met 14 grenshoue en 'n ses sy kolfgemiddelde vir die seisoen opgeskuif het na 109, om te sorg dat Paarl met sewe paaltjies wen. Paarl I speel Saterdag op Daljosafat teen Young Peoples in die 45 boulbeurtkompetisie. Op die Parysvelde het Paarl II die klub se tweede beker van die seisoen ingepalm, toe hulle die eerste ronde gewen het danksy 'n agt paaltjie oorwinning oor Paarl-Oos II (190). Paarl-Oos se Garlin Goliath (43) het die oog gevang, terwyl Alfredo Adams (3/38), Richard Cunningham (3/58), Wayne Williams (46), Marco Walters (88 nun) en Lindsay van der Berg (69) goed vir Paarl vertoon het. Paarl II speel Saterdag tuis teen Young Peoples, Paarl III weg teen Spes Bona en Paarl IV tuis teen Mbekweni. |
|
|
|
|
|
DIE manne het Saterdag skouers oopgemaak en die grenshoue ingeryg by die Wellington Krieketklub se jaarlikse ses-aan-'n-kant kompetisie, met 'n hele paar balle wat selfs geslaan is tot in die aangrensende Boland Rugbystadion. Sestien spanne van onder meer Wellington, Paarl, Tulbagh, Edgemead en Darling het aan dié gewilde sosiale kompetisie deelgeneem. Die kombinasie van 'n sielkundige, 'n ouditeur, die Boland rugbyafrigter, 'n rekenmeester, 'n personeelbestuurder en 'n raadslid was egter een te veel vir hul opposisie. Die Wellingtonse span Neverbeens van Martin van der Merwe, Riaan Broodryk, Hawies Fourie, Nickus Bergh, CD Malan en Danie Kotze het in die eindstryd te staan gekom teen Bavaria, met spelers van onder meer Paarl en Darling. Neverbeens het teen 'n vinnige pas begin kolf om 68 lopies op die telbord te sit. Dié telling was egter nie binne bereik van Bavaria se wilgerlatte nie, en Neverbeens het met die louere weggeloop. Die spanne van Three Ships en PPC het in die halfeindstryde verloor. In die plaatfinaal het Edgemead redelik maklik geseëvier oor die jong Wellingtonse span van die onderneming Mecserve. Die plaaslike span het egter baie goed gevaar ten spyte daarvan dat hulle nuwelinge tot die toernooi was. Die dag se verrigtinge is afgesluit deur 'n prysuitdeling en ete, waartydens klubvoorsitter Piet Hanekom die spelers, sy bestuur, die organiseringskomitee van Marius Groenewald en al die toeskouers bedank het vir hul bydrae tot die sukses van die dag. Pietie Williams, hoof-uitvoerende beampte van Boland Krieket, het die pryse aan die wenspanne uitgedeel. |
|
|