Youth - Jeug

• Hoe 'social' studente?
• Matrieks lê laaste skof af

SOLANK jy vriende het op Wellington, kan jou sosiale lewe - ongeag die hoeveelheid aktiwiteite en fasiliteite vir jongmense en studente beskikbaar op die dorp - nie te beroerd wees nie.

Dít is die Paarl Post se indrukke nadat daar met Kaapse Technikon-studente wat op Wellington studeer, gesels is.

"As ons nie iets spesifieks het om 'n aand te doen nie, sit ons maar in die koshuistuin of enige ander plek rond en gesels," vertel Jako Fourie, 'n tweedejaar-onderwysstudent van Wolseley.

"Of ons braai by iemand se huis," sê Elton Williams, 'n tweedejaar IT-student.

Die koshuiskultuur is ook sterk, met verskillende aktiwiteite wat aangebied word.

Darrin Julies, 'n student in kantoorbestuur en tegnologie (KT), vertel dat hy lid van Navarre se dramagroep was, terwyl sêrkompetisies ook goed ondersteun word.

Sport bly 'n goeie tydverdryf - en hou die studente fiks ook! Talle studente is lede van die plaaslike sportklubs en draf vir dorpspanne uit.

Kroeë is gewilde bymekaarkomplekke, veral omdat dit omtrent die enigste uithangplekke is wat vir studente beskikbaar is. Woensdae is die groot uitgaanaand.

Soms gaan hy en sy meisie alleen uit, vertel vierdejaar-onderwysstudent Jandré Olivier van Mosselbaai, maar meestal kuier hulle as 'n groot groep vriende saam.

Gunstelinguithangplekke blyk die Bell Inn en die Awé Bar te wees, met veral Detour se temapartytjies op Woensdae wat groot aftrek kry.

Wyntoere na plaaslike kelders is 'n gunsteling-uitstappie van die Landbou-studente.

Spottenderwys is genoem dat daar "te veel drankwinkels" op die dorp is, maar dis gou afgelag "want ons is mos studente".

Konsensus is daar nie oor of daar genoeg aksie op die dorp is om die jongmense sinvol besig te hou nie.

Volgens Nicolyn Whittles, 'n tweedejaar KT-student, ontwikkel daar stadig maar seker om 'n "Stellenbosch"-gevoel op die dorp, met al meer studentehuise en fasiliteite wat oopmaak.

Voornemende onderwyseres Deidré van Rooyen van Port Elizabeth stem egter nie saam nie, en sê 'n fliek op die dorp sal definitief welkom wees om studente besig te hou.

Dan sal Jandré ten minste nie meer flieks op 'n rekenaar in sy koshuis hoef te kyk nie!

KT-student Lance Jacobs sou graag 'n bekostigbare eetplek soos die Spur of Saddles wou sien. Baie studente skiet juis graag deur Paarl toe om daar 'n fliek te kyk of gebruik te maak van die verskillende halfprys-aanbiedings op spesifieke dae by die verskillende gesinsrestaurante.

Oukraal, 'n dansplek in Noorder-Paarl, is een van die nuwe attraksies, vertel eerstejaar-onderwysstudent Jorika Coetzee van Kakamas.

Vir hierdie uitstappies is vervoer uiters belangrik, en enigiemand met 'n motor is veral op 'n Woensdagaand gewilder as die gemiddelde sepie-ster in 'n inkopiesentrum.

Met die eksamens wat hierdie week begin het, behoort kuierplekke op die dorp seker stiller te raak soos wat die studente hulself sitmaak agter die boeke - natuurlik afhangend daarvan of daar na 'n moeilike vraestel bietjie troos gesoek moet word of nie.

DIE eindeksamen het vir baie matrieks, en hul ouers, te vinnig aangebreek. Nou moet hulle vir oulaas alles uithaal om die beste uitslae te verseker.

Hoe het sake tot dusver verloop?

Brandon Morrie van Klein Nederburg Sekondêr meen die eerste vraestelle was nie te kwaai nie.

"Ek het lekker geskryf, want indien jy oplettend was deur die jaar, sou dit nie nou sleg gaan nie."

Hy is vol vertroue dat hy werk sal kry as hy hom in sy rigting motorwerktuigkunde bekwaam het.

"Na matriek gaan ek nie by die huis rondlê nie, maar wil beslis gaan werk."

Ook Nokuthula Mkaba van Desmond Tutu Sekondêr meen sy is opgewasse vir die eksamen, want sy was voorbereid.

Volgende jaar wil sy Maatskaplike Werk aan die Universiteit van Wes-Kaapland studeer. Haar goe-ie punte en menseverhoudinge sal bydra tot haar werksukses, meen sy.

Nie almal voel so gelukkig oor die eksamen tot dusver nie.

Modesty Joseph van Klein Nederburg Sekondêr voel dat alhoewel sy harder moes geleer het vir die eerste vraestel, sy tog met 'n A-simbool kan slaag.

"Ek gaan Meganiese Ingenieurswese studeer aan die Universiteit van Stellenbosch, en is bietjie skrikkerig vir dié kursus. Maar ek is positief dat daar baie werkgeleenthede is op dié gebied." 

Baie matrieks meen die moeilikste vakke lê nog voor en is 'n bietjie op hul senuwees daaroor.

Willie Nel, hoofseun van Hoërskool Labori, sê: "Ek was redelik gestres oor die eerste dag van die eksamen, want ek berei my nou al 12 jaar voor vir hierdie tydperk in my lewe.

"Ek het nie gesukkel met die vraestel nie, maar, die moeilike deel kom nog. As alles goed verloop, gaan ek volgende jaar 'n IT-kursus doen by die Kaapse Technikon."

Claude Onverwaght, van Paulus Joubert Sekondêr, wil graag polisieman word. Hy sê dat hy tevrede was met die eerste deel van die eksamen en hom nie sal laat onderkry nie.

"My boodskap aan alle matrikulante: die sleutel tot sukses is om alle vertroue in die Here te plaas."

Ryno Fillis, matrikulant aan Paulus Joubert Sekondêr, meen ook as jy alles insit, sal jy ver kom.

"Ná matriek gaan ek Rekenaarstudies doen - dit is 'n rigting waarin jy altyd werk sal kry."

Charné Mackay van New Orleans Sekondêr sê die senuwees pla glad nie en hoop op 'n A-gemiddelde.

"Ek kan net nie verstaan hoekom almal so 'n bohaai maak nie - dit is maar net nog 'n eksamen."

Ná matriek gaan sy vir twee jaar oorsee werk as au pair en sal daarna op haar studierigting besluit.

Intussen moet die ouers sorg vir genoeg eetgoed vir die studerende kinders.

"Dit is hierdie matrieks se laaste kans om te wys wat in hulle steek en dat twaalf jaar op die skoolbanke nie tot niet gaan nie," het een ouer gesê.

* Local matrics have no study blues.

[ Top ]