Thursday 29 April 2004

This site will be updated on 6 May  2004 at 17:30

Youth - Jeug

• Groot brandskade
• Sarvu staan by sy rugbymense
• Haar kop staan Las Vegs toe

Groot brandskade

[ Top ]

SKADE van meer as 'n halfmiljoen rand is aangerig toe 'n skuur met wintervoer Vrydagnag by Landbouskool Boland in Agter-Paarl afgebrand het.

Die skuur, tot die dak met hooi en strooi gepak, het kort voor middernag begin brand.

Stephanus Potgieter, onderwyser by die skool, het vertel hoe hy die nag iets gehoor het wat soos skote klap.

SMEUL. Skoliere van Boland Landbouskool bekyk die brandskade nadat 'n hooiskuur op die terrein afgebrand het.

Toe hy in die rigting van die buitegeboue kyk, het hy besef "hier is moeilikheid".

Potgieter het dadelik die polisie en nooddienste in kennis gestel. Die polisie was binne tien minute op die toneel, met die Distriksraadbrandweer uit Stellenbosch kort op hul hakke.

Die struktuur is natgespuit om te verhoed dat die brand versprei. Daar was geen gevaar vir diere wat in nabye krale en stalle aangehou word nie, het onderwysers gesê.

Alhoewel die struktuur binne 'n uur geblus was, het die hooi en strooi drie dae later steeds gesmeul.

Die oorsaak van die brand is nog onbekend

* A feed store at Boland Agricultural High School was destroyed by fire on Friday night.

SARVU se onlangse ondersoek na die Boland-skole se sportgrense-dispuut het tot dusver nog geen verligting gebring in die geskil met Ussasa nie.

Prof Piet Ferreira, president van die Goue Leeus Rugbyunie, is op 26 Maart vanjaar deur Sarvu opdrag gegee om die geskil rondom skole in die Boland wat hul rugby vir die WP speel, te ondersoek en 'n voorlegging aan die rugbyliggaam se uitvoerende raad te doen.

Volgens Ferreira se verslag wat Donderdag tydens 'n Sarvu raads- en bestuursvergadering aangehoor is, bevestig Sarvu dat hulle die Cravenweek-grense aanvaar soos uitgestip in die verslag van 'n vorige taakspan.

Die betrokke verslag waarvan gepraat word, is in 2001 saamgestel deur 'n taakspan bestaande uit die Nasionale Skolesportliggam (Ussasa) en Sarvu-beamptes, juis om die Boland-grensekwessie op te los.

Dié verslag is in Junie 2002 deur beide Ussasa en Sarvu in sy geheel aanvaar. Hoewel die taakspan-verslag uitstippel dat die o.18 en o.16 Cravenweek-toernooie onder die vaandel en borgskap en daarom ook volgens Sarvu-grense gespeel word, sê Boland Ussasa dat hulle die verslag anders interpreteer.

Ferreira se aanbeveling aan Sarvu, is gegrond op die deurwerk van die finale taakspan-verslag, 'n memorandum rakende skool- en jeugrugby onder die jurisdiksie van Sarvu, twee briewe van WP Rugby aan Sarvu (gedateer 23 en 25 Maart 2004) asook 'n brief wat Boland Ussasa aan die betrokke skole gestuur het (gedateer 24 Maart 2004).

Volgens Sarvu moet die vier skole (Hoër Landbouskool Boland, Paul Roos Gimnasium, Hoër Jongenskool Paarl en Paarl Gimnasium) steeds vir WP uitdraf, terwyl Boland Ussasa meen die spelers is vir die Boland Cravenweek-span beskore.

Ferreira se voorstel is egter nie deur almal op die vergadering aanvaar nie.

Volgens Pieter Lourens, voorsitter van Boland Ussasa, was hy Dinsdag in gesprek met Brian van Rooyen, president van Sarvu.

"Brian van Rooyen het gesê dat die verslag na die nasionale Departement van Sport asook die Sportkommissie verwys gaan word.

"So daar is nog geen definitiewe uitsluitsel oor die saak nie," sê Lourens.

Volgens Jannie van der Westhuizen, hoof van Hoër Landbouskool Boland, is hy nie verbaas oor die aanbeveling nie.

"Indien Sarvu anders sou besluit, sou hulle hul grondwet moet verander waarin hul provinsiale grense vervat is," het hy gesê.

"Die Cravenweek-toernooi is 'n Sarvu-toernooi, dit is dus logies dat hierdie kompetisie volgens Sarvu-reëls sal plaasvind.

"Sarvu het 14 provinsies, Ussasa het 21. Daar moet op honderde plekke in die land oorvleueling plaasvind, maar nêrens anders is dit 'n probleem nie want dit gaan oor sportdeelname," het Van der Westhuizen Maandag gesê.

"Ons het Boland Ussasa al hoeveel keer gesmeek: 'Gaan praat self met Sarvu.' Maar in die praktyk blyk daar nie vordering te wees nie. Hulle besef Sarvu is outonoom oor sy eie kompetisie," het hy gesê.

"Die skole bly egter daartoe verbind dat hulle 'n onderhandelde skikking tussen Ussasa en Sarvu sal aanvaar - wat ookal die uitslag. Die skole wil nie langer vasgevang wees in 'n dispuut waaroor hulle geen beheer het nie."

PAARL is die lekkerste plek om te bly. Hier is druiwe aan die bome en ons bly tussen die berge.

Só het die bekkige Shané Small (6) van die Paarl die beoordelaars van die onlangse Miss Junior Pageant OVS in Bloemfontein bekoor.

Die klein juffertjie, in graad 1 by Laerskool Gimnasium, hoop om in Julie in Las Vegas deel te neem aan die internasionale been van die kompetisie indien fondse dit toelaat.

Sy sal onder meer in die afdeling vir Miss Cinderella Tot, deelneem, asook in die talent-, persoonlike ouderhoud en fotogeniese kategorieë.

[ Top ]