Thursday 30 October 2003

This site will be updated on 6 November  2003 at 17:00

 Letters - Briewe

• Sit koppe bymekaar vir middedorp
• Tiener se dood was darem so sinneloos
• Hoekom so duur?
• Dit was nie ek nie
• Geen rommel hier
• Die rede vir die suur gesigte

EK stem saam met Elaine dat dit 'n nagmerrie geword het om die Paarlse middedorp te besoek.

My familie en vriende was al direk betrokke by insidente soos motors wat met graffitti bekrap is, spoeg op motor en gewoon afdreiging omdat hulle nie die "motoroppassers" wou betaal het nie (soms tot drie persone per motor).

Die sentrale dorp het  in 'n sekere mate van anargie verval, so erg so dat die plaaslike radiostasie en koerant die mense wat die sentrale dorp en selfs die arboretum wil besoek, gewaarsku het dat veral vrouens en kinders nie handsakke moet dra in Lady Greystraat nie en verkieslik meer as een persoon en  sonder selfone die Arboretum moet besoek , weens boewery.

Daar word deesdae so erg besigheid op die sypaadjies gedoen dat dit baie moeilik is om die winkels binne te gaan.

Sypaadjies is mos nie vir besigheid doen nie - veral as dit reën is daar nêrens om onderdak te loop nie.

Dit is mos verregaande dat betalende belastingbetalers, wat verantwoordelik is vir die stadsvaders se salarisse, nie op 'n beskaafde wyse die dorp vrylik kan besoek sonder om bedreig te voel nie.

As Paarliet beskou ek dit as 'n reg om sonder bedreiging te kan parkeer en besigheid te doen. Die stadsvaders sal ernstig moet besin om veral die sentrale middedorp weer 'n veiliger gebied te maak met ordentlike polisiëring en wetstoepassing.

Daar is sprake dat 'n winkelsentrum met veilige parkering en 'n plek waar 'n mens ongehinderd kan gaan inkopies doen, in Suider-Paarl opgerig gaan word. Dit sal 'n doodsteek vir die sentrale dorp wees en besighede in die middedorp sal so swaar begin trek dat van hulle heel moontlik hul deure sal moet sluit - tot nadeel van almal en armoede sal dan verder in die hand gewerk word.

Ek sal tans ongelukkig so 'n ontwikkeling moet ondersteun, want dit sal 'n baie veiliger alternatief vir my familie wees.

Ek stel voor dat alle middedorp-besighede en die stadsvaders dringend koppe bymekaar sit om die middedorp weer 'n vriendelike, ongehinderde besigheidsentrum te maak soos reeds voorgestel is, voordat nuwe ontwikkeling dit van ons af wegneem.

Kaapstad en Johannesburg se sentrale middedorp gebiede het dit reggekry, so ons kan ook.

Roelf Louw

INNIGE simpatie aan die familie en die vriende van Terence George wat onlangs sinneloos en wreed in 'n plakkerskamp op Franschhoek vermoor is.

Mag die herinneringe aan sy mensliewendheid die rouproses, aanvaarding, aanpassing en vergifnis voed.

My hart is seer oor hom. Ons het 'n veldjievrienskap gedeel en ek het hom leer ken as 'n intelligente, optimistiese, netjiese tiener met 'n uitsonderlike belangstelling in kuns- en handewerke".

Hy het my op 'n dag gehelp om 'n vrag boeke te verhuis en het my met erns meegedeeldat hy ook eendag 'n huis vol boeke en prente sou bewoon, "net vir die werklike plesier".

Terence was wys. Ek het op 'n stoep gesit en koffie drink toe 'n bekende eiendomsmakelaar van die dorp hom van die sypaadjie af gevloek het omdat hy glo te hard gepraat het en skuldig was aan al die sondes van al die straatkinders.

Terence het die kru taal en aggressie met waardigheid verduur en homself toe stil-stil uit die voete gemaak. Ek het by hom aangesluit en met simpel verskonings die verwonding probeer salf.

Hy het omgedraai, die makelaar wat kopskuddend en swetsend straat-af gemarsjeer het, agterna gekyk en toe gesê: "Die oumeneer is seker maar kwaad vir sy eie dinge. Kyk, niemand groet hom nie..."

Ons het aangestap en mense het vir Terence getoet, geterg, gehallo, geglimlag en gewaai. En so het dit kennelik ook in die hemel gebeur.

S Groenewald

DIT is algemene kennis dat petrol in Gauteng 'n paar sent per liter meer kos as aan die kus.

Die verskil van 'n paar sent per liter is geregverdig as in aanmerking geneem word dat daar onder andere 'n pypleiding is wat die petrol na hulle neem en wat ekstra koste beteken. 

Dit is ook algemene kennis dat daar by die prys van petrol 'n heffing ingesluit is vir die instandhouding en bou van paaie. 

Lisensiegelde van voertuie is sekerlik ook vir dieselfde doel betaalbaar. Daarom word daar dan ook meer betaal vir die lisensie van 'n swaar voertuig as vir 'n ligte voertuig. Dit alles is logies en regverdig.

Wat egter nie logies en geregverdig is nie, is dat die motoris in die Wes-Kaap R252 lisensiegeld moet betaal vir presies dieselfde voertuig waarvoor die motoris in Gauteng lisensiegeld van R123 betaal. Albei voertuie word slegs vir private doeleindes gebruik.

Ons het nou wel die see en die berg hier, maar jy sien nie voertuie op die see of bo-op Tafelberg ry nie. Gauteng het ook nie beter paaie as die Wes-Kaap nie.

Die betrokke owerheid is dit aan die motoriste van die Wes-Kaap verskuldig om te verduidelik waarom so 'n verskil en waarvoor dit aangewend word. Dan hoor ons nog van tolpaaie!

A Kritzinger

EK sien ene Christa Franken kla oor die diens van Pick 'n Pay op Wellington.

Ek persoonlik het geen probleem met Pick 'n Pay se diens nie, en dit lyk my die meeste Wellingtonners ook nie - seker dié dat mense my deesdae so beskuldigend aankyk.

Want ek is 'n onderwyseres met die naam Christa Franke en blykbaar verwar mense my met die briefskrywer. Ek wil my hiermee distansieer van Christa Franken se stellings.

Christa Franke (Vanwyksvlei)

DIT is so lekker om alle Paarlse nuus hier in Kuwait te kan lees op die Paarl Post webblad.

Dit is my tweede jaar wat ek in Kuwait onderwys gee en ek geniet dit baie. Kuwait is langs die Arabiese Golf tussen Irak en Saoedie-Arabië.

Moenie dink dit is deurmekaar hier nie, dit is nie. Ons kan vrylik rondbeweeg en hoef nie eens aan geweld te dink nie.

In die winkels koop ons so lekker sonder om te betaal vir die plastieksakkies. Sakkies is so volop hier, dat winkels sommer net een item in 'n sakkie sit.

Die rondstrooiery van plastieksakke word nie hier geduld nie.

Nicolette van Zitters

DAAR word deesdae baie klippe gegooi na Suid-Afrikaners wat pessimisties is. Ons moet glo minder kla en meer glimlag.

Maar dit is maar half moeilik om te lag as 'n mens die probleme rondom jou sien.

Soos nou weer met die ondersoek wat die Demokratiese Alliansie na die stadsraad gevra het oor die aankoop van 23 duur skootrekenaars sonder 'n tenderproses en die halfblad-advertensie van die NNP/ANC koalisie wat onlangs op munisipale koste in die Paarl Post geplaas is.

Oor geen van die twee sake is die publiek ooit behoorlik ingelig nie.

Daar is wel gesê net die uitvoerende raadslede kan aanspraak maak op skootrekenaars en ook net as hulle eers die 'nodige vaardighede' aanleer.

Maar wie het nou rekenaars gekry, en hét daar enige opleiding plaasgevind?

Ingeligte bronne sê net raadslede wat 'n kursus voltooi het, het rekenaars gekry.

Die rekenaars wat vir die amptenare geoormerk was, is weggesluit totdat die burgemeester en speaker tot 'n besluit kan kom oor die benutting daarvan.

Heelwat geskokte wenkbroue is ook gelig ná die munisipale advertensie in die Paarl Post waarin openlik partypolitiek bedryf is.

Daar was sprake van 'n ondersoek en dat die betrokke partye sal moet opdok vir die koste. Maar toe is die rekening deur die Munisipaliteit betaal met belastingbetalersgeld, sonder dat 'n haan weer daarna gekraai het.

Miskien as die publiek beter ingelig word oor wat met hulle belastinggeld gedoen word, en of dit binne die wet gebeur, sal daar meer rede wees om te glimlag.

Intussen sal baie van ons maar met suur gesigte rondloop.