Thursday: 31 July 2003

This site will be updated on: 07 August  2003 at 17:00

Sport

• Nuwe leier vir Boland krieket
• Niks is seker in Gim, HJS stryd
• Van der Walt verower Maleisië weer
• Soccer club seeks junior players urgently
• Peoples ryg drieë in
• Boland landloop-proewe op Malmesbury gehou
• Klein Nederburg, New Orleans hoërskole hou derby
• Gardens proe sukses

"AMPUTASIE is pynlik vir die fisiese liggaam, maar dit is ook bevorderlik vir groei."

Met dié stukkie beeldspraak het Henry Paulse, president van Boland Krieket, Vrydagaand aangekondig dat hy homself nie weer verkiesbaar stel as dié provinsie se president nie.

"Ek het twee jaar gelede gesê dat ek Boland Krieket sal lei tot en met die Wêreldbeker en ek gaan hou by die besluit," het Paulse in sy finale toespraak as president gesê.

Die visepresident, Peter Cyster, sal voortaan Paulse se skoene volstaan terwyl Peter Ingwersen, tesourier, Cyster se ou posisie sal vul. Cyster en Ingwersen was die enigste twee nominasies vir dié onderskeie posisies.

"As 'n mens 'n goeie administrateur is, hoef hy geen posisie te vrees nie. Jou werksgebied word net groter en dit word net moeiliker om in kontak te bly met die amptenare onder jou," het Cyster gesê nadat hy as president aangewys is.

"Ek is bly vir die kans om te wys dat ek Boland Krieket 'n ent verder kan neem. Dit is 'n uitdaging wat ek gaan aangryp en dit is vir my belangrik dat ek dit met die ondersteuning van die klubs sal doen.

"Dit is tyd dat ons nie meer op politieke aspirasies fokus nie, maar op die bedryf self, naamlik krieket.

"Krieket self sal nie voortbestaan as ons sit en wag vir aalmoese van die Verenigde Krieketraad nie. Ons sal self moet inklim en kyk wat ons kan doen," het Cyster gesê.

Daar is ook verwys na die moontlike implementering van die krag-teen-kragbeleid waar ses provinsies in 'n topliga en vyf in 'n ondergeskikte afdeling sal deelneem.

Boland se prioriteit sal wees om vir die topliga te kwalifiseer sou die aanbeveling deur SA Krieket aanvaar word.

Wat betref Boland se geldsake het die tesourier, Peter Ingwersen, gesê dat daar met omsigtigheid gehandel moet word.

"Die groot verskil dié seisoen was die Wêreldbeker-toernooi en die korter seisoen. Die geld wat ons vir die Wêreldbeker-wedstryde gekry het, moet ons goed oppas. Ons wil dit graag vir die klubs gee, maar ons sal eers sake goed moet bekyk.

"Die nabye toekoms lyk nie te sleg nie. Ons beleggings lyk goed en as ons nie te veel geld aan spysenierseise moet uitbetaal nie, sal ons dit maak.

"Oor 20 jaar hou ons dalk weer 'n Wêreldbeker en dié geld moet tot dan hou," het Ingwersen gewaarsku.

In antwoord op 'n vraag van Tommy Fortuin, eienaar van Stumps Restaurant, rakende arbitrasiekoste wat hom toekom nadat 'n geskil tussen hom en Boland in sy guns beslis is, het Ingwersen openhartig gereageer.

"Die rekening word eers volgende week getakseer en dan sal ons presies weet wat die regskoste is. Wat dan ook in die finansiële state reflekteer sal word."

'n Verteenwoordiger wou weet of die Raad 'n mandaat gehad het om met die Arbitrasiesaak voort te gaan, pleks van te skik.

"Elke jaar by Boland is daar 'n geding of 'n dispuut, die dinge moet na 'n kant toe kom," is gesê.

In antwoord hierop het Paulse gesê dat "sekere dinge gedoen moet word, wat soms tot regstappe lei" maar dat 'n mandaat wel verkry is en dat die Raad op aanbeveling van hul regsadviseurs gehandel het.

Ingwersen het bygevoeg dat die kwessie van skadevergoeding vir Fortuin nog beslis moet word, maar dat die bedrag van R5 miljoen soos in die pers genoem is, neig na "sensasie".

Op ander punte is daar besluit dat die klubs se affiliasiegelde dieselfde sal bly vir die volgende jaar en het Dowe en Gestremde Krieket assosiatiewe lidmaatskap by Boland gekry.

Pietie Williams, hoof uitvoerende beampte van Boland, het Paulse bedank vir sy 12 jaar diens wat by by die Unie verrig het.

"Onder u presidentskap het Boland heelwat SA-spelers opgelewer, in 2000 die Standard Bank beker gewen en drie Wêreldbekerwedstryde suksesvol aangebied," het Williams aan Paulse gesê.

Die res van die bestuur is (addisionele lede) Gert Fortuin, Uys Moolman, Louis Smal, Len Moses, Ghalied Jacobs, Andrew Apollis, Fatieg Henry (hoërskole), Piet Krynauw (laerskole) en Simon Hugo (skeidsregters).

Volgens  Williams,  sal 'n tesourier vanaand verkies word.

SATERDAG sal die Faurestraat Stadion weer eens weergalm wanneer die hoogtepunt van die jaarlikse interskole tussen Boishaai en Gim, die o.19A rugbywedstryd, hier plaasvind.

Dit is die 74ste amptelike kragmeting tussen die skole en die geskiedenis het geleer dat vooraf gissings oor wie koning gaan kraai, hand-omkeer kan verander wanneer die spanne van die veld stap.

Vanjaar beloof 'n bulstryd te wees, met slegs 'n kilogram wat die massas van die twee pakke skei.

Boishaai beskik oor 'n oorvloed ervaring met sewe van hul spelers wat verlede jaar ook vir die eerstespan uitgedraf het.

Aan die kant van Gim is dit slegs die vaskopstut, Jacobie Adriaanse, wat in 2002 gespeel het.

Kyk mens na die Cravenweek is dit weer Boishaai wat voorloop met vyf spelers wat vir die Westelike Provinsie gekies is, met twee wat ook in die SA Skolespan opgeneem is.

Gim het drie spelers vir die Cravenweek opgelewer waarvan twee ook vir die SA Akademiespan gekies is.

Maar soos Boishaai se kaptein, Pieter Louw tereg sê: "Jy kan in baie eindstryde speel, maar daar is niks soos 'n o.19A interskole-wedstryd nie."

Die geleentheid is so uniek en die atmosfeer so uitsonderlik dat albei spanne hul alles gee vir hul span en skool, en niks wat voorafgaan kan beslis wat in daardie 60 minute sal gebeur nie.

"Dit hang af van watter span dit die graagste wil hê en wie hul kanse die beste gaan gebruik," sê CP Mouton, Gim se kaptein.

DIE Paarlse gholfspeler Dawie van der Walt het onlangs weer met die louere weggestap toe hy die Wêreld Amateur Interspan-gholfkampioenskappe in Maleisië gewen het.

Dit is die tweede keer dat Van der Walt die individuele kompetisie wen van die toernooi wat vanjaar van 22 tot 24 Julie op die baan van die Palm Garden Resort in Putrajya beslis is.

"Ek was van die begin af twee houe agter die voorloper tot op die laaste dag. Ek het goed begin deur twee voëltjies op die eerste twee syfer vier-gate te slaan en vandaar het dinge vir my reg geloop," vertel Dawie wat die toernooi met baansyfers van 72, 68 en 65 afgesluit het.

Sy laaste ronde van 65 het boonop drie verlore houe ingesluit, maar dit het hom nie gekeer om 'n bruto-telling van 11 onder baansyfer - 'n nuwe baanrekord - aan te teken nie.

Hy het 'n bykomende beker gewen vir die langste afslaan wat die bal 290m ver laat trek het.

Dié Paarliet was lid van die SA span wat uit Philip Crous (ook van Paarl), James Wade en Henk Smit (albei van Bellville) bestaan het.

Die Suid-Afrikaners het tweede gekom in die spankompetisie. Die Eisenhower-span van Indië wat uit dié land se vier beste amateur-spelers bestaan, het die toernooi gewen.

Die toernooi is die eerste van vyf kwalifiserende toernooie wat jaarliks gespeel word. Van der Walt en sy span sal in Desember weer in Maleisië aan die finaal deelneem waar die top drie spanne van al die kwalifiserende kompetisies teen mekaar sal speel.

Van der Walt is vanjaar ook in die Boland senior gholfspan opgeneem.

THE Paarl Soccer Club is in dire need of junior soccer players.

In an attempt to solve this problem the club invites all interested parties to discuss the issue at the Paarl Soccer Club at the Boy Louw fields at 19:00 on 13 August.

"For the first time in our 45 years we have no junior teams - u.9, u.11, u.13 u.15 and u.17 - playing for us," says club spokesperson, Brenda Goddard.

"This is of great concern to the Club as we have always believed that the juniors are the future of our club. But due to the schools now playing soccer, we have lost the majority of our players."

Paarl Soccer Club plays under the auspices of the SA Football Association (Safa), via Safa Western Province and CTT District.

For information contact Brenda on 872-1346. 

YOUNG PEOPLES het Saterdag in sy 39-22 oorwinning oor Van der Stel sewe drieë gedruk en so 'n waardevolle bonuspunt ingesamel.

Die tuisspan is vroeg 'n slag toegedien toe sy kaptein en skrumskakel, Barry Williams, na vyf minute die veld met 'n besering moes verlaat.

Sake het donker gelyk toe Van der Stel in die eerste kwartier 12 punte opgestapel het. Die besoekers was veral voorlangs te sterk en Peoples moes weer sy agterlyn inspan om die kastaiings uit die vuur te krap.

Die Peoples-snellers het dan ook in die laaste 20 minute voor rustyd drie mooi drieë ingeryg en Van der Stel op hul knieë gedwing.

Na rustyd het die tuisspan laat slaplê en die besoekers het met twee onderskep-drieë die wedstryd op sy kop gekeer. Peoples het egter vasgebyt en nog vier keer gedruk om die oorwinning te beklink.

Die driedrukkers was Jody Davids 2, Carlo Carolissen 2, Jacques Lategan, Kurt Martin en Rowan Claasen. Justin Fortuin en Delwaine Cornelissen het elk 'n doelskop behaal.

Peoples se tweede span het met 'n klubrekord-sege van 73-0 gewen, terwyl die derde span 25-7 gewen het.

In teenstelling met hul goeie vertoning verlede naweek, het Albions Saterdag in hul wegwedstryd erg teen Elsiesrivier gesukkel.

Die tuisspan het die wind in die eerste helfte goed gebruik om 'n 19-0 rustydtelling op te bou.

'n Sukkelende pak wat swak bal aan die agterlyn verskaf het, hanteerfoute en verkeerde opsies het Albions se spel in die tweede helfte gekenmerk.

Die Paarliete kon slegs sewe punte aanteken vir die 19-7eindtelling, nadat Ashley Manuel (heelagter) druk en plaasvervanger-losskakel John Stevens verdoel.

Desmond Davids (slot) en kaptein Roderick Allies het voorlangs hul beste gegee, terwyl Brian Arendse (senter) en Manuel die staatmakers in die agterlyn was.

DIE sewende ligabyeenkoms van Boland Landloop word Saterdag op Malmesbury gehou.

Dit sal die eerste keer wees dat Ussasa-atlete en klub-geaffilieerde lede saam aan 'n byeenkoms sal deelneem.

Die bestuur van Boland Landloop verwag 'n groot getal inskrywings, met dié liga wat as proewe dien vir die Boland Landloopkampioenskappe wat op 23 Augustus in Agter-Paarl gehou word.

Atlete sal van o.9 tot Grootmeester-afdelings kan deelneem.

"Die byeenkoms behoort ons 'n goeie idee te gee van die talent wat daar tans in die Boland is, met atlete van al die streke in die Boland wat gaan deelneem," het Chris Davids van Boland Landloop gesê.

Atlete registreer om 08:00 met die o.9 wedloop oor 2km wat om 10:30 wegspring.

'n Werkswinkel vir landloop-beamptes sal ook van 08:00 tot 10:00 by die Hoërskool Schoonspruit op Malmesbury aangebied word.

DIE jaarlikse derby tussen Klein Nederburg Sekondêr en New Orleans Sekondêr begin Saterdag met 'n noenbyt by die Paarl Gemeenskapsaal.

Francois Pienaar is die spreker by die geleentheid wat om 09:30 begin en kaartjies is R60.

Maandag word die kapteinsfunksie (13:00) en leerderfunksie (18:00) ook in die Gemeenskapsaal gehou. Pienaar sal die kapteins in die oggend toespreek en toegang is gratis. Toegang vir die aandfunksie is R7.

Dinsdag begin die sportverrigtinge met die o.16 hokkiemeisies wat om 14:00 by die Parys-velde speel en die o.15 (14:00) en o.17 seuns (15:00) wat by Boy Louw sake op die sokkerveld sal uitspook.

Woensdag word die o.16 meisies (14:00), o.16 seuns (15:00) en o.19 meisiesbasketbalwedstryde (16:00) gespeel.

Die meisies- en seunstafeltennisspanne speel om 14:00 en 15:00. Alle wedstryde is by Klein Nederburg.

Die oud-studentewedstryde (netbal en rugby) begin om 18:00 by Daljosafat gevolg deur 'n disko by die Paarl Krieketklub om 22:00. Toegang vir die Dal sowel as die dans is R10.

Donderdag speel die vlugbalspanne (14:00), netbal (begin 14:00, o.19A speel om 16:00), skaakspanne (14:00) en veerpylspanne (14:00 by die Ambagsvalleistraat-saal) teen mekaar.

Volgende Saterdag begin die o.14A rugbyspanne om 10:00 op Faurestraat speel, met die eerstespanne wat om 16:00 mekaar die stryd aansê.

GARDENS het Saterdag op Gardens Park verras toe hulle vir Lagunya met goeie hardlooprugby 24-15 verslaan het.

Die keerpunt in die wedstryd was toe Chesley Theo met 'n skepskop slaag om die telling 9-5 in die tuisspan se guns te bring. Hierna kon die besoekers nie meer hul voete vind nie.

Gardens se uitblinkers was Chesley Theo, Anwar Daniels, Riaan Cloete en Louis Moses. Arnold Fortuin, Jeremy September en Nico Fertyn het drieë gedruk terwyl Theo met 'n verdere twee strafdoele geslaag het.

'n Verswakte Weermag-span het op hul tuisveld vir Paarl Rangers klippe laat kou in die eerste helfte van hul Premierliga B-wedstryd Saterdag.

Met die wind in hul guns kon Rangers nie 'n deurbraak maak nie, terwyl die tuisspan wat baie van hulle gereelde spelers verloor het weens verplasings, 'n strafdoel behaal het om die rustydtelling 3-0 te maak.

Ná rustyd het Rangers egter met 'n regrukpoging gekom. Hulle druk vier drieë, waarvan een verdoel is, teenoor Weermag se tweede strafdoel van die wedstryd vir 'n eindtelling van 22-6.

Rangers se drieë is gedruk deur vleuels Eric Plaatjies en Roger Ruiters, Randall Petersen (heelagter) en Kevin Pietersen (flank) terwyl Mark Adams (skrumskakel) met 'n doelskop geslaag het.