|
deur die Reik na 'n Droom organisasie.
"Hy is so 'n moedige kind dat hy dit eintlik makliker maak vir ons as ouers om die operasie te verwerk," sê sy ouers Rochelle en Reginald Arendse.
Maar vir Richard-Dean lê nog 'n lang pad voor.
Nie net moet hy die proses van chemoterapie deurgaan nie, maar ook die newe-effekte soos naarheid, braking, neusbloeding, koors en mondsere wat met dié behandeling gepaard gaan.
Die tenger seuntjie lê op 'n rusbank met 'n wit kombersie beskermend oor sy onderlyfie gegooi en flits so af-en-toe 'n skaam glimlaggie wanneer hy hoor daar word oor hom gepraat.
"Baie aanpassings sal natuurlik gemaak moet word," vertel pa Reginald.
Dié onderwyser is tans met verlof om saam met sy vrou na hul seun om te sien.
"Hy moet nog gereeld teruggaan hospitaal toe vir chemoterapie. Volgens die medici was dit 'n uiters rare verskynsel dat die kanker na sy regterbeen versprei het, nadat sy linkerbeen geamputeer was.
"Voordat die stap geneem is om sy regterbeen ook te amputeer, moes die dokters eers deeglike toetse doen om vas te stel of die kanker na ander dele van sy liggaam soos sy limfstelsel of longe versprei het.
"Dit was aanvanklik 'n skok toe ons die eerste keer meegedeel is oor sy toestand en ons was stomgeslaan, omdat ons gedink het dat dit 'n beenfraktuur was," het hy gesê.
Sy linkerbeen is reeds in 1999 afgesit.
Hy sal binnekort prostese ontvang, maar beweeg tot tyd en wyl in 'n rolstoel rond.
Rochelle Arendse raak aangedaan wanneer sy begin praat oor haar seuntjie se toestand.
"Hy is baie bly om weer tuis te wees en sy maatjies loop die drumpel deur om by hom te kuier. Die familie is ook daagliks hier. Hy sal waarskynlik êrens in volgende jaar weer terugkeer skool toe," sê sy.
Richard-Dean, 'n kranige skaakspeler wat graag sy vrye tyd met dié sport verdryf, het een boodskap vir die jongspan daar buite. Die woorde steek bietjie vas in sy keel wanneer hy moet praat en hy besluit om liewer die boodskappie neer te skryf.
In 'n kinderlike handskrif staan daar: "Hulle moet dankbaar wees dat hulle gesond is."
* A brave Paarl boy is recovering from the loss of both legs due to cancer. |
'n PAARLSE seun het onlangs sy tweede been verloor weens kanker, maar ten spyte van die terugslag is hy baie moedig en sterk tans aan by die huis.